HOSEA 6
6
Maikhe Mainou Lüsheetou-a Ledalou moyu
1Maikhe mainou paoe, “Etao Mapao hi dakhaive baikhe; daiolouzü Puhnou Etaoye soushi peia baie, Puhnou chua veikhai mosoua Etaoye souvei peilou süe; daphe-dapho peiyu nasü puhnou baie, südonou puhnou chua Etaoye soumu peishulai. 2Teithe ahai-sü thaisü puhnou Etaoye sou hriva peilai; teithe asü zhou puhnou Etaoye polashu peilai, sükua nou Etaoa puh nghoujü nou ve hrülai. 3Etao nou sülou laikhe, Etao nou Mapao ye süloure donou telaikhe; tei thepa vuzü laiyu büa Mapao-a Etao hi vevuzülai; puhnou Etao hi teirü büa velai, alia poutsü payu teile hi teirükou peiyu büa puhnou Etao hi vevu zülai.
4“Oh Ephraim, neye donou E dai soulai? Oh Judah, neye donou E dai soulai? Nemai vei leshiyu haio teihao büa baie, alia thashoa hatayu shona vei vidzü büa baie. 5Südonou Enou rachipaola-apei maiye koa puletaoye zhiwure, Enou puletao ye amü hinou payu chipao sünou southawure, alia Avei chi-lou kuyu haio ava büa talai. 6Daiolouzü Ewo neletao nou posheelayu na jünou neletao vei tobai soumoa leshi peiyua jüpa puhie, meinou deia thoyu najünou Eye süyu nanou jüpa hie.
7“Ana Eye koa Vo soukhai touyu nasü Adam hinou poa chukoute neletao nou pfüphe-pfüthoa baire. 8Gilead hai ashi souyu alia zhe kükouyu nuhdu ali soua bubaire. 9Mai vei saotouyu mainou maiye dahyu büa Napao maitaoa me souloua Shekhem ludu hinou maiye datha baire, puletao nou ashi vah sü sounü shoa bubaire. 10Israel mai hi Enou ngaopi shoyu ali ngaoe; Ephraim mainou khakhayu vah sü soua bure, Israel maiye sü souzhaiwure.
11“He Judah hi maitaore, neletaoye donoua chachire teile sü soudawure.
Currently Selected:
HOSEA 6: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.