ZEKHARIAH 2
2
Zho Ngaoyu Asüna: Douyu Rai
1Enou zhushuyu phaki, mai ali hai puh bah hinou douyu rai ali poa ngaoe. 2“Ne daiki velai?” tea Enou noue.
Puhnou ahi chila peie, “Jerusalem vei duyu ae shoyu hai kazhou busa touyu dou zhulai.”
3Süthaisü Eye cha-a buyu rakivamai nanou pahilo takouyu Enou ngaoe, alia rakivamai kukhe ali hai puhye daore donou takou loua, 4alia puh hisü haibüa paoe, “Tukou douyu rai poa buyu nahlepuna hisü haibüa paopeio: Jerusalem hai kivo khopu moa nou hrüa bailai, daiolouzü haihi mai alao sou hrüvelai ae kikhaorü hai-a poushoa hrüpalai. 5Süpehao teitei hisü Enou mei kivo soupeilai, tea Mapao nou paoe, alia Enou sühisü aduso nasoua hrülai.”
Vakou Nüpota-a Buyu Maitaoye Ki hi Dakhai Velo teanou Kuyu
6 Mapao nou puh maitao hisü paoe, “Tave lourao, tave lourao, Babilon hinou tupa lourao; daiolouzü Enou neletaoye sü deiphao kainghou adai hisü hupo rarou laipeiwure. 7Babilon nah naotumai ye koa hrüa buyu maitao, Zion hi tuve lourao. 8Khoukhoulai Mapao nou neletaoye souveayu tyahrütao ye donou haibüa paoe: Mai tara linoua neletaoye souveayu hai Eye souveayu büa baie. 9Südonou chuo, Enou puletaoye sü dutalai, alia puletao hai lah puletao vei kilai mai khenou hrü talai.”
Süthai neletao nou Eye Khoukhoulai Mapao nou seive-e touyu hai süloulai.
10 Mapao nou paoe, “Asayu lou sü soukhaio, Oh Jerusalem hi maitaore! E-a neletaoye koa hrüre donou laire.”
11Süzhou teithe tyahrü taolinou Mapao hisü velai alia puhvei mai soutalai, alia puh hai-a neletao hrohinou bulai. Süthaisü Khoukhoulai Mapao nou Eye neletao hi seivewe touyu hai neletao nou süloulai. 12Mapao nou Judah hai puhvei sheeyu teidei ali soua popu loulai alia Jerusalem hai puhnou leshi kayu nuhdu ali soua dopu loulai.
13Mai hrülai nou Mapao nghoujü hi nasha-a bulo; daiolouzü puhvei sheeyu buh hinou puh hai tashure.
Currently Selected:
ZEKHARIAH 2: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
