HAGGAI 2
2
Rathoki Ashu Navei Veihyu
1Darius nou pa vekou louyu po ahai-a khouh anai vei teithe kaili zhou Mapao vei chipao sü rachi paolawo Haggai hi haibüa paoe: 2Judah teidei khowo Shealtiel nahpoutu Zerubbabel, ae napao peichana Jehozadak nahpoutu Joshua alia maisou hi haibüa paopeie, 3“Neletao hrohi daoraiki Rathoki na kazhou koute vei-e tiyu ngaoyu mai buha-e? Chuo haina hai kabüge? Haihai halia moyu büa ngao movu? 4Ana chuo chathaiwuso, Oh Zerubbabel; napao peichana, Jehozadak nahpoutu Joshua, ne khuveilo; teidei sühi hrüa buyu mai hrülai khuveilo, teanou Mapao nou paoe; vah soukhaio, daiolouzü Enou neletaoye salai peilai, 5Neletaoye Ejipt teidei hinou sapayu phaki neletao hi paohpei khaitiyu thaipfüa neletaoye salai peilai, teanou Mapao nou paoe. Avei rako nou neletaoye salaiwe, ngaopiso.
6“Daiolouzü Khoukhoulai Mapao nou paoe, ‘Phazüti thaisü Enou raki, deiphao, zai alia dei theyu teitei sü ngulülai. 7Alia Enou tyahrü hrülaiye sü deilü peilai, sükua panou tyahrü hrülai vei thoudzü sü ki haina hi pove phouloulai, teanou Khoukhoulai Mapao nou paoe. 8Shahu ae sana khesü Avei-e,’” tea Khoukhoulai Mapao nou paoe. 9“Rathoki ashuna vei veihyu hai araina nou veihyu jünou veihpulai, alia buh haina hi Enou A maitaoye toungiyu ae kaonayu sü peilai,” teanou Khoukhoulai Mapao nou paoe.
Rachi Paolapu nou Napao Maitao ye Chakuyu
10Darius veo nou vekou louyu po ahai khouh akü vei teithe kaidai zhou Mapao vei chipao sü rachi paolawo Haggai hi haibüa ve-e. 11Hali-hala pei hi Mapao nou paoe, “Napao maitao hinou kabüa teidei kholai tiyu noukhaio: 12Mai ali nou sousheekhai tiyu sou hai puh sah hinou poloua raokhao, moa khokhai tiyu touso, moa zhaoh, theadzü, mokhai-a tousoyu na taralia poa dailouzü, sütao hai shee-a bailaiwu?
“Moe” teanou napao maitao nou chila peie.
13Süthai-a Haggai nou nou-e, “Mai linou thaiphao deiwua sheemoa buyu hinou puhnou touso haitao hai deiwu louzü, touso sütao sheemoa bailaiwu?”
Napao maitao nou paoe, “Süsü sheemoa bailai.”
14Haggai nou süthai haibüa paoe, “Sübüa baie, mai haitao hai, alia tyahrü haina hai,” teanou Mapao nou paoe. Puletao bah nou souyu vah teitei ae puletao nou posheelayu teitei hai sheemore.
Mapao nou Shiha peilai teanou Paohpeiyu
15“Zhou thainou daipa laisa tiyu neletao soutaosou-a zhukhaio. Neletao Mapao vei ki souta mojü kabüa bue? 16Mai linou thou sülai kai pfüloulai teanou cho-a buyu nanou kirou pfülou-a baiwe; alia mai linou zhaohtei hinou zhaohlah raingou füloulai teanou buyu nasü kai fülou baiwe. 17Neletao nou souyu vah teitei sü Enou maokhao, tyakhao ae khah alia reithou ye panou kouh soushi khaiti peiwe; ana neletao nou Ahi dakhai vemoe, teanou Mapao nou paoe. 18Zhou, khouh akü, teithe kaidai thainou, neletao soutaosou-a licho khaio. Mapao ye thoyu ki soutayu teithe hinou licho takhaio. 19Thoubao hi thou hayuma, darkhabe, doushibe, ae rashibe kukhe nou rashithou shipei moa buyuma, zhou thainou lichokhaio, Enou neletaoye shiha peita laire.”
Zerubbabel hi Mapao nou Paohpeiyu
20Khoukha kaidai zhou Mapao vei chipao hai Haggai hi vu ahai chena sou-a ve haibüa paoe: 21“Judah teidei khowo Zerubbabel hi haibüa paopeio, ‘Enou raki ae deiphao hai poa ngulaire, 22alia ve teidei hie buyu ve buhtaosü soukhaowulai; alia Enou vedeitao ae tyahrü hrülai souhawulai, rheilukitao ae rhei pfümaiye sü pokhaowulai, alia rheilukitao ae rhei pfümaiye sü souhawulai, alia puletao hai lah puletao samai vei khoche vanou thaikhai toulai. 23Rheilukitao ae rhei pfümaiye süzhou teithe sü, Oh Shealtiel nahpoutu Avei kilai Zerubbabel, Enou neye panou A zhih hinou teidei khoyu mai ali soulai, daiolouzü Enou neye dopaloure,’ ” teanou Khoukhoulai Mapao nou paoe.
Currently Selected:
HAGGAI 2: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.