MARK 11
11
Aokpü Dangei Jerusalemei Yiüpü
(Mt. 21:1–11; Lk. 19:28–40; Jn. 12:12–19)
1Mechem jomphong Jerusalem ngoipa, Olive Kahshang yopai-i Bethphage hatü Bethanylei büpai büpalei nanglom nyi shomei, 2jiji kü, “Anji shekü nyupü chingei daituh, hatü anji shüjahinüng shennyaki chemao manguopü gadu cheha hük shenshi eehen hih. Ha sheyei ankei” shei e. 3Shennyak hanei-i, “Anji-i mehekei ha yahnya?” shei ephüjema, “Shembüpai ha nanyüke, hatü lomi nyokei leiphahen etuh” shei eteke.
4Jiji daishingkü gadu cheha hük shaden yopailei chingshelei shenshi nyu. Jiji-i ha sheshingkü, 5yaongshi nyupü hanei ami jiji kü, “Anji-i gadu cheha sheyei mehe lingnya?” shei e. 6Jiji-i hathü kü Jisui mehe e, ha eteke, hatü hathüi ha yahhen shuoh. 7Hapheikü jiji-i hapa gadu cheha Jisu touei müei lei, hatü ha kü jomei ashak nyemtü büpa ha shangkü uo. 8Shennyakthü longi lem kü jomei ashak nyem, hatü lebüthüi phenhavunglak bhagei lem kü nyemshuoh. 9Hahepak kü shelei shongpü hatü pheilei müpüthüi,
“Hosanna!
Shembüpalei men kü üpa peikünya moihiman!
10Jenei bü Davidei ongching peipü moihiman!
Peü mü shaopüba kü men vihtuh!” shei lenei e.
11Jisu Jerusalemei peiyei phopshemei shü, hatü büpai shinei veitü pheidaipü nangkü anpünyi mü Bethanylei heihdai.
Jisui Adhapü kü Thaüvaüpü
(Mt. 21:18–19)
12Nyihphei mechem jomphong Bethany leipü leipa, büpa aeiteke. 13Tailuei büpai adhapü hük phenlak ngetshi eeyei hahhen meheyao nyüla shei heih. Mechem büpai ha ngoiyei heihpa, büpai phenlak mü lenei meheyao nedang; mehenangkü hapayü betjük jükhen dühü nevai-i nyuteke. 14Büpai hapa pü kü, “Hajük kü üpaiyao mechemao nüng kübü betjük nyemtehah” shei e, hatü büpalei nanglomthüi ha danteke.
Jisui Phopshem Daühüpü
(Mt. 21:12–17; Lk. 19:45–48; Jn. 2:13–22)
15Hapheikü jomphong Jerusalemei lei, hatü büpa phopshemei shüei phopshem mongei bhei yupü, shakpü am changtükhen pang. Büpai lop jeiteipüthülei haüdü hatü athuba yupüthülei uoshing khüptük; 16hatü büpai phopshem konmong homei meheyao kotü lüteihen nehan. 17Büpai jomphong kü nyuh-ei e:
“Ha nyangei nenyupü je?
Ngelei shemü jat peü
shingvaishi phoppü shem shei nyükhen,
shejao ammi ha gühpathülei dung leitükteke” shei e.
18Mechem ngongpathü hatü shahkung nyuhbüthüi ha danpa, jomi büpa jühen lem yem; jomi büpa kü nyem; mehenangkü khongnyüi büpai nyuhpü kü yashan. 19Mechem om dhüpa, Jisu hatü büpalei nanglomthü ching leipü lüdai.
Kaudaipü Adhapü Kübü Nyinghen
(Mt. 21:20–22)
20Nepnüng dhom mü jomphong peih-ei daishingkü hapa adhapü tünglang thahshi kaudaitü ee. 21Hahepak kü Peteri ha deih-ei dang hatü büpa kü, “Nyuhbü, veituh! Nüngi thaüvaüphongpü adhapü kaudaiteke” shei e. 22Jisui jomphong kü, “Kahvang kü hinglemtuh. 23Hingmei ngei am kü enyeih, ammi hapa kahshang kü, ‘Daituh, hatü yungchingei hüngdaituh’ shei ammei mong kü nejü-üi ammi mehe e, ha dükkahen shei hinglemei ejema, ha dükkahen. 24Hanangkü ngei am kü enyeih, mehe shingvaishi ammi phopei yühen, ha dangtepih shei hinglemtuh, hatü ha ammei vaihen. 25Mechem ammi phopei yaonghen, am hanei am mü nemeitei-i nyujema mang tükeishuoh, shejüang vangsho leipü ammei Pa-i ammei mang tükphahen” shei e. 26Shejao ammi mih kü mang netükjema, vangsho leipü ammei Pa-iyao ammei mang netükphahen.
Jisulei Wong kü Chengpü
(Mt. 21:23–27; Lk. 20:1–8)
27Shao jomphong Jerusalemei pei. Büpa phopshemei kamteiyei nyushingkü ngongpathü, shahkung nyuhbüthü hatü behethü büpa touei peiyei, 28“Nüngi hathü dou dükhen mehe wong nyüpa? Üpai nüng kü hathü dükhen wong shuohpa?” shei phe.
29Jisui jomphong kü, “Ngeiyao amphong kü shah hük pheshah, hatü ammi ngei kü ha ephüjema ngeiyao amphong kü mehe wongi ngei hathü düknya ephahen hih. 30Johani baptükpeyü vangsho leipü hi hangku leipü vampa? Ngei kü eshih” shei e.
31Jom hüki hük mü shah dakteiyei, “Jeni, ‘Vangsho leipü’ shei eshuohjema, büpai, ‘Ammi büpa kü mehekei hingnelemnya?’ shei ephahen. 32Shejao jomi, ‘Hangku leipü vampeih’ shei ehenü jomi khongnyü kü nyem; mehenangkü peüi Johanü hingmei mü thibü hük shei ieyeilem. 33Hanangkü jomi Jisu kü, ‘Hami nenyingang’ shei e. Jisui jom kü, ‘Ngeiyao amphong kü mehe wongi hathü düknya ne-ephapih’ ” shei eteke.
Currently Selected:
MARK 11: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
