MOATLEM 8
8
1Ngale Sol memin Stifen ritphe pa asen ngama ngatwah.
Sol ma Asâthem heh Chêmsiet
Erejâ phumma Jeroselem wah Asâthem hehma nyahrãng chêmchhih bengchohwah. Putedâlemte heh phangtang Judia ngale Samaria diaktang nâng phoangphân chhoanwah, moattat chhoante heh loloba lephanchhoan thangma tôngwah. 2Joban nâng senthemthem soamte khuthema nyahrãng raksep nungma Stifen mangpa bînchhoanwah.
3Sol memin Asâthem heh chhihsiet rãng phungwah; humhumnâng phoangchhoan lahma putedâlemte dihiak dela phangtang phoangsiet chhoan lahma, ereheh phâtek nâng sekhokwah.
Samaria nângmin Joban Nginkongsen pa Thôkoh
4Putedâlemte phanchhoantah hehma chentô thenâng Joban nginkongsen pa thôchhoan wah. 5Filip Samaria nâng katwah#8.5: Alemthôan hahdaang; wanwanthe ma hhahdaang ngama raangeka. ngale Samaria nâng kalahma enângwah mihnyan hehnâng Misaia nginkongpa thôkoh wah. 6Mihnyan heh nyahrãng namhû lahma Filip nginko jetat wah, ngale atewah ngin jettat demko atema patritli moatlem moeka hehmin khewah 7Ajahthem mihnyan wah juchhih min chaanmõang raksep lahma loatchhoan wah, ngale ajahthem kôasô khoanchette ngale dakò hehmin sênwah. 8Ephumma erehahko nyahrãng khuhah nâhah dângwah.
9Erehahko Simon ngama mihnyan wathe dângwah, phumma atema poatthe rãng Samaritan mihnyan hehnâng ate ngewah jâdu pumma hôanlahma bâritthuk wah. Simon ma atemin wanthe adong ngama rângthôrii lahma dângwah, 10ngale erehah kowah chentôma, adong arin anga ngama, ate nginko hungkoh lahma jetatwah. “Atenâng ‘Joban chaan adongthôan chaanpa,’” ngama thinma ngatwah. 11Simon jâdu pumma melâng rangpâ thin lekbârit thuk junko mihnyan hehma ate ngin pa kepwah. 12Roh komin chenthu thinma Filip wah Joban Hahsông nginkongsen le Jisu Krista nginpa chohtat phumma, dihiak dela phangtang baptijem kepwah. 13Simon memin ere nginko putedâlem wah; ngale baptijem kepdiko, Filip kêkêko namhokwah, ngale chenthu Filip ma nyahrãng patritli le bâritli heh moat khelahma atemin bâritwah.
14Jeroselem wah moattat chhoante hehma Samaria wah mihnyan hehmemin Joban jabkhab pa keptah ngama chohtat phumma thinma Piter le Jon nii thin tânâng chienkatwah. 15Chenthu thin Samaria nâng hokkat phumma, enângwah putedâlemte hehma Asâthôanju chohrãngma rangsoam kohwah. 16Chenrãngma ngako thinnâng hennâng min Asâthôanju maka dângwah; thinma Teso Jisu mînko lolo baptijem bengkep dângwah. 17Erediko Piter le Jon niima thin khohko dekma sahloatwah, ngale erediko thinma Asâthôanju chohwah.
18Piter le Jon niima putedâlemte heh khohko dekma sahloatko Jupa chohlahma khephumma, Simon ma ngun kohlahma Piter le Jon niinâng 19ngat-wah, “Nga nângmin are chaanpa kohha, ngamemin henhen khohnâng nga dekma sahlokoh ekanga ereheh ma Asâthôanju chenchoh a.” 20Phumma Piter ma atenâng dânthâng wah, “Nangma Joban wah hînhô pa ngunma târiakli ngama thônghundi nangngun nechhe pap wendô nâng ekaen! 21Nangma are ni moatlemko tajoh momahhi, chenrãngma ngako nang hungpa Joban mathahko achhih. 22Nangma are achhih themawa eko hungpa litlohma Teso nâng rangsoam o, erohkoba nangma are achhih thonghun ekopa Joban ma map ekohho. 23Chenrãngma ngako, nanghung pa achhih akhah le mihphetwan lolo, erediko nanga papma khhekthien lahma kheki.”
24Simon ma Piter le Jon niinâng ngatwah, “Are nechhema jabeken heh nganâng lechatrãng, nechhema Teso nâng rangsoam mêngkohha.”
25Piter le Jon niima Samaria wah mihnyan hehnâng atenii ma Joban moatlem moatpoat wah ngin heh thôkoh, erediko Teso nginkongsen heh thôkoh diko atenii Jeroselem nâng ngakwâng wah. Thin ngakwâng lemkomin melâng Samaria hahdaang hehnâng Joban nginkongpa thôthien kohwah.
Filip ngale Ithopia wah Sahhab
26Rangwah Teso ngintattema Filip nâng ngatwah, “Cheplohma dekchah nâng wãngo#8.26 dekchah; ba rangngih mongtangko. Jeroselem wah Gaza nâng katlemko kao.” (Thenep thejâ arelem pumma khoamtumah.)#8.26: Thenep thejâ arelem pumma khoamtumah; ba Arelem pa sehah khoma dan eka. 27-28Ephumma Filip toanchep lahma chhoanwah. Eko Ithopia wah delawa wathe atea lengtênchhoan dela dângwah, ngale atea Ithopia Wangcha ngun thiente sahhab dângwah, phumma ate Jeroselem nâng rangsoam rãng kalahma ate mokgari pumma humnâng ngakwâng dângwah. Ngale mokgari ko chhang nungma atema Isaia mõng titab kowah weihlahma dângwah. 29Asâthôanju ma Filip nâng ngatwah, “Wãng lohma mokgari ko chhang wãngo, ngale ate kêko tongwãngo.” 30Phumma Filip wãng lahma Isaia mõng titab kowah weihlahma tatwah. Filip ma atenâng chhienwah, “Nangma weih ekopa jet ekole?”
31Ere sahhabwa pumma dânthâng wah, “Arepa nganâng henma komin lethôkoh hangko ngama chenroh ejienjet anga?” Phumma atema Filip nâng mokgari ko nga tâko chhangwãngro ngama roowah. 32Joban nyapraang kowah atema weih tahpa arepa weihwah:
“Atea ajoatrãng sietchhoan eka saak rãngrãng,
ngale saakchha ma ate baan khenpoatko lesep rângdanga rãngrãng.
Atema khabthemin loatjabmah.
33Atenâng thãjô lembe hôanjôan wah,
ngale atea toangtang medang komin erejunko ledangwah.
Ngale henmejô ate liala junma lejien thômin,
chenrãngma ngako, are hahtokkhoh kowah ate roangdong pa thôantah.”
34Sahhabwa pumma Filip nâng chhienwah, “Arepa mõng ma hennâng ngaeka erepa nganâng thôkohhang? Atedede junma jab ekale mihhan nâng ngaeka?” 35Ephumma Filip ma atenâng thôkoh wah; Atema weihtah Joban nyapraang pumma bengthô kolahma Jisu nginkongsen heh phangtang atenâng thôkoh wah. 36Atenii lemko katjenjenko, jo roanche tônglâwah, phumma sahhabwa pumma ngatwah, “Are theko jo roanche tonga. Ngama baptijem keppa chennima tâtângmin a?”#8.36: wanwanthe ma vars 37 pemin raangeka: Filip ma atenâng ngatwah, “Nanghung nangrîn phangtangma meputedâlem oko nangnâng baptijem takoh e.” “Ngama putedâlem ekang,” ngama atema dânthâng wah; “Jisu Krista pa Joban Chha ngama putedâlem ekang.”
38Sahhabwa pumma mokgari pa chepthuk wah, ngale Filip le sahhabnii joko jâkhoam kalahma atenâng Filip ma baptijem kohwah. 39Chenthu thin jokowah loatwângko, Teso Juma Filip tôansiet chhoanwah. Erediko sahhabwa pumma Filip thengak khetuho, rohkomin sahhabwa pa khuhah nâhah ate humnâng wângwah. 40Filip atedede Azotus hahnâng hônghokwah; phumma atea Kasaria nâng wângwah, ngale ate wânglemko chentô hah hehnâng nginkongsen pa phoangthô kohwah.
Currently Selected:
MOATLEM 8: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
