LEVIMAI LARÜBVÜ 11
11
Toulou Veiyu Soukhaonatao
(Paod 14.3-21)
1 Mapao nou Moses ae Aaron hi chikha haitao hai 2Israel maiye panou soupfüre donou peie. Deiphao nou hrüyu hrikhaona haitao hai toulou vei-e: 3Phimou ahai pfüa nou to layu khaonatao hai neletao nou toua bailai, 4-6ana neletao nou racho, zhaonghi moa lazhao hai toulou shi-e. Soukhaona haitao hai to lawe, ana phimou ahai pfümoe, südonou haitao hai shee moyu khaona baie. 7Vosou hai toulai moe, daiolouzü haina hai phimou ahai bue, ana to la-a moe, südonou neletaoye donou haisü shee moe. 8Neletao nou soukhaona haitao hai toulai moe, ae haitao vei thaiphao hai neletao nou dei-a deilai moe, daiolouzü neletaoye donou haitaosü shee moe.
9Dzü hinou buyu kha taralia shouh-mi pfüyu ae khakao pfüyu veishi hai neletao nou toua bailai, 10ana dzü hinou hrüa shouh-mi pfümoyu ae khakao pfümoyu teitei hai neletao nou toulou shi-e. 11Hrikhaona sütao hai neletaoye donou shee moe. Neletao nou sütao hai toulai moe, moyuma sütao thaiphao hai dei-a deiso. 12Dzü hinou buyu hrikhaona taralia shouh-mi pfümoyu ae khakao pfümoyutao hai neletao nou toulai moe.
13-19Tei hinou zhaoyu raohou haitao hai neletao nou toulai moe: leche, lekhana, tuturu, rashopeiki, voka, shehoudu (ostrik), dzüraohou, storks, heron, pelicans, kormorants, houphisoh moa bailou.#11.13-19 Phoure 13-19 hi louyu raohou zhihtao hai sütou/sheesha timoe.
20Shouh pfüyu khaongao, phibao adai pfüa tayu teitei hai shee moe, 21ana shouh pfüa phibao adai nou dei hinou chopoa tayu khaongaotao louzü toua bailai. 22Neletao nou khazü, hairakiki, ae khaikhai tyahai toua bailai. 23Ana shouh pfüyu khaongao kukhetao, dei hinou routayu khaongaotao louzü shee moe.
24-28Mai taralia soukhaona haitao vei thaiphao deiyu mai hai koukhe koute sheelai moe: phimou ahai pfüa to lamoyu soukhao veishi, ae phibao adai pfüa phitsü bahtsü pfüyu khaona teitei hai shee moe. Mai talinoua haibüyu soukhaona vei thaiphao pota louzü, puletao vei sabanü hai dzü shaolai, ae puletao hai koukhe koute sheelai moe.
29-30Deiphi hinou zhapoa tayu khaona haitao hai shee moe: zhaotsütsü, zhao, zhaokhi, krikrikhao/keilipao. 31Mai talinoua khaona haitao hai deilouzü moyuma khaona haitao vei thaiphao hai deilouzü puhsü koukhe koute sheelai moe. 32Ae khaona haitao vei thaiphao sünou hana tarali hia dekou loure toulouzü na sütao hai sheemoa bailai. Süsü süü nou soukhai touyu na, sabanü, souhee, soukousah, paikhao ae natarali hia dekou loure toulouzü na sünasü dzü hi pothoulo, na sünasü koukhe koute shee laimoe. 33Hakinou thaiphao nasü nailee hi deloure toulouzü, lee hi buyu na veishi hai sheemoa bailai, südonou nailee nasü daphe laiwo. 34Touso tarali hia nailee sühinou dzü hai poa lathoure toulouzü touso sütao hai shee moa bailai, ae ke louveiyu dzü sütao-a sheelai moe. 35Hana tarali hia pao-a buyu khaona haitao vei thaiphao nou dekou loure toulouzü sütao hai shee moa bailai; süsü hakho touyu thao moa meibvü nasü shee moa bailai, südonou sünasü daphe sasaloua poa shilaiwo, 36ana dzünghou moa dzübvü louzü shee-a bailai, anou na kukhe louzü thaiphao nou deiyu veishi hai shee moa bailai. 37Hakinou thaiphao na hai poa vuthoure thoutai hi delouyuma thoutai louzü shee-a bailai. 38Ana thoutai hai dzüpfü khaitoua buyu hinou deloure toulouzü thoutai sütao hai shee moa bailai.
39Toulou veiyu soukhaona tarali hai thaire toulouzü, ae süna thaiphao hai mai tarali nou deilouzü puh hai koukhe koute sheelai moe. 40Ae mai tarali nou sou süna hai tou loure toulouzü, puh sü puhvei sabanü hai dzü shaolai, ana koukhe koute hai sheelai moe; mai taralinoua thaiphao hai polouzü, puhvei sabanü hai dzü shaowulai, ae koukhe koute hai sheelai moe.
41Dei hinou ngaotayu khaona taitya teitei nou shee moe, sütao hai toulai moe. 42Pou nou routayu, phibao adai pfüyu, moa phibao alao pfüa tayu khaonatao hai toulai moe, süsü shee moe. 43Haibüa shee moyu taraliye panou neletaoye shee moyu sü souso. 44E hai neletao vei Ramai Mapao-e, südonou neletao hai shee-a bulo, daiolouzü E hai shee-e. 45Neletao vei Ramai soure donou neletaoye Ejipt teidei hinou sapa peiyu Mapao nasü E-e. Neletao hai shee-a bulo, daiolouzü E hai shee-e.
46Haitao hai hrikhaona ae raohou, ae dzü hinou hrüyu khaona alia dei hinou lüa tayu khaonatao donou chikha soupeikhai touyutao-e. 47Neletaoye panou sheeyu ae shee moyu, toulou veiyu ae toulou shiyu hrikhaona taoye panou süku loure donou peikhai toue.
Currently Selected:
LEVIMAI LARÜBVÜ 11: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.