MATHIU 15
15
Puopaonou Doupeiyu Zhai
(Mk 7.1-13)
1Süthaisü Jerusalem hinou Phariseemai ea razhai dou-apeimai kamainou Jisu hi taveloua puh hinou noue, 2“Daidonou ne rozümaitao hai Eh puopaomai zhai zümoe? Daiolouzü puletao nou touyu kisü bahdzü teimoe!”
3Jisu nou puletao hi chila peie, “Neletao-a daidonou neletao puopao zhai donou Ramai chikha soukhowe? 4Daiolouzü Ramai nou chikha peie, ‘Nepfü nepuoye tsükhoulo,’ alia ‘Maitalinou puhpfü puhpuo chi paoshi louzü puhye sü southeawu vuzülai.’ 5Ana neletao nou paoe, ‘Maitalinou puh pfü moa puh puo hi, nenou Ahi nou soukha ngaoloure nahai Ramai hi popeire, tea paowu louzü, puhnou puh puoye tsükhoure matsü hare.’ 6Südonou, neletao vei puopao zhaina donou, neletao nou Ramai vei chikhahai sou poshu hako peiwure. 7Aveikho souyu maitaore! Isaiah nou neletao vanou rachi paopayuki daizhozhou züa paopa peisa:
8‘Mai haitaonou Eye puletao tai hinou tsü khoue,
ana puletao lehai Ahinou doushoa bue.
9Hakonou puletao nou Eye thowe,
daiolouzü puletao nou deiphao emai zhainou
Azhai soua doupeiwe!’ ”
Maiye Souzhaiyu Natao
(Mk 7.14-23)
10Süthaisü Jisu nou maisouye puh hi kuveloua puletao hi paoe, “Keilo ea sülo! 11Emai mühi louyu sünanou puhye souzhai peimoe, ana mü hinou payu sünanou puhye souzhai peiwe.”
12Süthaisü rozümai taonou puh hi taveloua paoe, “Nenou paoyu haina vanou Phariseemai taohai phi süloure touyu ne süsümoe?”
13Jisu nou chila peie, “Rakibu Apuonou shomoyu süübe tali sü maanoupu paipawulai. 14Puletaoye donou doso! Puletao hai nghichamai vei nghichayu süthai-apei maitaoe; alia nghichamai alinou nghichamai aliye süthai louzü, ahaikheinou raobvühi dulou bailai.”
15Ana Pitar nou puh hi paoe, “Eletao hi nada nasü paoshee ngaopeio.”
16Jisu nou puletao hi paoe, “Neletao-a chukoute-a sümohiwu? 17Neletao nou ngaomowu süolouzü mü hinou louyu talisü vuhi kouwe, alia sübüa pfüphao vakouhi tabaiwe. 18Ana mü hinou payu sünawo lekhe hinou pawe, alia hainanou maiye souzhai peiwe. 19Daiolouzü lekhe hinou tsü ashitao veloua sütaonou maiye southeayu, maipfü maipuoye sapayu, khulou souyu, vaoyu, amada zhopaoh souyu, alia maichi paoshiyu haitao povewe. 20Maiye souzhaiyu nataosü haitaoe. Ana bahdzü teimoa touyu sünawo maiye souzhai moe.”
Naotumai Alivei Lü
(Mk 7.24-30)
21Jisu nou buh sünasü thaowu-a Tair ea Sidon deizha hilo tare. 22Alia zhukhaio, teidei sühi buyu Kannania tamai naotumai alinou Jisu hi taveloua shusoua paoe, “David Nahpoutu, Oh Mapao, Eye zhuvea peio, Anah naotupai hai rashinou louloua veashoa bure.”
23Ana Jisu nou puh hi ha chila lia peimoe. Puh rozümai taonou puh hi veloua puh hinou khoa paoe, “Puhye seitawo! Daiolouzü puh nou shusou raoloua Eletao thaifüa laiwe!”
24Süthaisü Jisu nou chila peie, “Eye hai Israel kikhavei hawuyu zhaokhemai taohi likhei seivebaie.”
25Sühinou naotupainou takou puhphi hinou duloua paoe, “Mapao, Eye soukha peio!”
26Jisu nou chila peie, “Nahmai vei raokhao hai poloua süsü seitaohi polai peiyu zümoe.”
27Naotupainou chila peie, “Süsü chekhaoe, Mapao; ana seitao koutenou-a puletao paopumaitao vei arübuh hinou tourai kouyutao touwe.”
28Süthaisü Jisu nou puh hi chila peie, “Oh naotupai, nehai lü dushoyu naotumai alie! Nenou züpayu thaifüa süsü nehi souloutheo.” Alia sübü hinou puhnah paisü veiloure.
Jisu nou Mai taoliye Souvei Peiyu
29Alia Jisu nou buh süsü thaowu-a Galilee zaipelo vanou tare. Alia puhnou deichi ali vahi tapaloua sühinou kou buloure. 30Mai alaonou puh hi tave-e ea puletao nou phi chamai, shovaimai, nghichamai, la hamai ea kukhe sounoumai taoliye Jisu phihi save khaipeire, alia puhnou puletaoye souvei peire. 31Südonou la hamainou la phalouyu, shovai mainou veilouyu, phi chamainou talouyu, alia nghicha mainou ngaolouyu sütaohai maikhemai nou ngaolouyu kisü khupa loure; alia puletao nou Israelmai vei Ramaiye paoshore.
Jisu nou Mai Thedaiye Vaiyu
(Mk 8.1-10)
32Süthaisü Jisu nou puh rozümaitaoye puh hi kuveloua paoe, “Enou maisou haitaoye zhuveasho loure, daiolouzü puletao nou Eye koa teithe asü bukoure ea chuo halia toure hare; alia Enou puletaoye pouzüa seitayu sü züpa moe, daiolouzü puletao hai du hinou houshulai.”
33Rozümaitao nou puh hi noue, “Eletao nou radeikee haihinou daikinou ho maisou haitaoye vailou süyu raokhao ngaoloulai?”
34Jisu nou puletao hi noue, “Neletao hi raokhao pho kizho buwe?”
Puletao nou chila peie, “Raokhao pho anai ea khahtai daotu bue.”
35Südonou Jisu nou maisouye deiphi hinou kou chobu loure donou kharochi peire. 36Süthaisü puhnou raokhao pho anaitao ea khah taosü poloure ea Ramai hi kalo paowu-a sütaosü soukhore ea süthaisü rozümai taohi peire; alia rozümai taonou sütaosü maisouhi peire. 37Puletao hrülainou touloua pou phouloure; alia toushoyu koulih taohai rozümaitao nou tashu sülai anai phou pokodzü loure. 38Toulouyu puletao hrülai sü naotumai ea nahmaitaoye chothoumoa mai the adaie.
39Süthaisü Jisu nou maisouye seitawu-a puh sü sakhao alihi louloua Magadan teidei hilo tare.
Currently Selected:
MATHIU 15: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
