LEVIMAI LARÜBVÜ 7
7
Paokha peiyu vei Posheela
1Soumah khaitoua paokha peiyu vei posheela sü haibüa soulai. Hai nasü sheesho-e. 2Posheela haina vei hrikhaona nasü meidei-a posheela peiyu hrikhaona dathayu posheelabu vei reilova nou dathalai, ae haina vei souzhetao hai posheelabu vei kainghou teitei hi lazü peilai. 3Southea veishi hai poloua posheela peilai: mi hi taoyu theatao, lena hi buyu theatao, 4kithou ahai ae sühinou taoyu southeatao, alia veikayu sousütao hai poa sheela peilai. 5Southea teitei hai napao nou Mapao hi thoudzü vei posheela soua posheela peilai. Haina sü paokha peiyu vei posheela nasüe. 6Napao maivei kihikha hinou buyu poutumai taralia haina sü toua bailai, ana haina sü sheeyu buh hinou toua bailai, daiolouzü haisü sheesho-e.
7Mah vei posheela ae paokha peiyu vei posheela haina ahai hinou tare zhai ali bue: süolouzü posheela peikhai touyu soutao hai naanou soupeiyu napao vei-e. 8Meidei-a posheela peiyu hi souheetao hai napao vei-e. 9Thoudzü vei posheela peiyu hi chuh hinou khaokhai touyu raokhao, moa lee hinou khokhai touyu moa lee hinou sakhai touyu teitei hai naanou soua Ramai hi posheela peiyu hai napao naveie. 10Ana kho moa posheela peikhai touyutao, süsü theadzü thouhrü khaitouyuma moa thoumoyu teitei hai Aaron tyaosholea hinou hrüveyu napao mai hrülai nou raibütoua zha zhilai.
Chavei Lathao-a Bure vei Posheela
11Chavei lathao-a buloure donou posheela soua Mapao hi peire zhaitao sü haibülai. 12Mai talinou posheela haina hai kalo vei posheela soua Ramai hi peilai toulouzü, puhnou posheela peire hrikhaona naye koa nou kheih thoumoyu raokhao nou peilai: raokhao süsü oliv theadzü nou thouhrüloua soulai, moyuma raokhaoki hai soupheloua theadzü nou thouhrüloua posheela hai peilai. 13Süpei hinou posheela haina hai kheih thoua soukhai touyu raokhao noupu pove peilai. 14Puhnou raokhao tyachekhei poloua Mapao hi soukha peiyu vei posheela soua peilai; haitao hai souzhe poa posheelabu hi lazü peia naanou soupeiyu napao vei-e. 15Posheela soua datha khaitouyu soutao hai süzhou nou toukhai touloulai, süsü panou thainesho koute hai bukoulai moe.
16Mai talinou chavei lathao loure vei posheela hai chaachou soukhai toua posheela peilouzü, moyuma puhnou peinüa pei bailouzü, soutao hai posheela peiyu zhou hai toukhai lai moe, ana thainesho-a toulai. 17Anou soutao hai touhao loumoa thaine-a bukou louzü, sütao hai mei deiwulai. 18Hakinou sou hai teithe asü zhou-a toure toulouzü, puhnou posheela peiyu nasü Ramai nou polai moe. Posheela peiyu nasü sheemore tea polai, ae toulouyu maitao sü veahoyu hai daolai. 19Posheela khaitouyu sou hai shee moyu na taralia dei louzü, süsü toulai moe, ana mei deiwulai.
Mai taralia naanou hinou shee-a buyu mai sü sou hai toua bailai, 20ana naanou hinou sheemoa buyu mai talinou sou sü toure toulouzü, puhye sü panou Ramai vei maitao hi bupulai moe. 21Mai taralina sheemoyu na taralia dei-a nou posheela khaitouyu sou hai touloure toulouzü puhye sü Ramai vei mai soua panou phouthou pulai moe.
22 Mapao nou Moses hi paoe, 23“Israel mai hi paopeio, süolouzü mai talinoua posheela peikhai touyu southa hai toulai moe. 24Lah thaiyu, moyuma soukhaona nou southa khaitouyu (chüsou) vei southeatao hai neletao nou poa vah kukhe louzü soua bailai, ana toulai moe. 25Mai taralinoua Mapao hi thoudzü vei soua posheela khaitouyu southea hai toure toulouzü, puhye sü Ramai vei mai soua populai moe. 26Buh tarali hinou hrüa buyuma Israel mai nou raohou zhe moyuma souzhe hai touso soua toukhai toulai moe. 27Mai taralinoua chikha haina hai pfüthoyu maiye sü Ramai vei mai soua populai moe.”
28-29 Mapao nou Moses hi Israel mainou posheela peiyu phaki, zhai haibüa soupfülo tea nou peie. Mai talinou Mapao hi chavei lathao loure vei posheela pove peiyu phaki, soukha peiyu vei posheela noupu Mapao hi pove peilai. 30Thoudzü vei posheela peiyu na hai puh bah hinou puh lah pove peilai. Puhnou southeatao hai khaorao nou koa Mapao hi soukha peiyu vei sapeina soua pove peilai 31Napao nou southeatao hai posheelabu hinou meidei peilai, ana khaorao hai napao maitao vei souloulai. 32-33Sou phikao zhoulova hai soukha peiyu vei posheela soua souzhe ae southeatao hai chavei lathao loure donou posheela peiyu napao hisü pove peilai. 34Israel mainou napao maitao hisü khaorao ae phikao zhoulova hai Mapao hi soukha peiyu vei posheela soua peilai. Vere teile veishi hia Israel mainou haina hai napao maitao hisü peikou telai. 35Haina hai Israel mainou Mapao hi thoudzü vei posheela peiyu soua Aaron ae puhvei nahpoutu maitao nou napao soure donou kupaloua theadzü napeiyu teithe hinou puletao vei zha soulai. 36Puletaoye theadzü napeiyu teithe hinou Mapao nou Israel maiye haina hai peio tea kharochi peiwure, ae haisü Israel mainou vere teile veishi hia chikha hainasü züa soukou telai.
37Haitao hai meideia posheelayu, thoudzü vei posheelayu, mah vei posheela peiyu, paokha peiyu vei posheelayu, theadzü napei-a pokupa peiyu vei posheela peiyu, alia chavei lathao loure donou posheela peiyu zhaitao sü haibüa soulai. 38Chikha haitao hai Mapao nou Moses hi Sinai Deichi hinou Israel maiye posheela peio tea paopeiyu teithe hinou peie.
Currently Selected:
LEVIMAI LARÜBVÜ 7: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.