MATHIU 24
24
Rathoki Souha laiyu vanou Jisu nou Raia Paoyu
(Mk 13.1-2; Lk 21.5-6)
1Jisu nou rathoki nasü thaowu-a tayu phakisü puh rozümai taonou puh hi takouloua rathoki vei kitaosü tengaoe. 2Ana puhnou puletao hi chila peie, “Neletao nou sütao teitei hai ngaokhaire. Chechenou Enou neletao hi paoe, haihi khaopho kou moanou alinou ali pei hi shoa buyu chuh alia khailaimoe.”
Kaoshiyu alia souvea souhoyu
(Mk 13.3-13; Lk 21.7-19)
3Alia Jisu nou Oliv deichi hi pa bulouyu kisü rozümai taonou kheia puh hi taveloua paoe, “Haitaohai duki palai, alia ne velaiyu shee ea akhai vei shee dainoulai? Eletao hi paopeio.”
4Alia Jisu nou puletao hi chila peie, “Maitaliye panou neletaoye lawu more donou leikeilo. 5Daiolouzü ‘E hai Khristae!’ tea paoa mai alaonou Azhih hinou velai ea mai alaoye puletao nou süthai mahwulai. 6Alia neletao nou ngheiki hinou reih pai ea adou kounou reihvei bvüroyu ko choulai; ana ngaopiso; daiolouzü sükuyu hai pavuzülai, ana sütaonou akhai mohie. 7Daiolouzü teidei alinou teidei ali pei hi, alia vedei alinou vedei ali pei hi reih soulai, alia buh lihkinou tokaalai ea nüsülai. 8Ana haitao teitei hai veahore shurai nasüe.
9“Süthaisü puletao nou neletaoye souvea souhore donou thoupeilai, alia neletaoye southealai; alia Azhih donou neletaoye tahrüh veishinou ngaoralai. 10Süthaisü mai alaonou kaodu talai, alia alinou liye shoh soulai ea ngaoralai. 11Alia dayu rachi paolamai alaosou palai ea maitaoliye süthai malai. 12Alia ashinou pusho tayu vanou, mai alaovei leshahai kaorou talai. 13Ana khai koute shamea louyu puhye sü khaipeilai. 14Alia Vedei vei ko avei haina hai tahrüh pfüphouhi zhopaoh soure donou deiphao teiteihi paodou talai; alia süthainou akhai nasü velai.
Adudulai Pihiyuna
(Mk 13.14-23; Lk 21.20-24)
15“Südonou neletao nou Daniel rachi paolawo nou paokhai touyu ha-kare souzhaiyu ngaora sünanou sheeyu buh hinou la-a buyu ngaoyu kisü (phoua buyu puhnou süloukhaio!) 16Judea hi buyu maitaosü deichi taohi tuvelo. 17Ki phaohi buyu nanou kikha hinou puh natao poloure donou takouso. 18Alia douhi buyu nanou puh sahba pore donou khaivewuso. 19Alia teithe sütaohi nah hrüpfüa buyu ea nahpu-a buyu pfümaitao donou daizhozhou ngaopisa! 20Neletao nou tare teile sü panou saiki moa Soteithezhou daomore donou veachi paolo. 21Daiolouzü teideiphao soushu rainou chu koute pakhai moyu moa thaikhai koutea pakhailai moyu adudulai pihiyu nasü ve daolai. 22Alia teithe sütaohai soujü peimo louzü, maili koutea khailulou hoe; ana dopa louyu puletaoye donou teithe sütaosü soujüwulai.
23“Süthaisü maitalinou neletao hi, ‘Zhukhaio, haihi Khrista bue!’ moa ‘Puh sühi bue!’ tea paokhaia puhye loucheso. 24Daiolouzü dayu Khrista ea madayu rachi paolamaitao palai, alia puletao nou dushoyu shee ea khupa vahtao soungaolai, sübüa soulou veilouzü dopa louyu maitaoye-a süthaimalai. 25Zhukhaio, Enou neletao hi raia paokhai peire.
26“Südonou, puletao nou neletao hi, ‘Zhukhaio, puh hai rekouhi bue,’ tea paokhaia, tahoso; moa puletao nou, ‘Zhukhaio puh hai kikhahi bue,’ tea paokhaia süsü loucheso. 27Daiolouzü teinghi palonou teipeiyu hai teinghi loulo koute va veyu kua, Mai Nahpoutu veyua sükulai.
28“Athai pfüphao buyu buh hisü, rasho peikitao-a vedzüa bulai.
Mai Nahpoutu nou Khaive Laiyu
(Mk 13.24-27; Lk 21.25-28)
29“Veahoyu teithe sütao thaibü hisü teinghi-a zhitalai, khou-a vakhai laimoe, alia teivuh tao-a ratei hinou dekoulai, alia rateihi buyu khouko teitei-a puletao vei buh hinou huta bailai. 30Süthaisü ratei hinou Mai Nahpoutu vere shee nasü ngaolai, alia süthaisü deiphao hi Tahrüh khemai hrülainou khao khoulai, alia puletao nou Mai Nahpoutu nou khouko ea dushoyu khouko-ava nou pu raki teihao peinou taveyu sü ngaolai. 31Alia puhnou puhvei rakivamai taoye paiku shoa houyu be khonou pua seivelai, alia puletao nou puhnou dopa louyu maitaoye rateiva akhai polo dova hinou akhai polo koute, deiphao kaihoung dai hinou pove dzülai.
Doushibe hinou Sülouyu Shee
(Mk 13.28-31; Lk 21.29-33)
32“Doushibe hinou puhvei nada nasü doulouwo. Puhvei botaonou ngupaloua sünghoutao lapayu kisü neletao nou hou ngheire touyu sülouwe. 33Süzhaibüa, neletao nou shee haitao teitei ngaolouyu kisü puh hai romühi kou ngheiteire touyu neletao nou sülo. 34Chechenou Enou neletao hi paowe, haitao veishi pamo koutesü maikha haina hai hata laimoe. 35Raki ea deiphao hatalai, ana Achipaotao louzü halaimoe.
Maitalia Teithe ea Pha nasü Sümoe
(Mk 13.32-37; Lk 17.26-30,34-36)
36“Ana teithe süna ea pha sünasü Puo likheiwo deinou rakihi rakivamai moa Nahpoutu koutenoua sümoe. 37Noha teileki payu büa Mai Nahpoutu nou veyu-a sübülai. 38Daiolouzü dzüdu vemojü teithetao hi, Noha nou dzüpei luki nahi talou loumo teithe koutesü puletaosü toua, shoa ea sheenghia bubaie; 39alia dzüdu sünanou veloua puletao hrülaiye dupoa tamosa sü puletao nou süloumoyu büa Mai Nahpoutu nou veyua sübülai. 40Sükisü dou hinou mai ahai bulai: aliye poloulai ea aliye thaowulai. 41Naotumai ahai thoupa hinou thou shaolai: aliye poloulai ea aliye thaowulai.
42“Südonou, zhaihe-a kholo, daiolouzü neletao nou neletao Mapao hai duki velaisa touyu sümoe. 43Ana haihai sülo, süolouzü ki paopu nanou khei kapha hinou vaoyumai nasü velai touyu hai süyukowo, puhnou kholoua puh kihai panou hrakhaolou laimoe. 44Südonou neletao souda vuzülai, daiolouzü neletao nou halia chomoyu phahinou Mai Nahpoutu sü velai.
Acheche moa Cheche moyu Kilai vei Nada
(Lk 12.41-48)
45“Sükuyu thaisü, teile kao avei hinou puletao hi puletao vei touso peire donou puh vei paopu nou puhye panou puh kikhamai hrülai pei hi khoyu louchelou veiyu ea tsü veishoyu kilaihai thaohwe? 46Puhvei paopuwo nou khaiveyu ki sübüa soua ngaolouyu kilai sünasü rakoveie. 47Chechenou Enou neletao hi paowe, puhnou puhye panou puhvei buyu kina teitei pei hi kholai. 48Ana puhnou kilai shili soua lahnou, ‘Apaopu hai velai mohie,’ tea paoa 49alia puh sa kilaimaitaoye tai-dashuloua ea zhaohsho zhiyu maitaoye koa toushoa bulouzü, 50kilai sünanou zhimoyu teithe ea puhnou sümoyu pha hinou puhvei paopuwo nasü velai. 51Alia puhye tudee peilai ea aveikho soumai taoye koa pokhaiwulai; sühinou puhsü kralai ea puh huhsü veikükülai.
Currently Selected:
MATHIU 24: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
