LUK 1
1
Theophilus kü Nyangpü
1Bampü Theophilus! Longshi shingi jen touei dhaümpü douthü jung dheanei nyanghen pangteke, 2chongpangpülei müki eeyei denpüthü hatü hapa shah baongpüthüi jomi mehe eetepa, ha jen kü epükei, 3lemphü chongpangpü leipü longi kenhingshi dokei yempheikü ngeiyao nüng shing ha dheanei nyanghen shei tempeih, 4shejüang nüngi mehe shahhing nyuhtepa, ha douthü nüngi lekei nyinghen.
Johan Baptükbü Bühhen Epü
5Judea kü Herod ongpalei nyih kü Abijah ngong phang kübü ngongpa hük Zekhariah shei mentü nyu. Chenyühayü Aaronei hühhiha nyu hatü pinnyü kü Elizabeth shei men. 6Jijinyiphen Kahvang touei daülangi nyu, hatü Shembüpalei shahkung hatü vanglemthü aimü eela neshiüi nyu. 7Shejao jiji hapeü nenyu; mehenangkü Elizabeth-ü nyülan nyu, hatü jijiphen vangbongi behe leidaitü nyu.
8Chem büpa kü beanpü hepak kü Zekhariahyü Kahvang touei ngongdou dükei nyu, 9ngong vanglem kü nyupükei phongyomei jepü nangkü Shembüpalei daülangpü shingei shüei ayingshü jakei nyu. 10Shaang ayingshü jakei moilapü hepak kü khongnyü-ü chingshelei phopei nyu.
11Hahepak kü Shembüpalei phongshan peiyei ayingshü jakpü moidü lakdah lemei yaong. 12Mechem Zekhariah-i büpa eepa, büpa han, hatü nyempai mateke. 13Shejao vangsho phongshani büpa kü, “Zekhariah, nüng tenyem; mehenangkü nüngi phoppü danteke. Anyüha Elizabeth-i yeshang hük angkahen, hatü nüngi büpa kü Johan shei menhen. 14Nüng mongongpü hatü mongmeipü nyuhen, hatü büpa angpü nangkü longshi shing mongonghen; 15mehenangkü büpayü Shembüpa touei longpü nyuhen. Büpai yiü nevaijü wong kohpü yiü neyinghen; büpa bühshekü-üng Laangha Daülangpai maei nyuhen. 16Büpai Israel nanglakthü longi Shembüpa, jomei Kahvang touei müei leihen. 17Elijahlei laangha hatü ngani büpai büpa shekü daiyei nyühipathülei mongdang hapeüthü philei, hatü ven nedanpüthü daülangpüthülei kihikon lemei nyokei leihen; hapa keiha Shembüpa shingvaishi nanglakthü temhen” shei e.
18Zekhariah-i vangsho phongshan kü, “Ha vamkahen shei ngei mekei etü nyinghen? Mehenangkü ngei sheyü viüdai, hatü ngelei nyühayao vangbongi behe leidaiteke” shei e.
19Vangsho phongshani büpa kü, “Ngeiyü Gabriel hih. Ngeiyü Kahvang touei yaongshi nyunyeih, hatü ngeiyü nüng kü ha ehen hatü nüng kü hapa shahjangmei kohen shompeih. 20Shejao hapa jiüpü hepak kü ha dhaümhen shei epü ngelei shah kü nüngi hingnelempü nangkü ha dhaümpü nyih mangngoi thahshi nüngi shah ne-eaoki nyuhen” shei jangei e.
21Hahepak kü nanglakthüyü Zekhariah danei nyu, hatü phopshem leipü büpa mehekei pheinya shei thamaei nyu. 22Mechem büpa vampa, büpai jomphong kü shah ne-eaok, hatü büpai phopshemei manghkhang hük eeteke shei deihei dang. Büpai jomphong kü laki nyuh-ei hu, shejao shah ne-eaoki nyu. 23Mechem büpa chongphopü hepak peihpa, büpa shemei leidai.
24Hathü nyih pheikü chenyüha Elizabeth büm nekongi lei, hatü lenyang nga thahshi shemei küpshi nyudai. 25“Shembüpai ngei kü ha dükpeih, hatü büpai ngei kü phahjiyei vei, hatü ngelei nanglak khongkü ngei ponghahpü mongmang büpai yahlang” shei pinnyüi e.
Jisu Bühhen Epü
26Len vokpabü kü Kahvangi Galil kü jila hük Nazarethlei Gabriel phongshan shom; 27hatü David am phang Joseph-i doi pheyei nyupü nela Mary touei pei. 28Büpai pinnyü touei peiyei, “Selam! Shembüpa nüng mü nyüke, hatü nüng kü longi moihimanteke” shei e. 29Shejao büpalei shah kü pinnyüi shanghah-ei deih hatü hayü menüng keipü selam shah enya shei deih. 30Shejao vangsho phongshani pinnyü kü, “Nüng tenyem, Mary; mehenangkü Kahvangi nüng kü phahjiteke. 31Shaang nüngi büm nekongi leihen hatü yeshang hük bühhen, hatü nüngi büpa kü Jisu shei menhen. 32Büpayü longpü nyuhen hatü büpayü Chaipübalei Ha shei nyükhen, hatü Shembüpa Kahvangi büpa kü chebü Davidei ong uoshing shuohhen. 33Büpai den kü Jakob am phang shak kü vanglem lemhen, hatü büpalei ongching dohpü neshiühen” shei e.
34Mary-i vangsho phongshan kü, “Hayü mekei aokhen? Mehenangkü ngeiyü pai mü ngühpü nela hih” shei e. 35Vangsho phongshani pinnyü kü, “Laangha Daülangpü nüng shak kü peikahen, hatü Chaipübalei ngani nüng kü dhümhen; hanangkü nüngi anghen naü-ü daülangpü nyuhen; büpa kü Kahvang Ha shei nyükhen. 36Shaang, nüngei shem am Elizabeth-ao behe leidaitü yeshang hük koshi nyüke; hatü üpa kü nyülan shei ehampa, pinnyü hapeü nyupheikü shaangpai lenyang vokpabü hih. 37Mehenangkü Kahvang mü meheyao ne-aokhen neshiü” shei e. 38Hahepak kü Mary-i, “Shembüpa chongphobü ngei hamü nyüpeih; nüngei shah aimü ngei kü nyemjiükei” shei e. Hapheikü vangsho phongshan pinnyü toueipü lüdai.
Mary-i Elizabeth Thümpü
39Hathü nyih kü Mary-i layaongei shülangi phaüshang kahmük Judea amei jila hükei dai; 40hatü halei pinnyüi Zekhariahlei shemei shüei Elizabeth kü selam shihteke. 41Mechem Mary-i selam epü Elizabeth-i danpa, vom mongeipü naüi mongongpai pheü, hatü Elizabeth-ü Laangha Daülangpai mateke. 42Ngeü longpai pinnyüi lenteke: “Nyüha khongkü nüng moihimanpü, hatü nüngei naü uoshing kübü betjük moihimantuh. 43Ngelei Shembüpalei nyü leihen mü ha ngei kü mehekei hetpa? 44Mehenangkü nüngi ngei kü selam epü danhinüng ngelei naü uoshing kübü naü mongongpai pheüteke. 45Shembüpai pinnyü kü mehe etepa ha jiükahen shei hinglempü pinnyü moihiman!”
Marylei Menvih Kesho
46Mary-i eteke:
“Ngelei mongi Shembüpa müknyinshekhangnyeih;
47hatü ngelei laanghai Kahvang,
ngei yemleipü kü mongongnyeih;
48mehenangkü büpai laophülei
chongphobü maanpü leipü kü phahjiyei veiteke.
Hingmei, shaang mü leitü
den peü kü ngei kü moihimanpü shei nyükphahen;
49mehenangkü Jeiyong
Kahvangi ngei kü dou longpü dükteke,
hatü büpalei men daülangpü vaituh.
50Büpalei phahjiyü büpa kü
nyempüthü shing hüdenhalenshi nyüke.
51Büpai laophülei laki büpalei wong huteke;
büpai jomei mongei changmeiyei deihpüthü yantük.
52Büpai wong kohpüthü ong uoshing kübü shüei vütük,
hatü maanpüthü longei anshihteke.
53Büpai aeipüthü doumei-i mahü,
hatü shemmeithü lakkong deitük.
54Büpai laophülei phahji deih-ei dangtü laophülei
chongphobü Israel am kü sheüh;
55büpai hamei bühipa Abraham,
hatü büpalei hüpeüthü shing den shingvaishi lahpükei dükteke.”
56Mary pinnyü mü lenyang jem hükshing nyutü pinnyülei shemei nyokei leidai.
Johan Baptükbü Bühpü
57Shaang Elizabeth-i hapeü anghen hepak ngoi, hatü pinnyüi yeshang hük büh. 58Pinnyülei chingyowthü hatü shem ami pinnyü kü Shembüpai phahji longpü hupü jung danei jom longi pinnyü mü mongong.
59Nyih shetpabü jomi naü kü shuw japhen thai, hatü jomi naü kü chepalei men leiyei Zekhariah shei menhen nyu. 60Shejao chenyüi, “Nevai, naü keyü Johan shei menhen” shei e. 61Jomi pinnyü kü, “ammei shem am üpa kao hapa men menei neshiüpih” shei e. 62Hanangkü jomi chepa kü naü kü mehe men menhen shei laki nyuh-ei e. 63Büpai yaongshung hük yahkei shei e, hatü, “Büpalei menü Johan” shei nyang. Ha kü jom peü thama. 64Ngangahük kü büpalei ju ap, hatü büpalei yei laiyei Kahvang men longei shah ehen chongpang. 65Jomei chingyowthü peü kü nyempü pei, hatü ha douthü jung phaüshang kahmük Judea kempülei etei. 66Ha jung danpü peüi, “Hapa naü mehe leikahen?” shei thamaei etei. Mehenangkü Shembüpalei lak büpa mü nyuteke.
Zekhariah-i Tetpüvanpü
67Hahepak kü chepa Zekhariah-i Laangha Daülangpai maei hapa tetpüvanpü shah eteke:
68 Shembüpa, Israel Kahvang moihimantuh;
mehenangkü büpai laophülei nanglak kü phahjiyei veiteke,
hatü jom angei leiteke.
69Büpai ham shing yemleipü
vaung#Vaung lappü, “Wong” hük büpalei chongphobü David am phang kübü vamhüteke.
70Büpai aivang den mebü büpalei daülangpü thibüthülei ju homei,
71hamei vepathü kübü yanghen,
hatü ham kü jiühitpüthülei
lak kübü ham yanghen epü jiüteke.
72Hapakei hamei bühipa kü
büpai lahpü phahji huteke,
hatü büpalei daülangpü vangpüshuwpü deih-ei dangteke.
73Büpai hamei bühipa Abraham kü lahpü:
74Hamei vepathülei lak kübü ham yanghen,
75hatü nyempü neshiüi daülangpü,
hatü daülangshemshepü kü
hamei nyihthü kemei büpa chongpho-aokhen.
76Hatü nüng keyü, ngelei hapeü,
Chaipübalei thibü shei nyükhen;
mehenangkü nüngi Shembüpa shekü
büpa shing lem temnüng daihen,
77Jomei mang tükpü homei
büpalei nanglakthü kü yemleipü nyinghühen,
78mehenangkü jenei Kahvangi phahji yahyangpü homei,
ha homei vangsho leipü vanghe vangngai jen kü khanghen,
79shangmang hatü dipü vangdhüm kü nyupüthü kü vangngai shuohhen,
hamei la chingmei lem kü mühen.
80Naü long, hatü laangha kü wong koh, hatü Israel kü shakei vamei huhen nyih mangngoi thahshi büpa jahpanei nyu.
Currently Selected:
LUK 1: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
