LUK 11

Phophen Jung Nyuhpü

(Mt. 6:9–13; 7:7–11)

1Nyih hük Jisu shing hükei phopei nyu, hatü büpai phoppü dohpheikü büpalei nanglomthü khongkü hüki büpa kü, “Shembüpa, Johani büpalei nanglomthü kü nyuhpükei hamphong kao phophen nyuhshih” shei e. 2Büpai jomphong kü e,

“Opa, nüngei men daülangpü vaituh.

Nüngei ongching peikei.

3Nyihjeih hahying nyih ieyei ham kü yahshihma.

4Ham khüei mang thahpüthü kü hami mang

tükshuohpükei hamei mang tükshihma,

hatü dokpülei ham temühü.”

5Hapheikü büpai jomphong kü e, “Lappü hüki amphong khongkü hüki küphülei shemei nyak jiam kü heih-ei büpa kü, ‘Mongjem, ngei kü aan jem lushih; 6mehenangkü ngelei küphü hük ngoiyei nyüke, hatü ngei büpa kü ühhen meheyao neshiü’ shei eshuohjü, 7büpai shem mongeipü jangei, ‘Ngei kü tebaokkei, sha küptükteke, hatü hapeüthü peü shidaiteke; ngei paoei nüng kü meheyao neshuoh-aok-ü’ shei enyüke. 8Ngei am kü enyeih, mongjem vaipai shei büpai paoei büpa kü meheyao neshuohjao büpai nyeanpü nangkü büpa paoei mehe büpai na ha shuohhen.”

9Hanangkü ngei am kü enyeih: Yütuh, hatü ha am kü shuohhen; yemtuh, hatü ha ammi danghen; kaongtuh, hatü ha am kü apphahen. 10Mehenangkü yüpü peüi dangnyeih, hatü yempü peüi dangnyeih, hatü kaongpüthü peü kü apshuohnyeih.

11Am pathü üpai laophülei hapeüi nyah yüjü büpa kü biü jeiyei shuohhen? 12Nevaijü büpai ati yüjü büpa kü yiüjikaungkang shuohhen? 13Amphong shennyakten vaijao laophülei hapeüthü kü thintho meipü shuohhen nyingjema, ammei vangsho leipü Pa-i büpa kü yüpüthü kü meshük nyeinya shuohhenang!

Jisu hatü Beelzebul

(Mt. 12:22–30; Mk. 3:20–27)

14Shah ne-eaokbenüng mang laangha hük Jisui changtük. Mechem mang laangha vamdaipa, shah ne-e-i nyupü shennyaki shah e, hatü khongnyüi thama. 15Shejao jomphong hanei-i, “Kahshihlei vanglem lembü Beelzebul homei büpai mang laangha changnyeih” shei e. 16Lebüthüi büpa kü dokei vangsho leipü nyangeihepü nedoh-i yüteke. 17Shejao jomi mehe deih ha büpai nyingei jomphong kü, “Ongching hüki laophü khüei hanjema bendainyeih, hatü shem hük laophü khüei hanjema dodainyeih. 18Hapakei Satanao laophü khüei hanjema, mekei etü büpalei ongching yaongaokhen? Ngei Beelzebul homei mang laangha changpeih shei ammi epü nangkü ngei ha enyeih. 19Shaang ngei Beelzebul homei mang laangha changjema, üpa homei am phei müpüthüi jom changtüknya? Hanangkü am phei müpüthüi ammei shahphenbü vaihen. 20Shejao ngei Kahvangei ngani mang laanghathü changtükjema, Kahvang ongching am touei peiteke. 21Mechem wong kohpü shennyaki lahhilaong changshi notü shem yomhenshang, büpalei mopthü yangei tuhnyüke. 22Shejao mechem büpa mao wong kohpübai büpa neühen, büpai büpalei lahhilaong yah-ei lüdainyeih hatü büpalei mop-ao hanei lüdainyeih. 23Üpa ngei mü nenyu ngei khüei nyüke, hatü üpa ngei mü nethai, haitüknyeih” shei e.

Mang Laangha Nyokei Leipü

(Mt. 12:43–45)

24“Mechem shennyak hük leipü mang laangha vamei daihen, büpa yung neshiüpü kahmükei nyiumei shing yemei longteinyeih, shejao meheyao nedangi büpai, ‘Ngei vamei lüdaipü shemei-üng nyokei leihen hih’ shei enyeih. 25Mechem büpa nyokei leihen, nyüp maotüktü shüpeikengtüktü eenyüke. 26Hapheikü büpa daiyei büpa mao nemeipü laangha nyet müei leinyeih, hatü jom shüei halei nyunyeih; hatü hapa shennyakei laphenü shongpü mü pheishi-üng nemeipüba leidainyeih.”

Hingshangpü Mongong

27Mechem Jisui ha eyei nyupa, khong leipü nyüha hük ngeü vamei büpa kü, “Nüng kopü naü uoshing hatü nüngi yingpü amma moihimantuh” shei e. 28Shejao büpai, “Üami Kahvangei shah danei düknya, hathüang moihiman!” shei e.

Yashanyale Yüpü

(Mt. 12:38–42)

29Mechem khongnyü nyeinya daei leipa, büpai, “Hapayü nemeipü denhivan; hapai yashanyalepü yünyüke, shejao Jonah homei nyangeihepü mü lenei mehe nyangeihepüyao neshuohpih. 30Mehenangkü Jonah-i Nineveh kü nyangeihepü leipü keiha Shennyak Hayao hapa den kü nyangeihepü vaihen. 31Sheba leipü onglanyüi shahphenpü nyih hapa denhivan shennyakthü khüei yaonghen hatü jom nyonghühen; mehenangkü pinnyüi kahdok dohpü leipü Solomonei kihikon kü banghen peipeih, hatü veituh, Solomon mao longpü lemhük hatouei nyüke. 32Nineveh nanglakthüi shahphenpü nyih hapa denhivan khüei yaonghen hatü nyongtükhen; mehenangkü Jonah-i chongvenpü kü jomi mong lep, hatü veituh, Jonah mao longpü lemhük hatouei nyüke” shei e.

Büm kü Vangngai

(Mt. 5:15; 6:22–23)

33Üpaiyao awdük jaktü mühdow mongei netuhnyih, shejao mongei shüpü peüi vangngai eehen shingvaishi awdük ngenshingei ngenei tuhnyeih. 34Nüngei mükü nüngei büm kü awdük. Nüngei mük meishi nyujema, nüngei büm kü vangngai-i maei nyüke; shejao ha meishi nenyujema, nüngei bümü shangmangi maei nyüke. 35Hanangkü vangngaiyü shangmang leidaimangkü nüng kenhingtuh. 36Hanangkü nüngei büm vangngai-i maei nyujema, hatü mepa shingao shangmang kü nenyujema, awdük vangngai-i nüng kü khangpükei chemjalak kü vangngai leidaihen.

Jisui Pharisee hatü Shahkung Nyuhbüthü Nyonghüpü

(Mt. 23:1–36; Mk. 12:38–40)

37Mechem büpa shah eyei nyupa, Pharisee am hüki büpa mü hahyinghen büpa kü nyük; hanangkü büpa daiyei nükdü touei uo. 38Bhaong hahshekü büpai lak nehühpü eeyei hapa Pharisee shennyaki thama. 39Hahepak kü Shembüpai büpa kü, “Shaang am Pharisee amü nükshung pati shakdok mon daünyüke, shejao mongeiyü hahnempü, hatü mangi maei nyüke. 40Amphong ngapathü! Shakdok lingpübai mongao nelingangpü je? 41Hanangkü mongei mehe nyu, ha taopathü kü shuohtuh, hatü lemphü daüdaihen” shei e.

42Shejao am Pharisee am onyükei! Mehenangkü ammi chühüng hatü chünem hatü lebü phenlakthü peü yah-ei ankhong shuohnyüke, shejao ammi shahhing hatü Kahvang bampü yakphongnyüke. Ammi shongpü netuhphongi shompü dükhen vaipeih.

43Am Pharisee am onyükei! Mehenangkü ammi Sinagoglei dhüm kohpü uoshing kü uohünyüke, hatü bhei leihshing peüei mih-i selam shihhahhünyüke. 44Am onyükei! Mehenangkü amphongü joshi nyupü mahngchong leangke; shennyakthüi nenyingi ha shangkü kamnyüke.

45Shahkung nyuhbü hüki büpa kü, “Nyuhbü, mechem nüngi hathü ehenshang, nüngi hamphong kao naamei enyüke” shei e.

46Jisui büpa kü e, “Amphong shahkung nyuhbüthü, amphongao onyükei! Mehenangkü ammi nanglakthü kü neko-aokhen mü hanggovih kohünyüke, hatü ammi jom kü lakjaang hükiyao noei nesheühnyu. 47Amphong onyükei! Mehenangkü ammi ammei bühipathüi jütükpü thibüthülei mahngchong lingnyüke. 48Hanangkü ammei bühipathüi dükpü douthü kü ammi denpü shuohnyüke, hatü ha jiüpükei yahnyüke; mehenangkü jomi jü, ammi mahngchong lingnyüke 49Hanangkü Kahvangi büpalei kihikoni, ‘Ngei jom touei thibüthü hatü phongshanthü shomhen, jomi hathü hanei jühen hatü shüveihen’ shei eteke; 50shejüang kahdoknyü linghinüng thibüthülei iy yenhüpü kemei hapa denhivan kü yühen; 51Abelei iy kübü moidü hi Daülangpü Shing nyi aa kü jüpü Zekhariah thahshi. Hih, ngei am kü enyeih, hapa denhivan kü ha yühen. 52Am shahkung nyuhbüthü onyükei! Mehenangkü ammi nyingpühingpü sabi yah-ei lüdai; am nyingiyao neshü, mih shühenthü kao ammi bangtük.”

53Mechem büpa haleipü vamei daipa, shahkung nyuhbüthü hatü Pharisee ami büpa kü nemei-i khühen, douthü longi kü dokei veihen pang, 54büpai epü lemhük kü nongshi büpa yephen danei nyu.

Currently Selected:

LUK 11: PHOMBSI

Highlight

Copy