LEVIMAI LARÜBVÜ 5
5
Mah Souyu donou Posheela soure Zhaitao
1Mah souyu donou posheela molouzü shiyu sü haitao-e:
Chikuyu buh hi mai taliye puhnou ngaoyu moa süyu nasü tave paopeio tea kuyu phaki, puhnou checheyu nasü tave paopei more toulouzü, puh hisü mah bure.
2Mai talinou sümoa naanou hinou sheemoyu na ali hai deilouzü, süsü thaiyu soukhaona dei louzü, puh sü sheemore ae puhnou süna hai sülouyu phaki, puh sü mahwure.
3Mai talinou Emai va hinou sheemoyu hataralia deilouzü, ae puhnou süsü kaomore tea sülouyu phaki, puh sü mah bure.
4Mai talinou hatarali donou chaachou hai thasho-a nou souwua puh lah süsü kaomore tea sülouyu phaki, puh hi mah bure.
5Mai talinou haibüa mahmo soulouzü, puh sü mah lapalai, 6ae puhnou soumah khaitouyu donou Mapao hi zhaotu moa nghitu kü ali hai pove posheela peilai. Napao nou sünasü puhvei mah donou posheela peilai.
7Mai talinoua zhaotu moa nghitu hai peilou hore toulouzü, puhnou khao ahai moa rahou ahai sü puhvei mah donou Mapao hi pove sheela peilai, süsü ali hai puhvei mah donou posheelalai, ae ali nanou meidei-a posheela soulai. 8Puhnou süsü napao hi pove peilai, ae napao nou arai nasü puhvei mah donou posheela peilai. Puhnou raohou nasü ngu rashawulai, ana pei hai paidepa laimoe, 9ae zhe sü poloua posheelabu hisü kavu peilai, ae lia buyu zhe kukhetao hai posheelabu phi hi zhaokhai peilai. Mah vei posheela sü haibüa soulai. 10Süthaisü napao nanou raohou ahai nasü meidei-a posheela peiyu zhai hinou posheela peilai. Haibüa napao nou puhvei mah donou posheela peiyu nasü soupeilai, ae puhvei mah sü khaipeilai.
11Mai talinou khao ahai moa rahou ahai peilou hore toulouzü, puhnou sou sühcho ali hai puhvei mah donou posheela peilai. Puhnou hai hisü theadzü moa poukai nüvei hai thouhrü laimoe, daiolouzü haisü mah vei posheela peiyu nasü baie. 12Puhnou hai nasü napao hi pove peilai, ae napao nou hai nasü Mapao hi posheela peiwure touyu shee soua sou hai bahzü ali poloulai, ae süna hai thoudzü vei posheela soua posheelabu hinou meidei peilai. Haibüa mah vei posheela hai posheela peilai. 13Napao nou haibüa mai livei mah donou posheela hai posheela peilai, ae puhnou puhvei mah sü khaipeilai. Shokhai toua buyu soutao hai thoudzü vei posheela peiyu zhai büa napao veire.
Paozho Khaipeiyu Posheela
14 Mapao nou Moses hi zhai haitao hai soulo tea peie. 15Mai talinou shee-a nou Mapao ye peire nasü sümoa mah souwu louzü, puhnou soumah khaitouyu vei posheela soua Mapao hi chaa hayu zhaotu moa nghitu pou/de ali hai pove peilai. Sünasü muma hai maisou nou ta-a buyu zhai hinou phoupeilai. 16Puhnou peire nasü teile macha hinou khapeilou moyu donou sünasü zha kaih hinou zha kai hai thoupuloua nou khapeilai. Puhnou hai nasü napao hi pove peilai, ae napao nou puhvei mah donou zhaotu moa nghitu nasü poa sheela peilai, ae puhvei mah sü khaipeilai.
17Mai talinou sümoa Mapao nou souso tea peikhai touyu chikha hai souwu louzü, puh sü mahwure ae puh pei hisü tudeelai. 18Puhnou soumahyu vei posheela hai chaa hayu zhaotu moa nghitu pou/de ali hai napao hi pove peilai. Süna vei muma hai maisou nou ta-a buyu zhuloua peilai. Napao nou sünasü puhvei mah donou posheela peilai, ae puh mah sü khaipeilai. 19Haisü sümoa puhnou Mapao hi soumah khaitouyu vei posheela nasüe.
Currently Selected:
LEVIMAI LARÜBVÜ 5: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.