HOSEA 11
11
Ramai nou Israel maiye Leshiyu
1 Mapao nou paoe,
“Israel mainou nahlea buki, Enou puhye leshie,
alia Ejipt hinou tapayu phaki Enou puhye ‘Anahpoutu’ tea kuloue.
2Enou chuo puletaoye kupu khaige,
puletao hai Ahinou tadou pu ta-a baire;
puletao nou Baal ye sü posheela peipua baire,
alia basharaye sü kainüvei nou meidei peia tho baire.
3Ephraim maiye sa-a tadou peiyu nasü Eye,
Enou puletaoye sü kethaipoa kidu papeie;
ana Enou puletaoye kidu papeie touyu sü puletao nou süloumore.
4Zhuvea leshiyu rainou poa Enou puletaoye süthai tapeie,
Enou puletao vei kou masüyu nasü southapeie,
alia Enou kikouh loua puletaoye sü tomü peie.#11.4 Phoure 4 nahai Hebrew hio sheesha moe.
5“Puletao nou chuo Ejipt teidei hisü dakhai talai, alia Assaria mainou pa puletao vei veo sü souwulai, daivanou toulouzü puletao nou Ahi dakhai ve bare. 6Puletao vei nuhdu khesü khoche nou souhawulai, puletao vei rokhubomü khesü pa meinou deihawulai, alia puletao nou lahdo soua tayu donou reih hinou pa thaikhaia bailai. 7Amaitao hai ahinou turei talai tea tetei lou baire, südonou puletaoye pa kou süyu pfülai, puletao nou pfüyu kou nasü mai linoua pokouh peilou hoe.#11.7 Phoure 7 nahai Hebrew hi sheesha timoe.
8“Oh Ephraim, kabüa nou E neye sü thaoloulai?
Oh Israel maitaore, E neletaoye sü kabüa nou mai kukhe mai bah hi thaothou loulai?
Kabüa nou E neletaoye sü Admah mai kua souha khailaige?
Mokhaia kabüa nou Zeboüm maiye souveayu büa neletaoye sü souvea khailai?
Neletao ye tudee-a souvealai toukhaie,
Alesü neletao ye zhuveayu nou phoutsü loua baire.
9Enou neletaoye sü avei lekha-rarou nanou poa souvea khailai more;
Enou Israel maiye sü souha khailai more,
daiolouzü E hai mai moe, Ramai-e,
neletao hrohinou sheeyu nae,
südonou neletaoye sü souha khailai more.
10“Enou kipeikhaodu büa puletao ngaobamai hi rapayu phaki, Amaitao nou Eye thaifü ta-a bailai. Puletao nou ngaopi shoa teinghi loulo nou Ahi velai; 11puletao nou raohou li büa Ejipt hinou yaopoa velai, alia khao büa Assaria teidei hinou velai; Enou puletaoye ki hi sa-a dakhai ve peilai,” tea Mapao nou paoe.
Ramai nou Israel alia Judah Mai hi Aetou moyu
12Israel mainou madayu alia vah ashi souyu hai nou Eye sü sühao loua bubaire, alia puletao vei acheche alia sheeyu Ramai Eye Judah mainou chukoutea dua bu baire.
Currently Selected:
HOSEA 11: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.