LEVIMAI LARÜBVÜ 16
16
Khailupa Peiyu Teithe
1Aaron nahpoutu ahai nou shee moyu mei deiposhu Mapao ye sheelayu vanou thaitayu thai, Mapao nou Moses ye cha-e. 2Puhnou Moses hi paoe, “Ne jürai Aaron hi paopeio, süolouzü Sheesheelai Buh, haosah thailova nou khaitouyu Vo Sübvü phaova hi zhuvea peiyu buh nghoujü sü louzha zhasho, puhnou buh sühi loulouzü puhsü thai-a bailai, daiolouzü Enou zhuvea peiyu buh nghoujü hisü teihao hinou veloua bue. 3Puhnou Sheesheelai Buh hisü mah vei posheela peire donou chode ali ae meidei-a posheelare donou zhaotu ali pove louzü loua bailai.”
4Süthaisü Mapao nou kharochi haitao hai peie. Puhnou Sheesheelai Buh hi loumo jünou pfüphao hai dzükhü loulai, ae napao maivei sabanü— deizüzüyu naazao, nü, khyakho ae peizüyu sah hai thouloulai.
5Israel maisou nou Aaron ye nghitsü ahai hai mah vei posheela peire donou ae zhaotu ali hai meidei-a posheelare donou pove peilai. 6Puhnou chode nasü lah puhvei mahmo donou ae puhvei kihikha maitao vei mahmo donou posheela peilai. 7Süthaisü puhnou nghitu ahai sü Mapao nou buyu Sahpao kihi bomü hisü pokou loulai. 8Sühi sünou puhnou chuh ahai hai poloua ali nahi “Mapao ye donou” ae alina hisü “Azazel (rekou) donou” tea rüthouloua kananou palaisa tea rako zhulai. 9Mapao ye donou tea polouyu nghitu nasü Aaron nou poloua mah vei posheela soua posheela peilai. 10Azazel (rekou) tea popa louyu nghitu nasü hri Mapao ye peiwulai ae maikhe maivei mahmo khesü panou potare donou Azazel vei radeiki hilo seitawulai.
11Aaron nou chode nasü lah puhvei mahmo donou ae puhvei kihikha mai vei mahmo donou posheela peiyu phaki, 12posheelabu hinou meithou khao ali ae poukai nüvei bahzü ali hai poloua Sheesheelai Buh hisü taloulai. 13Mapao nou buyu hisü nou poukai nüvei nasü mei hi thou deilai, ae meikhao sünou Vo Sübvü phao hinou khaitouyu zhuvea peiyu buh nasü puhnou zhingao laimoe, sükulouzü puh hai thailai moe. 14Puhnou chode vei zhe sü daotu poloua zhuvea peiyu buh nghoujü hisü kavu peilai, ae süthaisü Vo Sübvü nghoujü hi bakha anai hai kavu peilai.
15Süthai hai maikhe maivei mahmo donou pove peiyu nghitu nasü puhnou datha loulai, ae souzhe hai Sheesheelai Buh hi polou zhuvea peiyu buh hi ae Vo Sübvü nghoujü hi chozhe na kavu peiyu bütoua kavu peilai. 16Haibüa Sheesheelai Buh nasü naanou soua soushee peilai, daiolouzü Israel maivei sheemoyu ae puletao vei mahmo donou soulai. Puhnou hai nasü Sahpao hia soupeilai, daiolouzü Sahpao na hai puletao vei fühao toutsü, naanou hinou sheemoyu hinou bue. 17Aaron nou sousheeyu vei naanou soure donou Sheesheelai Buh hi talouyu thai, puh dakhai pamo koute hai mailia Sahpao hisü loulai moe. Puhnou lah puhye donou, puhvei kihikha maiye donou, ae maisouye donou naanou hai soupeiyu thai, 18puhnou süthaisü posheelabu hi tapaloua meidei-a posheela peilai ae posheelabu sünasü soushee peilai. Puhnou chode vei zhe daotuli ae nghitu zhe daotuli hai poloua posheelabu vei pehao veishi hi napeilai. 19Puh bah toutu sünou zhe sü süloua posheelabu hisü bakha anai hai kavu peilai. Haibüa Israel maivei mah khesü soushee peire donou naanou sü souloua soushee peilai.
Mahkhah Hraolouyu Nghitu
20Aaron nou naanou soua Sheesheelai Buh, Mapao nou buyu Sahpao, ae posheelabu khesü soushee peicheyu thai, puhnou Azazel (rekou) donou dopakhai touyu nghitu nasü Mapao hi popeilai. 21Puhnou nghitu pei hisü puh bah ahai nou deiloulai, ae Israel mainou mahmo soukhai touyu teitei, ae soula-pfüla khaitouyu mah veishi hai lapalai, sübüa nghitu pei hisü pokou thoupeilai. Süthaisü mai kamai-a dopaloua nou nghitu nasü rekou hi huthou peilai. 22Nghitu nanou puletao vei mahmo teitei hai sübüa mai hrümoyu buh hi pfüa tawulai.
23Süthaisü Aaron nou puhvei napao maivei sabanütao, puhnou Sheesheelai Buh hi talou mojü thoukhai touyutao sü phawulai, ae sabanü sütao hai buh sühi khaiwulai. 24Puhnou sheeyu buh hinou dzü khüloulai, ae lah puhvei sabanü hai nouloulai. Süthai hai puhnou vakou tapaloua lah puhvei mah donou ae maikhe maivei mah donou meidei-a posheelayu nasü posheela peilai 25Posheelabu hinou puhnou mah vei posheela peikhai touyu southeatao sü meidei peilai. 26Azazel donou dopakhai touyu nghitu naye rekou hutayu mai nanou puletao vei fühao hi dakhai vemo jünou puh sü dzükhü loulai. 27Mah vei posheela khaitouyu chode vei zhe ae nghitu vei zhe, mah pota loure donou Sheesheelai Buh hi polouyu soutao hai fühao vei vakou popaloua meidei laiwulai. Souhee, souke, ae lesouna veishi nou meidei laiwulai. 28Sou sütao meideiyu maitao hai fühao hi dakhai vemo jünou puletao vei sabanü hai dzü shaowulai ae dzükhü loulai.
Khailupa peiyu Teithe Reiyu
29Vere teile veishi hinou zhai haitao hai reilai. Khouh anai navei teithe kirou zhou hai Israel mai hrülai ae puletaoye koa hrüyu shetumai hrülai-a vah soumoa lüh-a reilai. 30Süzhou teithe hai puletao mai hrülai nou naanou hinou shee-a buloure donou puletao vei mahmo khesü soushee loulai. 31Süzhou teithe hai sheeshoyu teithe ali soulai, vah lia soumoa lüh-a bulai. Zhai hai nasü vere teile veishi hinou soupfülai. 32Sousheeyu vei naanou hai puh puo thaosoua pa Napao Peichana soure donou theadzü napei-a soushee peikhai touyu napao nou soulai. Puhnou napao maivei sabanütao hai thouloulai, 33ae naanou soua Sheesheelai Buh, Mapao nou buyu Sahpao teitei, posheelabu, napao maitao, ae mai hrülaiye soushee peiyu naanou hai soupeilai. 34Zhai haitao hai vere teile veishi hi-a soulai. Naanou haina hai po ali hinou vu ali hai Israel maivei mahmo veishi soushee peire donou soupfülai
Moses#16.34 Moses; moa Aaron. nou Mapao vei chikha thaifüa sütao veishi hai soupeie.
Currently Selected:
LEVIMAI LARÜBVÜ 16: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.