SHURAI 13
13
Abram ae Lot Ratayu
1Südonou Abram nou puh chapfü, puhvei buyu kini teitei alia Lotye koa Ejipt hinou reikou Negeb hi takhe tare. 2Abram hai kikhaorü, shahu ae sana alao koyu mailie. 3Puhnou Negeb hinou tapupoa Bethel hi koue, alia Bethel ae Ai ko hi puhnou raichoki sahpao haoloua 4rathobuh ali soukhai touyu hisü ve-e, alia sühinou puhnou ratho loue.
5Puhye koa tayu Lot-a zhaotu, nghitu ae sahpao bue. 6Südonou puhai khinou kikhaorü alao buyu thaifüa koa bulai touyuma kikhaorüye panou pou toure dei hai tailere. 7Südonou Abram ae Lot vei kikhaorü khoyu maitao hai züva-a baire. Süphaki dei süna hisü Kanaan mai ae Periz mai nou hrüa buhie.
8Süthaisü Abram nou Lot hi paoe, “Ahai ko hi ae ahai vei kikhaorü khomai ko hi panou züveiyu palai mokhe, daiolouzü ahaisü kikhamai ali baie. 9Ahai koa bunüyuma soulou shire, südonou buh kukua buta baishe. Nenou bakha nalo polai toulouzü Enou zhoulova talai, mokhaia nenou bakha zhoulova polai toulouzü Enou nalova talai.”
10Lot nou puh nghi heshu zhukhaie, Jordan deikho teitei hai Mapao vei kipei büa#13.10 Mapao vei kipei: Eden Kipei na paowe ae Ejipt teidei büa dzü veishoa buyu puhnou zhingaoloue. Haihai Mapao nou Sodom ae Gomarrah souha mojüe. 11Südonou Lot nou Jordan deikho teitei puh zha soua doloure, südonou puhnou teinghi palova tare; sübüa puh haisü ratare. 12Abram nou Kanaan teidei hi hrütare, alia Lot nou deikho hi buyu nuhdutao hinou bure alia puh vei ki sü Sodom nghia souloure. 13Sodom hi maitao hai maishi shoe alia Mapao nghoujü nou mah soushoyu maie.
Abram nou Hebron hi kouh tayu
14Lot nou tayu thai, Mapao nou Abram hisü paoe, “Ne nghithou heshu reilo, khelo, palo, thailo zhukhaio. 15Daiolouzü nenou zhingaoa buyu dei teitei hai neye ae nevei tyaonahtao hi peilai. 16Nevei tyaonah taosü panou vonai zhoua hrülai, maita linou vonai hai cholousüe toulouzü nevei tyaonah maitao haia cholousüe. 17Tashuloua dei haina vei sa-jha teitei sühao-a zhuta khaio, daiolouzü hai teitei nou neye peilai.” 18Südonou Abram nou puh vei sahpao sü hrada khailoua Hebron hi sheeyu Phüsüübe buyu Mamre hilo taho bure, ae sühinou Mapao ye thore rathobuh ali soushu loure.
Currently Selected:
SHURAI 13: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
