HOSEA 4
4
Israel Mai hi Mapao nou Aetoumoyu
1Oh Israel maitaore; Mapao nou teidei hai hinou hrüa buyu maitao hi aetou moyu bure, Mapao vei chipao sü keilouo, “Teidei haina hi chileeyu alia maiye zhuveayu ali-a hare, alia Ramai ye süyu maia hare. 2Teidei haihio chaachou souyu, dayu, taitha-dathayu, vaoyu, khulou souyu khaikho baire, alia sounou-pfünou touyua hazei toure. Maiye southayu vah sovei sü pulailaia baire. 3Südonou teidei hainasü shita-a bailai, hai hinou hrüa buyu maia lelou hotalai; alia rekhaona, tei hi raohou ae zai hi khah koutea tyaka-a bailai.”
Napao Maitao hi Ramai nou Aetoumoyu
4 Mapao nou paoe, “Mai lia panou züvei souo, mokhaia panou paoshi souo; Enou vamoyuo louzü neletao hi baie, Oh napao maitaore. 5Hea-khei sümoa neletao nou mada-a vah ashi soua bubaire, Rachi paola-apei maitaoa neletao jünou veipu more; Neletao pfü, Israel ye Enou souhawu laire. 6Amaitao nou tsüdo hayu vanou haka tare; daiolouzü puletao nou tsüdo ye sü malaiwu baire, südonou E-a puletaoye sü napao vei vah souyu hinou malaiwulai. Alia puletao nou Ramai vei chikha sü ngaiyu thaifüa, E-a puletao vei tyaonah ye sü ngaiwulai.
7“Puletao nou mai poupakhaie, mah sü soupou pa-a baire; Enou puletao vei zhihvei zhihdu nasü hraongu hi soudathou peiwulai. 8Neletao nou Amaitao vei mah vanou toungi loure; südonou neletao nou Amaitao ye sü panou mah soupu nüwe. 9Neletaoa mai kukhe maitaoye raibüa tudeelai; Enou puletaoye sü ludu machamoa tayu donou souvea peilai, alia puletao nou souyu vah na thaifüa vahshih sü peilai. 10Puletao nou toulai, ana khalai moe, puletao nou khakhayu vah sü soulai, ana mai kaapu palai moe; daivanou toulouzü puletao nou Mapao ye sü thaowua pfüphao jüpa vah sü soutayu donoue.”
Acheche Moyu Rathoyu vanou Mapao nou Aetoumoyu
11 Mapao nou paoe, “Amaitao vei tsüsüh nasü zhaoh nou pa potare. 12Puletao nou süü-chuh ali hinou daie vepalai tea nouwe, alia süü-chuh nasü nou puletao hi vepare sü paongao peiwe. Daiolouzü khakhayu rako nanou puletaoye sü sa-a mota peiwure, ae Mapao ye sü thaowua puletao nou khakhayu vah sü soutare. 13Puletao nou deichi kuyu kinou posheelawe, alia deichi pei hinou ae süübedu phikinou popeiwe, daiolouzü buh sükihai teikhü veiwe.
“Südonou ne nahnaotutao nou khulou vah sü soutare, alia ne chapfütao nou sapayu vah sü soutare. 14Ne nahnaotutao nou khulou souyu phaki, alia ne moumaitao nou poutu kukhe maiye koa khu souyuma, Enou puletaoye sü tudee-a souvea laimoe; daiolouzü nele poututaoa khakhayu naotupai hisü tawe, alia rathoyu ki hinou khakha maiye koa sheelawe. Haibüa nou tsüchi paokhai toue, ‘Tsü hayu maisü hakata bailai.’
15“Oh Israel, mainou chilee moa hrüyuma, ne Judah maiye panou mah hisü louwuso. Gilgal hi talouso, mokhaia Bethaven#4.15 bethaven: Zhih haina vei ko hai “hashi souyu vei ki” moa “bashara thoyu ki” touwe, haihio Bethel nuhdu naye paonadawe, süna vei artha louzü “Ramai vei ki” touwe. Phoure 5.8; 10.5 ae 10.8 haitao hia zhukhaio. hia kheso, alia sühinou hriyu Mapao vei zhih hinou chaachoua souso. 16Maiko zübayu cholou ali büa Israel mai hai nou khouwe; kabüa Mapao Enou neletaoye zhaotu büa dei veih hinou pou daitoulai? 17Israel mai-o bashara ye thotare, puletaoye sü panou lah dosoua tatheo. 18Puletao nou zhaoh sozhiloua khulou vah soutare; puletao hai zhih aveih na jünou khulou souyua jüpa pure. 19Puletaoye sü teikhai nou hüpoa tayu büa hüpoa tawulai, alia puletao nou cheche moyu rahye posheelayu#4.19 posheelayu; larübvü ali hi posheelabutao. Phoure 17-19 koute hai Hebrew hi sheesha toumoe. donou hraongu ngaolai.
Currently Selected:
HOSEA 4: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.