MAIPEI PHOUYU 21
21
Kanaan Mai jünou Reih Kolouyu
1Kanaan maivei teidei khelova nou buyu Kanaan mai veo Arad nou Israel mai hai Atharim vei ludu valonou laireshe touyu ko choulou khaie, puhnou Israel maiye reih soure ae kamai-a puhnou nüloure. 2Süthaisü Israel mainou Mapao hi haibüa chaachou soue, “Nenou Etaoye panou mai haitao jünou reih veiloure touyu thaio, Etao nou sousheeloua puletao mai hrülai ae puletao vei nuhdu khesü ne hi posheela peilai, ae puletaoye souha khaitou peilai.” 3Mapao nou Israel maivei akho nasü keipeie, ae puletaoye soukha peia panou Kanaan maitao jünou reih koloue. Südonou Israel mainou Kanaan mai ae puletao vei nuhdu khesü souha khaitou peire ae buh sünasü Hamah (Soukanghi peiyu) tea zhih sapeie.
Baosahu nou Houng Soupeiyu
4Israel mainou Hor Deichi thaowua Edom maivei teidei tasühaore donou Zai Ho hilova tayu ludu hinou tare. Ana ludu ta-a bukinou maikhe mai hai shamealou hore. 5Ae puletao nou Ramai hi alia Moses hisü haibüa raore, “Daisounou Etaoye Ejipt hinou sapa touso ae dzü lia hayu radeiki hai hinou southalai touwe. Habüa nou tou shiyu touso hai Etao nou touthou louhore!” 6Süthaisü Mapao nou tushi shoyu houng hai maikhe mai hi seive peia panou Israel mai taoli hai daopeiwure, ae maitaoli hai thaire. 7Maikhe mai nou Moses hi ve paoe, “Etao nou Mapao pei hi ae ne hi raoyu hai mahwure. Zhuvea nou Mapao hi veachi paopeia houng sü polai peio.” Südonou Moses nou maikhe mai ye donou veachi paopeie. 8Süthaisü Mapao nou Moses hi paoe, “Baosahu nou heung ali soulo ae sünasü süüpo ali pei hi popa khaipeio. Heung nou daopeiyu maitalia houng sünaye sü zhulouyu mai hai vei loulai.” 9Südonou Moses nou baosahu nou houng ali souloua süüpo pei hi popa khaipeie. Maitalinoua heung nou daopei khaitoua buyu maisü houng haina hai zhulouyu maisü vei loulai.
Hor Deichi hinou Moab Maivei Deikho hi Veyu
10Israel mainou tapoa nou ve Oboth touyu buh hinou fühao soua bure. 11Süthaisü puletao nou buh sünasü thaokhaiwua Moab maivei teidei, teinghei palova buyu Abiramye soukanghi peiyu buh hinou fühao souloure. 12Süthaisü puletao nou Zered deikho hinou ve bue. 13Puletao nou buh sühi sünou tapoa reilova khe Amor maivei radeiki hilova Arnon rei hinou fühao soua bue. (Arnon hai Moab mai ae Amor maivei deirai hinou bue.) 14Hai vanou “Mapao vei Soureih Larübvü” hinou haibüa paoe, “Suphah ae deikho hi buyu Waheb nuhdu; Arnon Rei, 15ae Ar nuhdu hi koute, dei shaophouphou poa nou deikho hi louyu hinou Moab maivei deirai hi koute-e.”
16Buh sühinou puletao nou tapoa Beer Dzükhao hisü ve bue. Sühinou Mapao nou Moses hi paoe, “Maikhe maiye kuve jülo, Enou puletaoye sü dzü peilai.” 17Süteile hi Israel mainou lou haina hai soue:
“Dzükhaotao, dzü sü küpa peikhaio;
Etao nou neye sü lou soua sülai —
18Veo nahpoutu maitao nou heyu dzükhao
ae süthai-apei maitao nou heyu dzükhao,
Veo vei süpo nou ae puletao vei süpo nou hekhai touyu dzükhao.”
Puletao nou buh sühinou tapoa Mattanah hi veloue, 19ae buh sühinou puletao nou Nahaliel hisü ve-e, ae Nahaliel hinou Bamoth hisü ve-e, 20ae Bamoth hinou tapoa Moab maivei deikho, Pisgah deichi peitaoh hinou zhilou ngaoyu deikho hisü bue.
Veo Sihon ae Og jünou Reih Veilouyu
(Paod 2.26—3.11)
21Süthaisü Israel mainou Amor maivei veo Sihon hisü haibüa ko paota-e, 22“Etaoye panou nevei teidei hinou tacho palo, Etao nou ae Eletao vei kikhaorüye panou duva hisü bua bailai, neletao vei dou hi ae kipei hisü panou loulai moe, ae Etao nou neletao vei dzükhao hinou dzü sü kelai moe; Etao nou nevei teidei sü tala loumo koute hai luduva hinou bua bailai.” 23Ana Sihon nou Israel maiye sü panou puhvei teidei hinou tacho bare. Puhnou reihmai saloua Israel maiye reih soure donou Jahaz radeiki hisü tare. 24Ana Israel mainou ngaobayu maitaoye reihbu hinou taoli hai southawure ae puletao vei teidei sü Arnon hinou Amon maivei deirai Jabbok hi khete hai poloure, ana Amon maivei deirai hi khete poloua baire, daiolouzü puletao vei teidei hai veisho-a nou kaopo pohao khailoure. 25Israel mainou Amor maivei nuhdu teitei sü poloure ae Heshbon alia süpehao hinou buyu nuhdutao-a poloure ae sühinou füsho loure. 26Heshbon hai Amor maivei veo Sihon vei nuhdupao nasüe, puhnou Moab maivei veo araina hinou reih soua poloue ae puletao vei teidei hai Arnon Rei hi khete puhnou shaoloue. 27Südonou lou dayu mainou haibüa dapei khaitoue:
“Veo Sihon vei nuhdu Heshbon hisü tavelo!
Etao nou nuhdu hai nasü soushu dakhai louyu sü zhunüwe.
28Vuli Heshbon nuhdu hinou
Sihon vei soureih maitao hai mei taopoa tayu büa ta-e;
Sünasü nou Moab maivei Ar nuhdu nasü soukanghi peiwure,
ae Arnon vei deichi pei hi khete hai deihawure.
29Moab maitaore, neletao hai daizhou koute veasarou!
Oh Khemosh rahye thoyu maitaore,
neletao taihinou chere!
Neletao vei ramai nou puhvei maitaoye sü panou porarou-a tare,
ae naotumaitao hai Amor maivei veo nou nüpoa tare.
30Ana chuo puletao vei tyaosholea maitaoye sü souhawure,
Heshbon hinou Dibon hi koute,
Nashim hinou Medeba nghia buyu Nophah hi koute hai soushi souhawure.”#21.30 Phoure 30 haina Hebrew hinou sheesha timoe.
31Israel mainou Amor maivei teidei hinou füsho loure, 32ae Moses nou Jazer nuhdu hi reih huloure donou veikayu ludu nasü zhuta khaio tea maiye seita-e. Israel mainou nuhdu sünasü poloure ae süpehao hinou buyu nuhdutao alia sühinou hrüyu Amor maiye sü hutawure.
33Süthaisü Israel maitao nou Bashan vei ludu hinou dakhai tare, ae Bashan hi Veo Og nou puhvei reihmai saloua Israel maiye Edrei hinou soureih soue. 34Mapao nou Moses hi paoe, “Puletaoye ngaopiso, Enou neletaoye veilouyu sü peilai alia puhvei maitao ae puhvei teidei sü neletao hi peilai. Neletao nou Amor mai Veo Sihon hi Heshbon hinou soupeiyu büa puh hia soupeio.” 35Südonou Israel mainou Og veo, puhvei nahmaitao, ae puhvei mai hrülai hai southakhai toure, sübüa mailia hria phapei moe ae puletao vei teidei hai Israel mainou poloure.
Currently Selected:
MAIPEI PHOUYU 21: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.