LUK 14
14
Jisu nou Phi-bao Maayumai Aliye Souvei Peiyu
1Alia Soteithe ali hisü Jisu nou Phariseemai peichamai ali ki hinou tovai touzhore donou taveyu kisü maikhe mainou Jisu ye sü zhutei loure. 2Alia zhukhaio, puh nghojü hisü phi-bah maayumai ali bue. 3Alia Jisu nou razhai dou-apeimai ea Phariseemai taohi noue, “Soteithe kihi sounou maiye souvei peiyu razhai buho, hae?”
4Ana puletaosü paikhai khaimore. Süthaisü puhnou mai sünaye kou deiloua souvei peire, alia puhye panou tare. 5Alia sükisü puhnou puletao hi paoe, “Neletao hrohinou mailivei nahpoutu maili bua moa cho ali bua sünasü Soteitheki dzübvühi delou louzü, puhye sü Soteitheyu donou thala-a popa peilai moyu thaoh bue?”
6Alia sünasü puletao nou chila peilou hore.
Tainouyu ea Shevai Shepeiyu
7Chuo vaibuh hi kuvekhai touyu shemaitao hrohinou kamainou tsükhouyu buh hi bure doyusü Jisu nou ngaoloua puletao hi nada ali paopeie: 8“Maitalinou neletaoye sheenghiyu nühbuh hi kuveyu kisü tsükhouyu buh hi buso, molouzü puhnou ne jünou matsü kouyu kukhe mailiye kukhai-a thaohnou sülai; 9alia nehai maihaiye kuveyu nevei shepao nanou taveloua nehinou, ‘Buh hainasü panou mai hainaye buwo’ tea paoyu kisü ne sü akhai khailaina buh hi kou bure ahraolai. 10Ana neye vaibuh hi kuveyu kisü taloua akhai khailaina buh hinou bukhaio, sükulouzü nevei shepao nanou taveyu kisü puhnou nehi, ‘Asa, buh aku nahi pabu loukhaio’ tea paolai; sükisü neye kukhe shemaitao, hrülai nghojünou tsükhou peilai. 11Daiolouzü lah puhye soukuyu mai taliye sü sounalai, alia lahnou natai-a buyu puhye sü souku peilai.”
12Süthaisü Jisu nou puhvei shepao nahi paoe, “Nenou koukhe vaili moa tovai aduli peiyu kisü nevei sa-pa moa thaihou-jüraitao moa ne ta-raitao moa haniyu kinapa taoye kuso, molouzü puletao nou-a neye kudaloua nevei paosü khawulai. 13Ana nenou tovai aduli peiyu kisü, toure hamai, sho-vaimai, phi chamai ea nghi chamai taoye kukhaio; 14sübü louzü neyesü hapeilai, daiolouzü puletao nou neyesü pao khapei louhoe, Ramai nou neyesü cheche maitao hrishuyu kinou pao khapeilai.”
Nüh Aduna vanou Nada
(Mt 22.1-10)
15Alia Jisu ye koa arübuh hinou buyu maikhe maitao hrohinou alinou haisü chouloua puh hi paoe, “Ramai Vedei vei nühbuh hinou tou-sholaiyu maisü daizhozhou rako veie!”
16Ana Jisu nou puh hi paoe, “Teile alihi mai alinou dushoyu tovai ali peia maikhemai taoye alaosou kue; 17alia tovai sünavei teile veyu kisü puhnou puhvei kilaiye, ‘Taveo; daiolouzü chuo ha teitei soudakhai toure,’ tea panou puhvei shemai taohi paore donou seitare. 18Ana puletao veishinou kheihao-a velou more chi veishoa paokhai loure. Araikha nanou kilai sünahi haibüa paoe, ‘E douli hrükhaitoue, alia Enou taho sünasü zhumo louzü shilaire; leshia Eye khaipei baio.’ 19Alia kukhe alinou paoe, ‘E chode paa angou hrükhaitoue, alia Enou taho sütaoye veiyu shiyu zhulaihie; leshia Eye khaipei baio.’ 20Süthaisü kukhe alinanou paoe, ‘E zhovubü hinou sheehie, alia südonou E velou hore.’
21“Südonou kilai sünanou dakhaive puhvei paopuhi chi sütaosü paongao peire. Sühinou paopu sünanou rarouloua puh kilaihi paoe, ‘Ne thala-a nuhduhi duvatao ea kijüdu taohi taholoua toure hamaitao, shovai maitao, nghicha maitao ea phi chamaitaoye savekhaio.’ 22Süthaisü thala-a kilai sünanou paoe, ‘Paopu, nenou chikha peiyu taosü souchere, ana chua sühisü buh buhie.’ 23Südonou paopu sünanou kilai nahi paoe, ‘Ne nuhfütao duvahi ea ludu taohi taholoua Avei kisü ve phouloure donou maikhe maiye kutailoua panou tavekhaio. 24Daiolouzü Enou neletao hi paowe, raia kukhai touyu maikhe maitao alinoua Avei tovaisü ve chilai moe!’”
Rozümai Ali soua buyu Muh
(Mt 10.37-38)
25Chuo maikhemai alaosou Jisu ye koa tayu kisü, puhnou reiveloua puletao hi paoe, 26“Maita linou Ahi taveloua lah puhvei puo, pfü, chapfü, nahmaitao, thaihou-jürai, tumaitao, ovai puhlah puh pfüzhoye-a ngaoramo louzü puhsü Arozümai soulou hoe. 27Maita mailia lah puhvei kros pfüloumoa Athai füyu maisü Arozümai soulou hoe.
28“Daiolouzü neletao hrohinou maita linou kishoki sounüa bulouzü, sünasü souche khoulou süyu muh bumosa tea raia puhnou kou buloua thou-shapei cholai mowu? 29Sübümo louzü puhnou kifü sü khochewu-a ki sünasü souchelou holouzü sünaye ngaoyu maikhemai hrülainou puhye hai konü-a, 30‘Mai hainanou kisü soushue, ana souchelou hore!’ tea paolai.
31“Moa kakuyu vemainou kukhe vemai aliye reih züre donou tapa laiyu kisü, puh pei hi reih züre donou reihmai thekaiye koa laiyu ve sünaye puhnou puhvei reihmai the kirou sütaonou zülou sülai mosa tea raia kou buloua tsü cholai mowu? 32Alia puhnou zülou holaina toulouzü, kukhe sünanou doushoa laibu kinou, puhnou puhvei ko paolamaiye seita-a kaonayu vei vo souloure donou panou tave kholai. 33Südonou, haibüa neletao hrohinou maita linou puhvei buyu teiteisü thaokhaiwu molouzü puhsü Arozümai soulou hoe.
Khü Hayu Tai
(Mt 5.13; Mk 9.50)
34“Tai hai veishoe; ana tainou khü halouzü kabüa sünaye panou khüh dalou khailai? 35Sünasü dei donoua moa podzükhai touyu mato donoua matsü hare; sünasü maikhe mainou polaiwu baiwe.
“Chouloure nou püyu puhye panou chouloukhaio.”
Currently Selected:
LUK 14: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
