MIKAH 3
3
Israel Maivei Süthai-apei Maitaoye Mikah nou Paoshi Peiyu
1Israel maiye süthai-apei maitao, haisü keilo! Neletao hai kaozü vah soure donou tsüchoyu pha-e, 2ana neletao hai vah aveih nasü ngaora loure ae ashi nasü leshi loure. Neletao nou avei maitaoye sü hria hee sü tolao peiwure ae puletao souke sü rao hinou paikhao papeire. 3Neletao nou avei maitaoye sü touloure. Neletao nou puletao vei hee sü laolaiwure, rao khesü dasha peiwure, ae sou ali lee hi thou khotoure büa daosasa peiwure. 4Neletao nou Mapao hi kra khoyu teile sü velaire, ana puhnou neletaoye chila peilai moe. Puhnou neletao vei veachi sü keipeilai moe, daiolouzü neletao nou vah ashi sü soure.
5Avei maitao ye sü rachipaolayu maitao nou süthai mah peiwure, puletaoye pei-zhiyu mai hisü kaonayu hai paopeiwe, ana sübüa soupei moyu mai hisü soureih velaire tea paopi peiwe. Sübüyu rachipaola maitao hisü Mapao nou haibüa paowe, 6“Rachipaola-apei maitaore, neletao vei teile sü chelaire; neletaoye donou teinghei louta laire. Daiolouzü neletao nou avei maitaoye sü süthaimah peiwure, neletaoye panou zho ngaopulai more, ae vepare khesü neletao nou paopu peilouho laire.” 7Haithai naki donou vepare paoyu maisü hraongu ngaolai. Puletao mai hrülai nou lahkuku vei mü sü hopfüa bailai, daiolouzü Ramai nou puletao vei chila sü peimore.
8Ana Eye donou louzü, Mapao nou puhvei rako ae khouko sü peie, ae kaozü tsü nasü ahi peie alia Israel maitao hi puletao vei mah khesü paolouyu khuvei nahai ahi peie. 9Enou paoyu keilo, Israel maiye süthai-apei maitaore, kaozü naye ngaorayu maitao alia acheche nasü porei laiyu maitaore. 10Neletao nou Ramai vei Nuhdu, Jerusalem vei beikhei nasü maiye dathayu ae kaozü moyu sünou poa soushure. 11Nuhdu vei peikho maitao nou seihla toua khore, napao maitao nou Chikha sü shi-zho peia paolapa poa baire, rachipaolayu maitao sünou pousha donou pao-a bure — ae puletao mai hrülai sü Mapao nou puletaoye kozho peiwe tea khaloure. Puletao nou paoe, “Kaozhou ashi sü velai moe, Mapao nou puletaoye koa bue.”
12Südonou, neletao vanou Zion sü dou ali büa tatatou laire, Jerusalem sü soushi khaiwulai, ae Rathoki sü vaohro vitawulai.
Currently Selected:
MIKAH 3: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.