MARK 9
9
1Nedoh-i büpai jomphong kü, “Hingmei ngei am kü enyeih, hatouei yaongshi nyupü hanei-i Kahvang ongching ngan kü yiüpü mangee thahshi nedipih” shei e.
Hangbong Jeipü
(Mt. 17:1–13; Lk. 9:28–36)
2Nyih vok pheikü Jisui büpa mü Peter, Jakob hatü Johan hathü müei shaopü kahshangei jomphong mon aong. Büpa jomphong touei hangbong jeile, 3hatü büpalei büm-ow nyangnyangtoptopshi shoshi kahdoknyü kü üpaiyao hapakei ashak nedhuaokhen mü vam, 4hatü halei jom touei Elijah hatü Mosa nyi vamei Jisu mü shah etei. 5Hahepak kü Peteri Jisu kü, “Nyuhbü, jenphongü hammü nyupü meihen khih; hamphongi tap jem veshah, hük nüng shing, hük Mosa shing, hatü hük Elijah shing” shei e. 6Büpai mehe ehen nenying; mehenangkü jomphong nyemei nyuteke.
7Hahepak kü phum peiyei jomphong kü jüm, hatü phum leipü ngeü hük vamei, “Hapayü ngei bampü Ha: büpa kü bangtuh” shei e. 8Mechem jomphongi hantü shinei veipa, jom mü üpayao nenyu, shejao Jisu mon nyu.
9Jomphong kahshang leipü leishingkü Jisui jomphong kü Shennyak Ha dipü kübü yangei manglei thahshi ha jung üpa kao te-e shei ngeükhüam shuoh. 10Hanangkü jomi dipü kübü yangei leipü sheiyü mehe kü lapei enya shei pheyei mongei mon jaoshi tuh. 11Hapheikü jomi büpa kü, “Shahkung nyuhbüthüi Elijah shong yiükahen shei mehekei enya yo?” shei phe. 12Büpai jomphong kü, “Hingmei Elijah shong peikahen, hatü büpai lemphü temhen. Shejema mekei etü Shennyak Ha longi shangponghen hatü nyonghühen shei lai kü nyangpa? 13Shejao ngei am kü enyeih, nyangei nyupükei Elijah yiüteke, hatü büpa kü jomi dükhüpükei dükteke” shei e.
Jisui Mang Laangi Yeppü Hashih Hük Meihüpü
(Mt. 17:14–21; Lk. 9:37–43a)
14Mechem jomphongi aopü nanglomthü touei peipa, jomphongi hathü shonei khong thaiyei ee, hatü shahkung nyuhbüthü hanei jom mü shah dakteiyei nyu. 15Mechem khongnyüi büpa eepa, jomphong longi yashan, hatü mokei heih-ei büpa kü selam shuoh. 16Büpai jomphong kü, “Amphongi hathü mü mehe kü shah dakteinya?” shei phe.
17Khong chi kübü hanei-i büpa kü, “Nyuhbü, ngei nüng touei mang laanghai yeppü ngelei ha müei deipeih; büpai shah ne-eaoknyih; 18mechem hapai yephen, büpa doei shüknyüke, büpalei ju kü yung-op vamei, bha ketei, büm kemei haendainyüke. Ngei nüngei nanglomthü kü ha changtükshih shei eshuohpeih, shejao jomi ha neaoknyu” shei e.
19Büpai jomphong kü, “Amphong hingnelempü den, ngei am mü meshük lushi nyukahen? Ngei meshük am mü lushi chongkününg? Büpa ngei touei deikei” shei e. 20Jomi ha naü Jisu touei dei. Mechem mang laanghai büpa eepa, ngangahük kü ha naü büm kheüei kahdokei doei ju kü yung-op vamei lütei. 21Jisui chepa kü, “Büpa kü ha vampü hepak meshükang?” shei phe. Büpai, “Naü mebü hih. 22Hapai düngei büpa jütüknüng shei aw kü shühü, hatü yungei shüktüknyüke. Nüngi lemhük dangkao dükaokjema, ham kü shinshangei sheühshih” shei e.
23Jisui büpa kü, “Nüngi dükaokjema shei! Hinglempü shennyak shingvaishi peü dükaokhen” shei e. 24Lomi ha naüei chepai lenei, “Ngei hinglemnyeih! Ngei hingnelempü kü sheühshih” shei e.
25Mechem Jisui khongnyü chemi mokei heihjapü eepa, büpai mang laangha kü loh-ei, “Hapa naü shah ne-ehüi hatü dhaongi nedani shümlangpü mang laangha, ngei nüng kü shahkung shuohnyeih, büpa kübü vamdaituh, hatü ne-yei büpa kü teshü!” shei e.
26Hapa mang laanghai vaüei ha naü longi kheühütü vamteke, hatü ha naü-ü mahng kei nyu, hatü longshi shingi, “Ha naü didaiteke” shei e. 27Shejao Jisui büpa kü lak kü düktü phukei yaonghü, hatü büpa nying yaongaokteke.
28Jisu shemei shüpheikü büpalei nanglomthüi joei, “Hamphongi mehekei nechangtükaokpa yo?” shei phe. 29Jisui jomphong kü, “Henüng keipeyü phoppai mon changaokhen” shei e.
Shao Jisui Dihen hatü Yangei Leihen Nang Epü
(Mt. 17:22–23; Lk. 9:43b–45)
30Jom hapa shing tuhtü Galil lemei heih. Büpai üpaiyao ha nyemtenying shei deih; 31mehenangkü büpai büpalei nanglomthü kü, “Shennyak Ha hangkulei lak kü lanei shuohhen, hatü jomi büpa jühen, hatü jüpheikü nyih jem angtü büpa shao yangei leihen” shei nyuh-ei eteke. 32Shejao büpai ha mehe enya jomi ha nenying, hatü ha jung büpa kü phehen nyemei deih.
Peü mü Longpü Üpaang?
(Mt. 18:1–5; Lk. 9:46–48)
33Hapheikü jomphong Kapernaumei heih, hatü büpa shemei nyushi büpai jomphong kü, “Amphong lemei mehe nangkü shah dakteipa?” shei phe.
34Shejao jomphongi shah ne-e; mehenangkü jomi lemei hüki hük mü üpa longpü vaihen shei shah dakteiteke. 35Jisui uotü jom anpünyi kü, “Hanei-i shongpü vaihüjema peü mü dohpü hatü peüei chongphobü leihen vongbong” shei e. 36Jisui maanpü hashih hük deiyei jomphong touei yaonghü. Büpalei lakei ha naü paümtü jomphong kü, 37“Üami ngelei men kü hapa keipü hashih hük mongongshi yahnya, büpai ngei yahnyüke; hatü üami ngei mongongshi yahnya, ngei yahnyu nevai, shejao üpai ngei shom büpa yahnyüke” shei e.
Jen Nekhüpüthü Jen Shing Nyüke
(Lk. 9:49–50)
38Johani büpa kü, “Nyuhbü, nüngei men kü hanei ami kahshih changei hami eepeih; mehenangkü büpa jen khong mü müpü shennyak nevaipü nangkü hamphongi büpa kü bangshuohpeih” shei e.
39Shejao Jisui, “Büpa tedohhü” shei e. Üpai ngelei men kü yashanpü dou düknya, hapheikü müshi ngei nangkü ten ne-eküpih. 40Üami jen nekhü, jen shingvaishi nyüke. 41Hingmei ngei am kü enyeih, amphong Khristalei vaipü nangkü üami ngelei men kü yinghen yungshong hük dangkao shuohhen, mekei etao jomei laklei nemahdaipih.
Mang Thahhen Dokpü
(Mt. 18:6–9; Lk. 17:1–2)
42Amphong hanei-i ngei kü vaipü hathü maanpü khongkü hük dangkao mang thahhüjema, am shingvaishiyü üng kü yaongba longpü shentü ilangmongei hüngdaipü-üng meipüba. 43Nüngei laki mang thahhüjema, ha langtüktuh. Nüng shingvaishi lak nyi kohtü mechemao nemetpü molo awlei shülei meyü lak hük neshiüi yangnyuyem touei shüpüüng meipüba. 44Halei jom hahpü laong nedinyih, hatü jom kü bahpü aw mechemao nemetnyih.#Lai longi kü lailüng 44, 45 hatü 48 ne-eehen. Lailüng 44, 46 hatü 48 aihük mü nyüke. 45Hatü nüngei la-i nüng mang thahhüjema, ha langtüktuh; la nyi kohtü molo awlei shülei meyü la hük neshiüi yangnyuyem touei shüpü-üng meipüba. 46Halei jom hahpü laong nedinyih, hatü jom kü bahpü aw mechemao nemetnyih. 47Nüngei müki nüng mang thahhüjema, ha luktüktuh; mük nyi kohtü molo awlei shülei meyü mük hük neshiüi yangnyuyem touei shüpü-üng meipüba. 48Halei jom hahpü laong nedinyih hatü aw mechemao nemetnyih.
49Hümi jakpü moila daühüpükei shennyak peü awi daühühen. 50Hüm meinyüpeih, shejao ha hüm kü hapalei vüngpü mahdaijema, nüngi ha mekei etü shao vünghühen? Am kü vüngpü hüm nyuhütuh, hatü hüki hük mü chingmei nyutuh.
Currently Selected:
MARK 9: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
