MOATLEM 23
23
1Pol ma ngoang awang hehnâng thongsûkat lahma ngatwah, “Ngalemru Isrial mihnyan heh! Thejâ tôko ngahung sâpoangpoang danglekma Joban mathahko nyãn ekang.” 2Anania Soam aroakte adongthôan pumma Pol tâwah chepte hehnâng Pol thunko watrãng chienwah. 3Pol ma atenâng ngatwah, “Joban ma nangnâng metkep ewat ho - nanga rongpoma pôhutwah tukthen rãngrãng! Nanga reko nganâng Mosa Niem junko athe loatrãng tongeko, rohkomin nangma nganâng watrãng chien ekopa nangma Mosa Niem lelatnâng moeko!”
4Phumma Pol tâwah mihnyan pumma Pol nâng ngatwah, “Nangma Joban nâng Soam aroakte adongthôan thãjõ eko!”
5Phumma Pol ma dânthâng wah, “Ngalemru Isrial mihnyan heh, Ngama atea Soam aroakte adongthôan ngama jetmek. Joban nyapraangma ngaeka, ‘Ne pênte khhepho phannang hehnâng achhih lengamin.’ ”
6Chenthu Pol ma ngoangthun rãng khôanhû eka heh khakapa Saduki ngale khakapa Farasi ngama jetloat phumma, atema ngoang awang hehnâng ngatwah, “Ngalemru Isrial mihnyan heh! Nga a Farasi, ngale ngawa min Farasijô dângwah. Thejâ ngama ritwah ngakhîn min ngama putedâlem junko sekham eha!”
7Atema arepa ngat rienrien, Farasi le Saduki heh mênmîn wah, ngale mâmâ khukhu dangjâwah. 8(Chengrãngma ngako, Saduki hehma ritwah ngakhin mah, ngale Joban ngintatte erediko Ju min aho ngatwah; rohkomin Farasi hehma wanrem latnâng putedâlem wah.) 9Phumma nyahrãng chaanrakmîn lahma, Farasi hehwah Niemarang hethôte hehma tatwah ngale thinma toanchep lahma ngatwah: “Nima are mihnyan ko chenjô achhih chohkhemih! Linlinjô Juma komin ba Joban ngintatte hehma akomin atenâng lâthô kotah!”
10Nginchhiakmîn jenjenwah nyahrãng chaanmênwah, phumma sipâhi sahhab pa Pol khihkhih nyahnyah mahôan waklah o ngama nyahrãng patritwah. Ephumma ate sipâhi hehnâng mihnyan heh chhangko kaletma thinta wah Pol sietka letma sipâhi heh tôngthin nâng sietwênrên ngama chienwah.
11Erejâ rangpenko Pol tâko Teso chepka lahma ngatwah, “Nekchei! Nangma nga nginpa are Jeroselem hahko lâthô kotoh, ngale nangma arerãngrãngjô Rom nângmin thôkohmin.”
Pol Ritphe Rãng Ranchap
12Eredijâ rangkhahko Jews heh roamchohmîn lahma Pol ritphe rãng thômîn wah. Thinma Pol marit ritphe chenmin lejok phhekchhah min ngama toamsêm wah. 13Arepa roakbelii noma ajah mihnyan roamkhôan lahma sêmwah. 14Erediko thinma Soam aroakte adong ngale khhepho phannang heh tânâng hûlahma ngatwah, “Nima Pol marit ritphe chenmin lejok phhekchhah min ngama toamsem eki. 15Athângheh ne ngoang awang hehma Roman sipâhi sahhabdong thôanko Pol netânâng chensiet katra ngama ngin matkat en, ngale nima Pol nginpa senthemthem jet huneki ngama diapnga letma matkat en. Phumma ate anâng hokkat mako nima lemnâng tangritphe e.”
16Phumma are themawa wak ekapa Pol hiak pumma leptatwah; ephumma atema sipâhi heh tôngthin nâng kalahma Pol nâng thôkoh wah. 17Erediko Pol ma sipâhi sahhab wathe roolahma atenâng ngatwah, “Are paangmih pa sahhab dongthôan tâko sietwênkoh; atema chenni akomin thôkohthin tonga.” 18Sahhab pumma dongthôan tâko sietwên kolahma ngatwah, “Akhhek reki Pol pumma nga roolahma are paangmih pa nâng tânâng sietwênkoh ngama chien ehang, atema chenni komin nangnâng thôkohthin tonga.”
19Sahhabdong thôan pumma ate dekko lolahma ate demko sietchhoan lahma chhienwah, “Nangma nganâng chenni thôkohthin tonga?”
20Paangmih pumma ngatwah, “Jews thôte jabte hehma Pol ngoang awang heh tânâng sietkatro ngama nang ngewah nènep thâwângrãng jutthômîn eka, ngoang awang hehma Pol junma senthemthem jet huneki ngama ediap jabwak a. 21Phumma nangma thin ngin nekkep, chenrãngma ngako roakbelii noma ajah mihnyan hehma lemko huhtong lahma etangbem a. Thinma Pol marit ritphe chenmin lejok phhekchhah min ngama toamsem eka. Ngale athângheh thinma ritphe rãng lâcheptah, erediko nâng ngin bemwak eka.”
22Sahhab pumma ngatwah, “Nangma are nginpa nganâng thôkotek ngama hennâng min nekthôkoh.” Ngale atema paangmih pa chien chhoanwah.
Pol Govono Filex tânâng Chienkatwah
23Erediko sahhabdong thôan pumma ate dikowah sahhab wanii roolahma ngatwah, “Chânii sipâhi Kasaria nâng katrãng chep achã thuk en, thindemko Moknâng chhangte sipâhi roakengit, ngale pah semte sipâhi chânii chepthuk letma, thejâ rangpenpen wanekhu sanpoatko jâkhoam en. 24Pol chhângrãngmin Mok wanthe lemkoh en, ngale Govono Filex tânâng senthemthem hûsietkat en.” 25Erediko sahhab pumma siti aroh raanglahma kohwah: 26“Adongthôan Govono Filex, arepa Kladius Lisias ma raangki: Khebeng thôanko Salem. 27Jews hehma are mihnyan pa lolahma, ritphe nemwah. Phumma ngama atea Roman mihnyan ngama lepjet lekma, nga sipâhi heh demnâng kalekma pepâng katwah. 28Thinma chenni junko sekham eka erepa jethun lekma, ngama thin ngoang awang heh tânâng sietkatwah. 29Ngama atea lânrit pheroh, ba phâtek nâng lânsekroh chhihmo lahma chohkhemek; atenâng sekham ekapa thindede Niemarang heh junko sekham wakeka. 30Ngale chenthu mihnyan hehma ate ritphe rãng themawa pa chohthôkoh phumma, ngama lemlienma nang tânâng chienkat erâng. Ngama ate sekhamte hehnâng nang tâko sekham ka en ngama lâthô kotek.”
31Sipâhi hehma sahhabdong thôan ngin keplahma erejâ rangpenpen ko Antipatris nâng lanhuroh Pol sietkatwah. 32Eredijâko dakhoam sipâhi katah heh thin tôngthin nâng ngakwâng wah ngale Moknâng chhang lahma katah sipâhi heh Pol demnâng johkat thukwah. 33Thinma Pol Kasaria nâng sietkatwah, sitipa Govono nâng chohkoh wah, ngale Pol min atenâng chohkoh wah. 34Govono ma sitipa weih lahma Pol nâng nanga henjaa wah a ngama thôngphâ wah. Phumma chenthu Pol a Kilikia jaa wah ngama jetphumma, 35atema ngatwah, “Chenthu nang sekhamte heh mehûkhoam theko nang nginpa ejetattan e.” Erediko atema Pol abemte heh demnâng Govono humko chenbemwak a ngama chienwah.
Currently Selected:
MOATLEM 23: NOKTBSI
Highlight
Share
Compare
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
