KAHBHAO 28
28
1Hapheikü Isaki Jakob kü nyükei büpa kü moihimantü büpa kü, “Nüng Kanan am nyüha hük mao shem teyem. 2Nüngi Paddan-Aramei#Paddan-aram kü, “Mesopotamia” sheiyao eehen. anyülei chepa, ambü Bethuel amei heihtuh, hatü angko Labanei yiükha hük yahtuh. 3“Jeiyong Kahvangi nüng kü moihimanhen, nanglak longi dahühen, hatü nanglak khongnyü longpü leihühen. 4Büpai nüng hatü nüngei hühiha kü Abrahamei moihiman shuohhen; nüngi shaang benha vaishi nyupü Abraham kü Kahvangi shuohpü ha kahdok nüngei vailanghen” shei e. 5Hapheikü Isaki Jakob shom, hatü büpa Paddan-Aramei Aram am Bethuelei cheha Laban, Jakob hi Esau nyilei chenyü Rebekahlei chejei touei heih.
Esau-i Ishmaelei Yiükha Yahpü
6Shaang Isaki Jakob kü moihimantü Paddan-Aramei nyüha yahnüng shomtükteke shei Esau-i dan, hatü shao Isaki büpa kü moihimantü Kanan am yiük teyah shei büpa kü eshuohpü dan. 7Jakobi chenyü chepa nyilei shah bangei Paddan-Aramei heihdaipü dan. 8Hanangkü mechem Esau-i Kanan am yiük yahhen chepa Isaki nemongnyu shei nyingpa, 9Esau-i daiyei Abrahamei cheha Ishmaelei yiükha Nebaiothlei chenaü Mahalath sheleipü nyühathü kü üei yahteke.
Jakobi Bethelei Mangh Manghpü
10Jakobi Beer-sheba tuhtü Haranei layaongei dai. 11Büpa shing hük ngoiyei nyakdaipü nangkü hatouei paüm. Hatoueipü yaong hük yah-ei büpai ha shangjing kü letü shihen lemteke. 12Büpai kahdok kübü vangsho thahshi thai chantü ha kü vangsho phongshanthü phungei aong, shüh-ei shaei mangh mü eeteke. 13Hatoumü Shembüpai büpa touei yaongtü, “Ngeiyü Shembüpa, ambü Abrahamei Kahvang, hatü Isak Kahvang; nüng lempü kahdokü ngei nüng hatü nüngei lihilathü kü shuohhen; 14hatü nüngei lihilathü molo bhihhiphang kei nyuhen, hatü jomphongü heong heshü apsha pehe peü lemei daei daihen, hatü nüng hatü nüngei lihila homei kahdoknyü nanglak peü moihimanhen. 15Ngei nüng mü nyuhen, hatü nüng melei daihen, ngei nüng yomhen, hatü ngei hapa kahdokei nüng müei leihen. Ngei nüng kü lahpü mangdük thahshi ngei nüng netuhphongpih” shei e.
16Mechem Jakob shipü kübü paopa, büpai, “Hingmei, Shembüpayü hapa shingei nyüke, hatü ngei ha nenyingi nyupü khih” shei deih. 17Büpai nyemei, “Hapa shing meshük nyempüang! Hapayü lebü nevai Kahvangei shem khih; hapayü vangsho shaden khih” shei e.
18Nepphei lomi Jakobi büpai shangjing lepü yaong yah-ei shemnyü kei haongtü ha shangkü mainga langteke. 19Hapa chingnyü kü Luz shei menlangmao büpai hapa shing kü Bethel#Bethel lappü, “Kahvangei shem” shei epü nyüke. shei men.
20Hapheikü Jakobi, “Ngei daipü yenlem yangkü Kahvang ngei mü nyuei ngei yomjema, hatü hahying shuoh-ei ashakviha owhen yahphüjema, 21hatü ngei meishi leiyei opalei shem ngoijema, Shembüpayü ngelei Kahvang vaihen, 22hatü ngei shemnyü vaishi haongpü yaongü Kahvangei shem vaihen, hatü nüngi ngei kü shuohpü lemphü kübü ngei nüng kü ankhong shuohhen” shei lah-ei eteke.
Currently Selected:
KAHBHAO 28: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
