OBADIAH 1
1
1Obadiah nou zho ngaoyu — Ramai Mapao nou Edom maiye donou paoyu chipao.
Mapao nou Edom Maiye Tudeere
Etao nou Mapao hinou veyu ko choue,
alia tyahrütao hrohinou ko polamai ali seive peire:
“Soudalo! Etao nou Edom mai hisü reih huloulai!”
2 Mapao nou Edom mai hi paoe,
“Enou neye tyahrütao hrohinou taikayuna soupeilai;
neye mai hrülai nou ngaora sholai.
3Nevei khaophu souyu sünou neye laluwure.
Chulya kohinou hrüyu neletao;
kushoyu buh hinou hrübuyu neletao,
neletao hai lah neletao hi haibüa paowe,
‘Thaonou Eye nayu deiphi hi pokoulai?’
4Nenou lüche büa kushoa zhaoyuma,
teivutao hrohinou ne phe pa soua buyuma,
sühinoua Enou neye ponakou khaiwulai.
5“Avao mainou ne ki hi khei nou dakhao louyu phaki,
neye kabüa soushi peiwe;
puletao nou jüpayu na likhei vaolou baimowu?
Darkhashi haiyu mainou ne hi veyuki,
puletao nou daotu haisho peimowu?
6Esau vei tyaonah maitaore,
neletao vei nangi khesü mainou shaopoa takhai toure!
7Neye louzho-a vah souyu maitao nou neye lawure;
Puletao nou neye sü deirai hilo huve khaiwure.
Nevei samaitao nou ne jünou veiloure;
Ne raokhao toulai mainou neye rüh southou peiwure,
sünasü mailinoua sükulou hore.”
8 Mapao nou paoe, “Enou Edom maiye tudeeyu teithe hisü,
Enou puletao vei tsüvei maitaoye souhawulai alia puletao vei tsüsüyu mai hrülaiye souhawulai.
9Oh Teman, nevei reih maitao sü soupho rarouwulai,
sübüa panou Esau vei deichi hi buyu mai hrülaiye sü southawulai.
Edom Maiye Souveare Qotao
10“Daiolouzü ne thaihou soua buyu Jakob ye sü neletao nou taida peia ae southa peiyu vanou neletao sü hraongu ngaolai ae neye teisa nou souhawulai.
11Ngaobamaitao nou puletao vei rokhubomü dakhao poa louyu phaki,
neletao nou süzhou teithe khaophu soua süpe hinou la-a bubaie.
Shetumaitao nou Jerusalem vei chingi shaoloua zhilouyu maitao bütoua neletao-a maishi soure.
12Ana ne thaihou nou rakoshi daoyu phaki puhye zhojüyu phamoe;
Judah mainou hakatayu phaki, neletao nou asayu phamoe,
Puletao nou veahoyu vedaoyu phaki, neletao khaophu souyu phamoe.
13Amaitao nou veahoyu phaki,
neletao nou puletao vei rokhubomü khevai louyu phamoe,
Judah mainou kaozhou ashi vedaoyu phaki,
puhnou veaho shoyu hi neletao nou vasho-a zhuyu phamoe,
puhnou kaozhou ashi daoyu phaki, neletao nou puhvei na khesü shaolouyu kaomoe.
14Tutayu Judah maitaoye southare donou neletao nou luducho kinou dayu phamoe;
Kaoshiyu teile ki hria tuta louyu puletaoye neletao nou nüloua ngaobamai hi peiyu phamoe.
Ramai nou Tyahrütao Pei hi Chikure
15“Mapao nou tyahrütao pei hi chikure teile sü nghire.
Nenou souyu büa ne hia soupeilai;
nenou soukhai touyu vahtao sü ne hi dakhai peilai.
16Daiolouzü sheeyu Avei Deichi hinou avei maitao nou tudeeyu vei chapai hinou khataoyu keyu büa tyahrü hrülai nou kelai,
alia raiki ke khaimoyu büa puletao nou kelai ae ke shishoa nou kelai.
Israel mainou Veilouyu
17“Ana tupa louyu maitao sü Zion Deichi hinou bulai,
ae sühisü sheeyu buh soulai;
alia Jakob kikhamai nou puletao buh sü poloulai.
18Jakob ae Josef vei kikhamai hai mei ali bülai,
ana Esau kikhamai louzü raovoumü büa bailai,
puletao nou Esau maitaoye sü deihawulai ae souhawulai.
Esau kikhamaiye panou tyaosholea lia bulai moe.
Haisü Mapao Enou paoe.
19“Negeb hi buyu maitao nou Esau vei deichi poloulai,
alia Shephelah mainou Philistin maivei teidei sü poloulai;
puletao nou Ephraim teidei ae Samaria teidei poloulai,
alia Benjamin mainou Gilead teidei hai poloulai.
20Halah hi nüpoho khaitouyu Israel maitao nou Phoenikia hinou poa Zarephath koute poloulai;
Sepharad hi nüpoho khaitouyu Jerusalem maitao nou Negeb nuhdu taosü poloulai.
21Ramai nou vupa peiyu maitao nou Esau deichi nasü tukhasa-a hrüre donou Zion deichi hi velai;
alia vedei sü Mapao vei soulai.”
Currently Selected:
OBADIAH 1: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.