MATHIU 25
25
Janchhô Waechhi Nginthakthô
1“Ere sanpoatko rangkhethung Hahsông pa arerãngrãng dângmin. Rekthenâng janchhô waechhi ma thin wentit semlahma nemnyanwa chohmînrãng chhoan wakwah. 2Phumma wabangâ pa nokba dângwah, ngale ahan wabangâ pa jet ajien dângwah. 3Nokba wabangâ pumma wentit keplahma thin demnâng wentien abâm kepmah, 4Phumma ahan wabangâ pumma thin demnâng wentien abâm kepwah. 5Phumma nemnyanwa hokpa lektong lahma thin a jupmetrii lahma juplek wakwah.
6“Rangpen mongtãngko hôngrakwah, ‘Nemnyanwa lâhûtha! hûren ate demnâng chohmîn hûren!’ 7Phumma janchhô waechhi pa toansat lahma thin wentit pa dôrepwah. 8Ephumma nokba wabangâ pumma jet ajien wabangâ ko ngatwah, ‘Ne wentien kowah roanruto nêmthuk mênghi, chenrãngma ngako, ni wentien thôan lahma wentit pa lâmuttah.’ 9‘Jiennêm thukmah,’ ngama jat ajien hehma dânthâng wah, ‘nãngkhu anga ngarãng lemah. Chhoan letma nerãng richhoan en.’ 10Ephumma nokba heh wentien riakrãng chhoanwah; ngale thin chhoan diko nemnyanwa pa hokwah. Ephumma jet ajien wabangâ pa nemnyanwa demko phhekchhah chhah thinnâng johwângwah, ngale thinwâng diko kâsekpa sekwah.
11“Khediko ahan wabangâ pa hûlahma, ‘hethôte, hethôte!’ nimin akhennâng lupwãng thukhi, ngama raksepwah. 12Nemnyanwa pumma ‘lupwãng thukmah, ngama ne jetmah’ ngama dânthâng wah.”
13Athôanko Jisu ma ngatwah, “jetletma dangen, chenrãngma ngako, nema rãngwo sanpoat pa jetmet.
Haa Warem Nginthakthô
(Luk 19.11-27)
14“Ere sanpoatko rangkhethung Hahsông pa arerãngrãng dângmin. Rekthenâng mihnyan wathema ate hum phethien lahma hahtaang nâng chhoanwah; phumma ate haaheh roolahma ate chhahkhem heh sokare thukthien wah. 15Atema haa chentô nâng mâmâ tôtô moatlem kohthien wah: Wathenâng hahjat bangâ ngun kohthien wah, ahan watheko hahjatnii ngun kohthien wah, ngale ahan watheko hahjatthe ngun kohthien wah. Erediko tângte pa chhoanwah. 16Hahjat bangâ kohtah haapa lemlienma chhoan lahma ahan hahjat bangâ ngun chohbi wah. 17Ererãngrãngjô hahjatnii kohtah haa pummemin ahan hahjatnii ngun chohbi wah. 18Phumma hahjatthe kohtah haa pumma chhoan lahma ate tângtewa ngunpa hahken thulahma bînthien wah.
19“Melâng rãngpâ diko tângtewa pa ngakhû lahma ate haaheh demnâng atema kohthientah ngunheh phensietmîn wah. 20Hahjat bangâ kohtah haapa hûlahma atema chohbitah ahan hahjat bangâ pemin kohwah. Haa pumma ngatwah, ‘Tângte nangma hahjat bangâ kohthang.’ ‘Sûtan! phumma ngama ahan hahjat bangâ chohbila ekang.’ 21Tângtewa pumma haako ngatwah, ‘lâsenmotoh, nanga asen ngale dâlemli!’ ‘nangma are amãnchha ngun pumma senthemthem jienmo eko, erohwah ngama nangnâng ngun jahmõang ethienthuk e. Wãngro nga demnâng khu johhah wãnghang!’ 22Erediko hahjatnii ngun kohtah haapa hûlahma tângtewa ko ngatwah, ‘nangma nganâng hahjatnii ngun kohwah, phumma sûtan tângte! ngama ahan hahjatnii chohbila ekang.’ 23Tângte pumma haako ngatwah, ‘lâsenmotoh, nanga asen ngale toangtang, nangma amãnchha ngun pumma senthemthem jienmo eko, ngama nangnâng jahmõang ngun ethienthuk e. Wãngro nga demnâng khu johhah wãnghang!’ 24Erediko hahjatthe kohtah haapa hûlahma tângtewa ko ngatwah, ‘Tângte, ngama jet nanga nyahrãng mihchhihjat; nangma lekhiet leliwah khôanhente, ngale nangma chhahthong lemowah chhah khôankhente. 25Nga nangran cheilekma nang ngunpa hahkennâng bînthien wah. Sûtan! nang ngunpa ana’. 26Ate tângtewa pumma haako ngatwah, ‘nanga achhih ngale ajõ’, ‘nangma jet dangwah, dangale rohkole, nga a, ngama lekhiet leliwah khôanhente, ngale ngama chhahthong lemowah chhah khôankhente ngama? 27Nangma nga ngunpa ngunthien humnâng sek lohmeko, nga ngakhokko ngunchha demnâng ngakchohmîn wah. 28Atewah ngunpa thaletma hahjat echhi chohte wako koh en ngama ngatwah. 29Chenrãngma ngako, hennâng roanchhe tongeka ereko lephang lelãng chendanga ngama ajah lêkohmin; rohkomin, hennâng chenjô aho dangeka, atenâng roanchhe tongeka pejô ngaktôan chhoan rêmin. 30Are sekho haapa rangnyek khenko petphekat en; ereko asep nungma ate pâchupkek lahma chentonga.’
Athôan Khope Rên
31“Chenthu Mihnyan Chhapa rangkhethung wah ngintatte heh phangtang demnâng Lowang danglahma katko, atea Lowang tôngthinko etonga, 32ngale chentô diak akan wah mihnyan heh ate mathahko ekhôanhûa. Erediko kien chhangwah saak rângrephea rãngrãng, mihnyan heh atema khunii korãng ephansiet a. 33Atema toangtang mihnyan heh ate dekchahko etongthuk a, ngale ahan heh ate dekhitko etongthuk a. 34Erediko Lowang pumma ate dekchahwah mihnyan hehnâng enga a, ‘wãngrên, nenâng nga Wama rang lâkohthen! rangbâng hahbâng thuwah nerãng khoakhem kohthen Hahsông pa kepwãngrên. 35Nga rêmritko nema chhahthuktha, ngale jolân ritko nema jo jokthuktha; nga mihwun dângpoatko nema nehumnâng jekthuktha, 36nga boangloang dângko nema khet kepthuktha; nga akhun poatko nema chohsûtha, ngale phâtek khennâng dângpoatko nema chohsûtha.’ 37Erediko toangtang hehma edânthanga, ‘Teso, nima chenthu nang rêmrit khelihma chhahthuktih a, roh akole jolânrit khelihma jokthuktih a? 38Chenthu nanga mihwun khelihma nihum nâng jekthuktih a, roh akole boangloang khelihma khet kepthuktih a? 39Chenthu nanga akhun khetih a, ngale phâtek nâng tonglohma chohsû hûtih a?’ 40Phumma Lowang pumma edânthanga, ‘Ngama nenâng thôkoh eka, chenthu nema ngadijunte arinthôan wathe nâng chohsûtet a, arepa nganâng chohsok wah!’
41“Erediko atema ate dekhit wah hehnâng enga a, ‘nga tâwah taangen, nea Joban wah achhih chohte! Joak le ate ngintatte hehrãng khoakhem kotah roantang roanjêng khâmthin wendôko ka en! 42Nga rêmritko nema chhahthuk mahtha, ngale jolân ritko jo jokthuk mahtha; 43Nga mihwun dângpoatko ne humnâng jekthuk mahtha, ngale boangloang dângpoatko nema khet kepthuk mahtha; nga khun poatko ngale phâtek nâng tongpoatko nema chohsû mahtha.’ 44Erediko thinma atenâng edânthanga, ‘Teso, nima nang rêmrii lohma chenthu khetih a, ngale chenthu jolânrit khetih a, ngale mihwun danglohma khetih a, rohkole boangloang khetih a, ngale khun khetih a, rohkole phâtek nâng khelihma lechohsû dangtih a?’ 45Ephumma Lowang pumma edânthanga, ‘Ngama nenâng thôkoh eka, chenthu nema arinthôan wathe nâng lenyoak chohsû dangtet a, arepa nganâng lenyoak chohsû dangeha.’ 46Ereheh roantang roanjêng chêmchoh thinnâng chienkatmin, phumma toangtang heh roantang roanjêng roandông chohthin nâng wângthukmin.”
Currently Selected:
MATHIU 25: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
