LUK 20

Jisu ma Chaan chenwah Choh eka ngama Thôngphâ

(Mt 21.23-27; Mak 11.27-33)

1Jâthenâng Jisu ma Rangsoamhum nâng mihnyan hehnâng hethô ngale Joban wah nginkongsen pa thôkoh rewah, phumma ere sanpoatko Soam aroakte adong ngale Niemarang hethôte erediko khhepho phannang heh hûlahma 2thinma Jisu nâng ngatwah, “Ninâng thôkohhi, nangma chenni wah chaanma areheh moekoa? Are chaanpa nangnâng henma koh ehoa?”

3Jisu ma thinnâng dânthâng wah, “Ngamemin nenâng ngin wanthe chhien a. Nganâng thôkoh tanha, 4Jon ma baptijem kohrãng chaanpa Joban wah chohtah ale mihnyan wah chohtah a?”

5Ephumma thindede tungko chhiakmîn wah, “Nãngma chenroh danthang ea? Nãngma, ‘Joban wah choh eka,’ ngama menga eko, ‘eroh medang, ako nema Jon nâng chenrãngma leputedâlem re eken a?’ ngama engahi. 6Rohkomin nãngma, ‘mihnyan wah choh eka, ngama menga eko are mihnyan hehma nãngnâng longma epet hi,’ chenrãngma ngako thinma Jon pa Mõng ngama putedâlem eka.” 7Erohwah thinma, “chennângwah choh eka erepa nima jetmih” ngama dânthâng wah.

8Ngale Jisu ma thinnâng ngatwah, “Eroh medang ako ngamemin areheh chenni chaanma moekãnga erepa thôkomah.”

Angurthong khoakhêm Sokte Nginthakthô

(Mt 21.33-46; Mak 12.1-12)

9Erediko Jisu ma mihnyan hehnâng are nginthakthô pa thôkoh wah: “Rekthenâng mihnyan wathema angurthong khietlahma, mihnâng aroamrãng mothukthien lahma, melâng rangpârãng ate humwah chhoanwah. 10Chenthu angur chûm rangkuh hokphumma, aroamrãng mothuktah mihnyan heh tânâng ate haaheh ate thiak thârãng chienkatwah. Rohkomin aroamrãng mothuktah mihnyan hehma haa hehnâng watlahma chenjô lekoh ngakchienwên wah. 11Ephumma atema haa ahan wîenthe chienkatwah; rohkomin aroamrãng moatte mihnyan hehma erekomin awat rewah, ngale thãjô lembe hôanjôan lahma chenjô lekoh ngakchienwên wah. 12Erediko atema haa ahan lôremrãng chienkatwah; angurthong moatte hehma ere haa komin watwah, ngale panlien nâng phekatwah. 13Erediko angurthong tângtewa pumma ngatwah, ‘Ngama chenre anga? Ngama ngachha nyahrãng hunlekma thien ekãngpa chienkat ang; thinma ate ngin ekepthêm a!’ 14Roh-komin chenthu aroamrãng moatte mihnyan hehma ate chhapa khephumma, thindede tungko jabmînwah, ‘Arepa tângtewa chhapa. Nãngma ate ritphe e, ephumma ate thiak aman heh nãngrãng edanga!’ 15Ephumma angurthong kowah petphekat lahma ritphewah.

“Eroh medang ako, angurthong khiette tângtewa pumma aroamrãng mothuktah hehnâng chenremin a?” ngama Jisu ma thôngphâ wah. 16“Ate kalahma ere mihnyan heh phangtang eritpheka a, ngale angurthongpa mihhan demnâng eroam motûa.”

Mihnyan hehma erengin pa tatlahma, “Aroh chenthumin dangmah!,” ngama ngatwah.

17Jisu ma thinnâng sûlahma chhienwah, “Eroh medang ako, are Joban nyapraang pa chenni nâng ngaeka?

‘Humhôante ma longchhih ngama phe eka longpa chentô noma alemthôan longrãng dangeka.’

18Ere long khohko chentô chatjâeka ereheh khihkhih nyahnyah dângmin; ngale ere longpa henkhohnâng komin mechatjâ ako, ere mihnyan pa bumrãng lândangroh ekhihpet a.”

Thãkhokoh junma Ngin Chhien

(Mt 22.15-22; Mak 12.13-17)

19Niemarang hethôte ngale soam aroakte adong hehma Jisu ere thetheko loatkhhek rãng phungwah, chenrãngma ngako Jisu ma are nginthakthô pa nilelat nâng thôkoh eka ngama thinma jetritwah; rohkomin thin a mihnyan heh ranchei dângwah. 20Ephumma thinma sanpoat ahan lêmsokwah. Thinma mihnyan khuthe nâng mihnyansen rãngrãng diapdangthuk lahma Jisu nâng nginthongpha lahma bukritthukrãng chienkatwah, erohkoba thinma thôte jabte ngale Roman Govono nâng ejien lokhhek thuk a. 21Erekowah mihnyansen rãngrãng diapdang lahma katte hehma Jisu nâng ngatwah, “Hethôte, nima ajet nangma chenni jab eko ngale hethô eko ereheh toangtang. Nima ajet nangma hennâng min adong arin roak atoak weihmoh, rohkomin Joban nginpa toangtangma mihnyan hehnâng phoangthôkoh eko. 22Ninâng thôkohtanhi, Nima Roman Chofa nâng thãkho takoh ele takohmih a?”

23Rohkomin thinma buthi hôan ekapa Jisu ma lepkhe lahma thinnâng ngatwah, 24“Nganâng janngunpha khesok tanha. Ereko hen thhenphãng raangeka ngale henmin raanglahma tonga?”

“Chofa,” ngama thinma dânthâng wah.

25Ephumma Jisu ma ngatwah, “Eroh medang ako, chenpa Chofa thiak a arepa Chofa nâng koh en, ngale chenpa Joban thiak a arepa Joban nâng koh en.”

26Ereko mihnyan heh mathahko thinma chenni nângmin jienbukrii thuk ho, ephumma thin a kihchepchep kihtôngwah, ngale atema dânthang eka ngin junko barii lahma tôngwah.

Arit wah Ngakhîn rãngma Thôngphâ

(Mt 22.23-33; Mak 12.18-27)

27Erediko mihnyan ritwah ngakhinmah ngama ngatte Saduki heh hûlahma Jisu nâng ngatwah, 28“Hethôte, are Niemarang pa Mosa ma nirãng raangkohwah: ‘delawa wathe chha machhama merii ako, atema phethien eka janthoinyu pa ate naa pumma chhachhatrãng ngakkepmin, phumma ere wanii pumma chhaeka pa rit retahwa chha ngama ngatmin’. 29Rekthenâng chhepho waengit dângwah; Khhepho thôan pumma dihiak keplahma chha machhama ritwah. 30Phumma medemwa pumma ere dihiaknyu pa kepwah, 31ngale erediko ate naa pumma wienkepwah. Chhepho waengitlat eroh dângwah - phangtang chha lechha thangma ritwah. 32Athôanko dihiaknyu pemin ritwah. 33Phumma, aritte heh ngakhin jâko atea hen tangnyu dângmin a? Chenrãngma ngako chhepho waengit latma ate kepwah.”

34Jisu ma thinnâng dânthâng wah, “Areroan wah dihiak dela hehba kepmîn eka, 35Rohkomin ritwah ngakhin lahma ahokminwah roandôngko dôngte dihiaknyu ngale delawa heh lekepmîn tumin. 36Thin a rangkhethung wah Joban ngintatte heh rãngrãng dângmin ngale ritmin lerii tumin. Thin a Joban chharãng dângtûmin, chenrãngma ngako thin a ritwah ngakhin eka. 37Ngale mihnyan heh ritwah ngakhin eka ngama Mosa ma sâpoangpoang khesok eka. Wunbuk nâng wendô ngin raangtahko atema Teso pa, ‘Abraham Joban, Isak Joban ngale Jakob Joban ngama jabwah.’ 38Atea ahînte heh Joban, aritte heh Joban dangmah, ate demnâng dângte heh phangtang ahînte.”

39Niemarang hethôte khuthema loatjabwah, “Hethôte, nyahrãng lâpun dânthangtoh!” 40Ere diphumma thinma chenjô chinthôngphâ tuho.

Misaia junma Thôngphâ

(Mt 22.41-46; Mak 12.35-37)

41Jisu ma thinnâng thôngphâ wah, “Misaia pa Devit chhuchha ngama chenroh jienngatmin a? 42Chenrãngma ngako Devit ate dedema Rangsoamsê titabko ngaeka,

‘Teso ma nga Teso nâng ngaeka:

Ngama nangran heh nang daphâ khenko mathien thienkohko

43Are nga dekchah ko tongwãngro.’

44Devit ma atenâng ‘Teso’ ngama roowah; eroh medang ako Misaia pa Devit chhuchha chenroh jiendângmin a?”

Jisu ma Niemarang Hethôte hehnâng Achhih ngat

(Mt 23.1-36; Mak 12.38-40)

45Mihnyan heh phangtang ate ngin jêtatthuko, Jisu ma ate dijunte hehnâng ngatwah, 46“Niemarang hethôte hehwah jetletma dangen, thin a bôjat nâng khetlo dongpa pohlahma phoangkhoam lahma mihnyan hehma thinran cheichei rânjab huneka, Thinma Sanagog nângmin thin tôngthin pa châthien eka ngale kuhhôanthin nângmin tôngthinsen hunwak eka; 47Thinma janthoinyu heh helêmrãng keplahma thin humpa longchhah rewak eka, ngale thinnâng rang lolili soamlahma khesok rewak eka. Erethã thinma ajahthem chêmchhih echohwak a!”

Currently Selected:

LUK 20: NOKTBSI

Highlight

Copy