KAHBHAO 23
23
Sarah Dipü hatü Mahng Vüpü
1Sarah bong 127 nyu; hapayü Sarahlei yangnyu den nyu. 2Pinnyü Kanan kahdok Hebronei di, hatü Sarahlei mahng kü Abraham thepeiyoung.
3Abrahami chenyühalei mahng touei uoshi nyupü yaongei Hit am kü, 4“Ngeiyü benha hatü yenpa hük am mü nyunyüpeih. Ngei mahng vühen shingvaishi mahngchong vaihen kahdok maani yushih” shei e. 5Hit ami Abraham kü, 6“Longpüba, hami epü banghümao; jenphong khongkü nüngü wong kohpü ongpa khih. Hamei mahngchong peü mü meipübalei mahng vütuh. Nüngi mahng vühen shingvaishi üpaiyao tah shei ne-ephapih” shei e.
7Abrahami yaongei hapa kahdok kü nyupü Hit am touei aümei sha. 8Büpai jomphong kü, “Ammi ngei kü mahng nyemvü shei deihjema, ngei epü bangkütuh, hatü ngelei men kü ammiyao Zoharlei cheha Ephron kü, 9büpalei Makhpelah yaongdung nyemyuphanüng etükütuh; hapayü büpalei kah philei nyüke. Am nyushi-üng büpai ngei kü mahngchong vaihen lop shuohhen nyemyupha” shei e.
10Hit am mü Ephronao uoshi nyu, hatü büpai chingnyü penyüsha touei peiyei nyupü Hit am peüi danshi Abraham kü hapakei jangei e. 11“Longpüba, bangtuh.” “Ngei nüng kü kah hatü halei nyupü yaongdung shuohnyeih; hamei shennyakthü nyushi ngei nüng kü ha shuohnyeih; nüngi halei mahng vühahtuh” shei e. 12Hahepak kü Abrahami kahmükei nyupü nanglakthü touei aümei sha. 13Büpai kahmük kübü nanglakthüi danshi Ephron kü, “Nüngi ngei epü bangkütuh! Ngei nüng kü hapa kahdokei bhei shuohshah, nüngi ha yahtuh; shejüang halei ngei mahng vühen” shei e. 14Ephroni Abraham kü, 15“Oh longpüba, bangtuh, ngin kho ali mon shangpü kahdok kü ji aa kü henüngü mehe etei-henang? Hei-üng mahng vütuh” shei e. 16Ephroni epü kü Abrahami mongteke, hatü shennyakthüi danshi Ephroni epü shük ngin kho ali hahepak kü shuohteipü vanglem aimü Abrahami shuoh.
17Hanangkü Makhpelahlei nyupü Ephronei kah, Mamre heong philei nyupü hatü haleipü yaongdung, püthü viong mongei nyupü peü, 18Abrahamei kahmoi leidai. Hapa chingnyü penyüsha touei shahthai kü peipü Hit am peüi hapayü Abrahamei kah shei nyingteke. 19Hapheikü Abrahami Makhpelah kah leipü yaongdungei Kanan kahdok leipü Mamre (Hebron) philei meeshi Sarahlei mahng vü. 20Hapa kah hatü yaongdungü Hit amei lak leipü Abrahami shakei büpalei mahngchong leidai.
Currently Selected:
KAHBHAO 23: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
