MATHIU 19
19
Jisu nou Chapfü Chaa Rayu vanou Doupeiyu
(Mk 10.1-12)
1Chuo Jisu nou chi haitaosü paocheyu kisü, puhnou Galilee hinou taloua Jordan rei polo dova Judea teidei hilo loutare. 2Alia mai alaonou puhthai füloure ea sühinou puhnou puletao sou souveipeie.
3Phariseemai kamainou puh hi taveloua puh mah phoupa loure donou puh hi noue, “Qo tali vanou mai linou puh chapfüye ralou veiyu razhai buwu?”
4Jisu nou chila peie, “Neletao nou sheeyu larübvü hinou phoumowu süolouzü shurai hinou emaiye soupeiyu Sou-apeio puhnou poutu ea naotuye soupeie. 5Alia Ramai nou paoe, ‘Qo haina vanou poutuna nou puh puo ea pfüye thaowu-a puh chapfü koa lou zholoulai, alia puhai sü vasouli soubailai.’ 6Südonou puh haisü ahai khaimore ana vasou ali baire. Südonou Ramai nou podzüpei khaitouyu nasü maiye panou soukhowu laimoe.”
7Phariseemai taonou puh hi noue, “Sütoulouzü daidonou Moses nou rayu vei aepei larüli puh chapfühi peiwu-a puhye vakouhi seita-a bailai tea chikha peiwe?”
8Jisu nou puletao hi chila peie, “Neletao le khouleyu vanou Moses nou neletao hi neletao chapfümaiye rayu hai aetou peibaie, ana shurai hiwo louzü sübümoe. 9Alia Enou neletao hi paowe, süolouzü maita linou puh chapfüye khulou souyu likhei vanou deinou kukheli vanou rawu louzü ea naotu kukhe aliye nalouzü mai chapfüye sapare.”
10Puh rozümai taonou puh hi paoe, “Sükuyu hai chaa ea puh chapfü kolehi buyu thaiwo sheemoyu nou veikou baire.”
11Ana Jisu nou puletao hi chila peie, “Doupeiyu haina hai mai hrülainou polou hoe, ana Ramai nou haina peikhai touyu puletao likhei bailai. 12Daiolouzü kamaihai puletao pfü pou hinou sübüa nakouyu vasou-damai bue, alia kamainou emainou souda peiyu vasou-damai bue, alia kamainou Raki Vedei donou lah paomainou vasou-damai soulouyu-a bue. Doupeiyu haina polou süyu puhye panou haina hai poloukhaio.”
Jisu nou Nahtu maitaoye Hapeiyu
(Mk 10.13-16; Lk 18.15-17)
13Süthaisü mai kamainou nahmaitaoye saloua Jisu ye panou puh bahnou puletao pei hi deiloua puletaoye veachi paopeire donou puh hi save, ana rozümaitao nou maikhe maiye züpeie. 14Ana Jisu nou paoe, “Nahmai taoye panou Ahi kouwo, alia puletaoye nuso, daiolouzü raki Vedeihai haibüyu maitao veie.”
15Alia puhnou puh bahnou puletao peiva deipeie ea süthaisü puh sü tare.
Haniyu Nahlepouna
(Mk 10.17-31; Lk 18.18-30)
16Alia zhukhaio, mailinou Jisu hi taveloua puh hinou noue, “Dou-apeio, teisa ahri ngaoloure donou Enou dai avei vah souvu zülai?”
17Alia Jisu nou puh hi chila peie, “Nenou daidonou Ahinou veiyu vanou nouwe? Veiyuhai mailikhei bubaie. Nenou ahri buh hi lounü louzü chikha taosü zülo.”
18Puhnou noue, “Chikha kataoe?”
Jisu nou chila peie, “Maiye southeaso, khulou souso, vaoso, mada-a chi lapeiso, 19nepuo nepfüye tsükhoulo, alia nelah neye leshiyu büa kinapaye leshilo.”
20Nahlemai pounanou puh hi chila peie, “Chikha haitao teitei Enou züloure; chu E dai chemoyu bue?”
21Jisu nou puh hi paoe, “Nenou liche nülouzü, tawo, alia nevei buyu veishi zholaiwu-a pousha nasü toure haimai hi peio, alia rakihi nevei kini buloulai; süthaisü taveloua Athai fülo.”
22Nahlepouna nou haisü chouloukhaie, puh sü leveasholoua tare; daiolouzü puh hai hani shoe.
Raki Vedei vanou Doupeiyu
23Süthaisü Jisu nou puh rozümai taohi paoe, “Enou neletao hi chekhaoa paoe, hanimaili donou raki Vedeihi velouyu hai tatei sholai. 24Enou neletao hi paopue, hanimai alinou Ramai Vedeihi veloure jüwo racho alinou pei kulu hi tailouyu sünanou tala hie.”
25Rozümai taonou chi haisü choulouyu kisü puletao sü khupa shouloua noue, “Sükuyu thaisü thaohmainou khailulou sülai?”
26Ana Jisu nou puletao hi zhuteiloua paoe, “Maiye donou haisü soulouhoe, ana Ramaiye donou louzü ha teitei hai soulou süe.”
27Süthaisü Pitar nou paoe, “Zhukhaio, Ehnou ha teitei thaowu-a nethai füloure. Süthaisü Ehnou dai ngaolai?”
28Jisu nou puletao hi paoe, “Enou neletao hi chechenou paoe, deiphao ashu nahi Mai Nahpoutu nou puh vei khouko ava vebuh hi bulouyu kisü, Athai fülouyu neletao-a Israel nahmai khü kiahaiye chiku-a vebuh kiahai hinou bulai. 29Alia Eye donou ki-lu moa tu-poumaitao moa pfüpuomai moa nahmaitao moa teidei thaoyu mai hrülainou zha kaihli kou-a ngaolai, alia teisa ahri ngaoloulai. 30Ana chu raikaiyu mai alaosou nakaita bailai, alia chu nakaiyu taonou raikai talai.
Currently Selected:
MATHIU 19: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
