MAIPEI PHOUYU 9
9
Tachopa louyu Khonüh Ahai Chena
1Israel mainou Ejipt thaowua tayu po ahai vei khouh ngaorai vei khoukha arai zhou hai Mapao nou Sinai radeiki hinou Moses hi haibüa paoe, 2-3“Israel maiye panou paopeiyu zhaitao thaifüa khouh haina vei khoukha kiadai zhou koukhe nou Tachopa Nüh hai nütalai.” 4Südonou Moses nou Israel maiye Tachopa Nüh hai nülo tea paopeie, 5ae khouh arai vei khoukha kiadai zhou koukhe puletao nou Sinai radeiki hinou Tachopa Nüh hai nüe. Mapao nou Moses hi kharochi peiyu bütoua puletao nou soupeie.
6Ana kamai-a thaiphao deiyu donou puletao hai sheemore, südonou süzhou hai puletao nou Tachopa Nüh hai nülou more. Puletao nou Moses ae Aaron hi 7veloua haibüa paoe, “Etao nou sheemoyu hai thaiphao deiyu donou baie, daisounou Etaoye panou Israel mai kukheye sa-a Mapao hi Tachopa Nüh vei posheela panou posheela peilai moe touwe?”
8Moses nou chila peie, “Mapao nou neletaoye donou ahi daitea paolaisa khoraio.”
9-10 Mapao nou Israel maitao hi haibüa paopeio tea Moses hi paoe, “Neletao mai talinoua thaiphao deiwua sheemore, moa veidou veita-a buyuma Tachopa Nüh nünüa bulouzü, 11khouh ahai navei khoukha kiadai zhou sü neletao nou nüh nüa bailai, neletao nou kheih thoumoyu raokhao ae khayu pou nou toua nüh nülai. 12Neletao nou touso hai panou thainesho shona koute hai bukoulai moe, ae hrikhaona rao ali koute-a soucha laimoe. Tachopa Nüh hai paopeikhai touyu zhai thaifüa nülo. 13Ana naanou hinou shee-a buyu mai talinou moa veidou veimoa buyu mai talinou Tachopa Nüh hai reilou more toulouzü, puhye sü avei mai soua popu peikhailai moe, daiolouzü puhnou paokhai touyu teile hinou Eye posheela khesü pove peilou more. Puh sü lah puhvei mah donou veahoyu sü ngaolai.
14“Neletao hrohinou buyu vakou mai ali nou Tachopa Nüh hai nülai toulouzü, paopeikhai touyu zhaitao thaifüa nou nülai, vakou mai hi-a ae lah buh mai hia raibütoua bailai.”
Mei vei Teihao
(Tap 40.37-38)
15-16 Mapao nou buyu Sahpao nahai souche louyu teithe hinou teihao nou kou Sahpao nasü chaohao loure. Khei teile hi teihao nasü mei büa ngaowe. 17Teihao nanou Sahpao thaokhaiwua tayu chüsü Israel maitao nou puletao vei fühao hai hraloua teihao nou taho chaoyu buh hinou fühao sü soua bue. 18Mapao vei kharochi thaifüa Israel mainou puletao vei fühao hai hralouwe, ae Mapao vei kharochi thaifüa Israel mainou puletao vei fühao hai haoloua buwe. Teihao nanou Sahpao pei hi bubusasü puletao nou fühao sühinou chao-a nou bue. 19Teihao nanou teile taoli hai Sahpao pei hinou buyuma puletao nou Mapao vei chi züa füsho tamoe. 20Chachakia teihao nahai Sahpao pei hi teile daotu likhei bua beiwe; hatarali souyuma puletao nou Mapao chi züa fühao hinou buwe moyuma füsho ta-a baiwe. 21Chachakia teihao nahai Sahpao pei hi teithe ali khei bua baiwe ae teihao nou takhai-e puletao nou fühao hai buh data-a baiwe. Teihao nou tayu chüsü puletao hai ta-a baiwe. 22Teithe ahai moa khouh ali moa po ali moyuma süjünou la-a nou teihao nanou Sahpao pei hi bubusasü Israel mainou fühao hisü bua baiwe, ana teihao nanou takhai-e puletao hai ta-a baiwe. 23Mapao nou Moses hi kharochi peiyu thaifüa puletao nou paochi züa puletao vei fühao haoloua chaowe ae fühao hraloua ta-a baiwe.
Currently Selected:
MAIPEI PHOUYU 9: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.