MOATLEM 21
21
Pol Jeroselem nâng Kat
1Nima thinnâng chhoan ekijô ngama rânjabthien lihma chhoanwah. Nima jogari pumma jo tintin danlihma Kos hahnâng hokwah; Ngale eredijâko Rodes hahnâng hokwah, ngale erehah kowah Patara hahnâng katwah. 2Eretheko nima Fonikia nâng katte jogari chohwah, ephumma eko chhangka lihma chhoanwah. 3Sipras hah khekat theko hûlihma, erethe kowah dekchah ngenâng chhangka lihma Siria hah ngenâng katwah. Ngale nia Tair jopha ko jâkka lihma, jogari pumma sêmmak heh jâlakwah. 4Enâng nima putedâlemte heh khuthe chohmîn lihma thin demnâng haptathe johtông thienwah. Juchaan junma thinma Pol nâng Jeroselem nâng nekka ngama thôkoh wah. 5Phumma thin demnâng niroamtông sanpoat pa thôan phumma thintâwah ni loatchhoan wah. Thinkhu phangtang ngale thin tangnyu heh erediko thinchha hehmin roamlahma thinhah kowah nidemnâng jopha tôko johkat wah, phumma eretheko nikhu phangtang dakuhtho lihma rangsoam wah. 6Erediko nima phan ejô ngama rânjabmîn lihma phânwah, ngale nia jogari ko chhangkatwah ngale thinmin humnâng ngakwâng wah.
7Ni Tair hahwah chhoan lihma Polimais hahnâng chhangkat wah, phumma erehah wah putedâlemte heh demnâng rânjabmîn lihma thin demnâng jâthe johtông thienwah. 8Eredijâko Polimais hahwah chhoan lihma Kasaria hahnâng hokwah. Phumma nia erehah kowah Ivengelist Filip humko tôngwah, Filip pa Jeroselem nâng chohsokte rãng waengit mihnyan rentah kowah wathe dângwah. 9Ate chha janchhô wabelii dela nâng lewãng thangma Joban ngin phoangthô lahma dângwah. 10Thin demnâng ni melâng rangwo johtôngwah, phumma erepoatko Judia wah mõng ate mînpa Agabus hokwah. 11Erepa nitânâng hûlahma atema Pol roamdit pa toanlahma roamdit pumma atedede dek ada heh khhekritwah, ngale atema ngatwah, “Asâthôanju ma aroh ngaeka: Are roamdit tângte pa Jews hehma Jeroselem nâng aroh khhekmin, ngale thinma Jews ledangte heh deknâng ekoh a.”
12Nima are nginpa tatphumma, ni ngale enângwah ahan hehmemin Pol nâng Jeroselem nâng nekka ngama roatsep wah. 13Rohkomin atema dânthâng wah, “Ne chenrãngma sep eken a, nema aroh sepletma ngahung chhâsiet hun eken a? Nga Jeroselem nâng khhekrit rãngmin cheimek, ngale Teso Jisu rãngma enãng ritmin tarii ang.”
14Nima ate leta jektang phumma, letangtu thangma, “Teso hung junko chendanga” ngama ngatwah.
15Enâng poatthe tôngthien diko, nima sêmmak heh khoakhem lihma Jeroselem nâng wângwah. 16Phumma Kasaria wah dijunte khuthe nidemnâng johwãng lahma ni johtôngrãng wãngeki mihwa humko sietwênwah#21.16: ngale ni johtôngrãng wãngeki mihwa humko thinma sietwênwah; ba ni johtôngrãng wãngeki mihwa pa thindem ko sietwênwah. - ere mihwa pa Sipras hahwah ate mînpa Manson dângwah, atea khema thuma putedâlemte dângwah.
Pol Jems tânâng Chohmînhok
17Chenthu ni Jeroselem nâng hokphumma, enângwah putedâlemte hehma khuhah nâhah tângroo wah. 18Eredijâko Pol nidemnâng Jems chohmînrãng katwah; ngale eko chentô Asâthem khhepho phannang heh dângwah. 19Pol ma thinnâng rânjab lahma Joban ma ate moatlem junma Jews ledangte hehnâng chenni motah a ereheh phangtang thôkoh wah. 20Thinma Pol ngin chohtat diko, chentôma Joban nâng rôwah. Erediko thinma ngatwah, “Pol, nangma akhe chentô hahjat Jews hehma Joban nâng putedâlem eka, ngale thinma Mosa Niemarang hehmin nyahrãng kepeka. 21Jews ledangte heh diaknâng sôngte Jews hehnâng nangma Mosa Niemarang heh phe en, ngale thin chhuchha hehnâng khoenkhen niem nekhôantu en, ngale Jews niemarang heh nekkeptu en ngama phoang hethôeko ngama thinnâng thôwak koheka. 22Thinma nanga Jeroselem nâng hûtha ngama metkep tatmin. Phumma nima chenni remin a? 23Nangma aroh moat pa asen edanga ngama thonghun eki. Ako wabelii mihnyan toamsem lahma tonga. 24Thin demnâng seksâsiet thinnâng johka lohma thin niemhôan thãpa nangma thumkoh; erediko ba thinma kho eta lokchhun a.#21.24: thin khopa elok chhunwak a: 18.18 ko tasûe. Eroh koba thinnâng nangjun ma chentô nginchhih thôkotah heh wanthemin linlin dangmah, ngale nanga Mosa Niemarang junko jôba song eko ngama thinma ejet a. 25Phumma Jews ledangte wah putedâlemte rãng dangeka hehnâng nima moangachaang nâng kohwah phhekchhah heh nekphhek chhah en, hei nekphhek en, erediko bohkorep lahma ritphewah ngem nekphhek en ngale dihiak dela kaamchhih nekmo en ngama nginpat hôan lihma sitiraang lihma matkattih.”
26Ephumma Pol ma mihnyan heh sietlahma eredijâko seksâsiet niem pa thin demnâng hôanwah. Ngale erediko Rangsoamhum nâng wãng lahma chenthu seksâsiet niemhôan pienpa râeka, eko thin chentôma soam aroakthin kephokmin ngama thôkoh wah.
Pol Rangsoamhum wah Loatkhhek
27Phumma jâengit jâpa thôanrãng ngatko, Asia diakwah Jews hehma Rangsoamhum nâng Pol lepkhewah. Phumma thinma mihnyan heh phangtang chepsiet lahma Pol loatkhhekwah. 28Thinma rakwah, “Isrial heh!” “Chohsûhi! Are mihnyan pumma chentô thenâng chhoan lahma Isrial mihnyan heh lelatnâng, ngale Mosa Niemarang erediko Rangsoamhum lelatnâng phoangthô eka. Ngale athângheh atema Jews ledangte heh Rangsoamhum kêko siethû lahma arethesâ pa ngeksiet eka!” 29(Thinma are ngaeka pa Ifisus wah Trofimus pa Pol demnâng Jeroselem nâng khewah, ngale atemin Pol ma Rangsoamhum nâng lâsietwên thêmtah ngama thônghun wah.)
30Jeroselem wah mihnyan heh phangtang chepwah, ngale mihnyan heh aroamma chhoanka lahma, Pol loka lahma, Rangsoamhum kowah sietphewah. Erediko lemlienma Rangsoamhum kâsekpa tangsek rewah. 31Erekowah mihnyan hehma Pol ritphe rãng hunwah, rohkomin Jeroselem phangtang nâng hahjam eka ngama Roman sipâhi adong nâng ngin chohmat hokwah. 32Lemlienma sipâhi sahhabdong pumma ate lemru sahhab khuthe ngale sipâhi sietlahma mihnyan heh tânâng katwah. Chenthu mihnyan hehma sahhabdong pa ate sipâhi demnâng khe phumma Pol nâng watpa jekwah. 33Sipâhi sahhabdong pa Pol tânâng kalahma Pol loatkhhekwah, ngale janru runiima khhek en ngama chienwah. Erediko atema, “Arepa hen a, ngale atema chenre tah a?” ngama chhienwah. 34Mihnyan hehma khaka pumma lithe ngale ahan hehma lihân hôngrakwah. Phumma sipâhi sahhab pummemin chenni dangeka erepa senthemthem jienjet loho, ephumma ate sipâhi hehnâng Pol sipâhi heh tôngthin nâng sietwên en ngama chienwah. 35Pol demko thin hihthodâng tôko johkatwah, phumma mihnyan heh nyahrãng cheili rinkhah junko sipâhi hehma Pol ape rewah. 36Mihnyan heh phangtang Pol diko junka lahma, “Aritphe rêmin!” ngama rakwah.
Pol ma Nok atang hehnâng Nginthôkoh
37Sipâhi hehma thin tôngthin nâng Pol sietkat rãng ngatko, Pol ma sahhabdong ko ngatwah: “Ngama nangnâng chenkomin tathôkoh ea?”
Sahhab pumma “Nangma Griik jab jienjab ole?” ngama chhienwah. 38“Eroh medang oko nanga khema wah wathe Igip mihnyan ma hahjat belii mihnyan wentho demnâng sehahkho nâng mihngoanrãng sietchhoante pa nang dangoni?” ngama chhienwah.
39Pol ma dânthâng wah, “Nga Jews jat, Kilika wah Tarsus hahnâng chhatwah, ngale alemthôan hahdaangko sôngte. Nga mihnyan heh demnâng mamjabmîn thukhang.”
40Phumma sahhabdong pumma jabmîn thukwah, ephumma Pol hihtho khoko cheplahma mihnyan hehnâng kihchepchep tongmêngen ngama dekma thak amak katwah. Chenthu mihnyan heh kihtông phumma Pol ma thinnâng Hibru jabma thôkoh wah:
Currently Selected:
MOATLEM 21: NOKTBSI
Highlight
Share
Compare
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
