MAIPEI PHOUYU 36
36
Nghitayu Naotumai nou Ngaore Kikaa
1Josef nahpoutu Manasseh nahpoutu Makhir nahpoutu Gilead vei pfümounah hi tsümaitao nou Moses hi ae Israel maiye süthai-apei maitao hi veloua 2nou haibüa paoe, “Mapao nou teidei hai Israel maitao hi rako pozhuloua dadezhi peio tea kharochi peie, ae Puhnou ne hia Zelophedad vei teidei hai puhvei nah naotu maitao hi peio tea kharochi hai peie. 3Ana puletao nou khü kukhe mai hi veta louzü, puletao vei füdei khesü khü süna vei soutawulai, ae Etao hi peikhai touyu füdei sü hatawulai. 4Podakhai louyu vei Po veyu phaki füdei zhotou zhoso khaitouyu khesü paopu hi dakhai peiyu phaki, Zelophehad nah naotumaitao vei füdeitao hai dakhai peilai moe, sütao hai puletao nou vetayu khü navei teisa nou soua bailai.”
5Südonou Moses nou Israel maitao hi Mapao vei kharochi haitao sü peie. Puhnou paoe, “Manasseh khü nou paoyu sü kao-e, 6ae Mapao nou Zelophehad nah naotu maitao donou haibüa paowe, süolouzü puletao nou venüyu mai tarali ki hia ve-a bailai, ana lah puletao vei khü hi ve-a bailai. 7Israel maivei füdeitao hai lahkuku vei khü hi panou bukoute-a bailai. 8naotumai taralia puopaoh maivei kikaa thaoyu mai hai lah puhvei khü hi nghive-a bailai, sübüa lahkuku khü vei füdei hai bua bailai, 9puopaoh maivei füdeitao sü panou mai kukhe vei khü hi talai moe. Khükhü hi peikhai touyu füdei hai lahkuku vei khü hi panou bua bailai.”
10-11Südonou Zelophehad nahnaotu maitao: Mahlah, Tirzah, Hoglah, Milkah, ae Noha puletao nou Mapao nou Moses hi kharochi peiyu büa lah puletao vei khü hi nghive-a baie. 12Puletao hai lah Manasseh vei khü hi ve-a baie, ae puletao vei füdei hai lah puletao vei khü hi bua baie.
13Jeriko pah hi buyu Jordan rei alilo vatha buyu Moab maivei deikho hinou Mapao nou Moses hi zhai haitao hai panou Israel maiye tare donou puletao hi peie.
Currently Selected:
MAIPEI PHOUYU 36: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.