MAK 10
10
Jisu ma Tangnyu Chiakphe junma Hethô
(Mt 19.1-12; Luk 16.18)
1Erediko Jisu erethe kowah loatchhoan lahma Jordan Jo rãnkawah Judia diak ngenâng katwah. Enângmin mihnyan heh ate tânâng jahmõang hokwah, ngale jâhanwah rãngrãng atema thinnângmin hethô wah.
2Farasi khuthe hûlahma Jisu bukritthuk hunwah. Thinma ngatwah, “Ninâng thôkoh tanhi, nãng Niem junko dela ma ate tangnyupa tachiakphe ale?”
3Jisu ma thinnâng chhien nungma dânthâng wah, “Mosa ma nenâng chenrãngrãng Niem kohthen a?”
4Thinma dânthâng wah, “Dela ma ate tangnyuko chiakphe nyapraang raangko lahma ate tangnyupa tachiakphea ngama Mosa ma ngatwah.”
5Jisu ma thinnâng ngatwah, “Nenâng hethôpa nyahrãng alat dângkowah, Mosa ma ere Niempa nerãngma raangwah. 6Rohkomin, rang ahah benghôan thuko, ‘Joban ma dihiak le dela hôanwah,’ Joban nyapraangma aroh ngaeka 7‘ngale erejunko dela ma ate nyong awa tâwah chhoan lahma ate tangnyu demko roamsôngmin,#10.7: wanwanthe ko arepa aho ngale ate tangnyu demko roamsongmin. 8ngale wanii pa phoangtherãng dângmin.’ Erohwah thin a wanii dangtumah, wathe lâdangtah. 9Erohwah chenpa Joban ma roapsiet eka arepa mihnyan nyuchha henmemin lephan sietmin.”
10Chenthu thinkhu humkhen nâng ngakwâng diko dijunte hehma Jisu nâng nginpa thôngphâ wah. 11Jisu ma thinnâng ngatwah, “Dela ma ate tangnyupa chiakphe lahma dihiak han mekep ako ate tangnyu demko kaamchhih lâmotah. 12Ererãngrãng dihiak memin ate tangwa pa chiakphe lahma dela hannâng methe wãngako ate tangwa demko kaamchhih lâmotah.”
Jisu ma Letachha hehnâng Rangkoh
(Mt 19.13-15; Luk 18.15-17)
13Mihnyan hehma Jisu tânâng letachha heh ate dekma sahloatrãng siethok kohwah, phumma mihnyan hehnâng dijunte hehma ritngatwah. 14Jisu ma erepa khelahma rinkhah wah, ngale ate dijunte hehnâng ngatwah, “Letachha heh ngatânâng chenwãngra, nekjektangen, chenrãngma ngako, Joban Hahsôngpa are letachha rãngrãng heh thiak. 15Ngama linlin thôkoh eka, henhenma Joban Hahsôngpa are letachha heh rãngrãng danglahma lekep dangeka, ereheh chenthumin rangkhethung nâng leta wãngmin.” 16Erediko atema letachha heh ate dekko khitwah, ngale chentô nâng sahlo lahma thinnâng rangkoh wah.
Techhu Wa
(Mt 19.16-30; Luk 18.18-30)
17Erethe kowah Jisu loatchhoan rãng ngatko, mihwa wathe chhoanhû lahma atemako khupjup hokwah, ngale atenâng ngatwah, “Hethôte Sen, ngama roantang roanjêng roandông chohrãng chenni moatmin a?”
18Jisu ma atenâng chhienwah, “Nangma nganâng asen ngama chenrãngroo ehanga?” “Asen henjô aho, Joban loloba asen etonga. 19Nangma are hôkum heh ajet: ‘Mih nekritphe; mihdihiak dela tungko kaamchhih nekmo; ahuh nekre; mihnâng ledangli nâng neksekhãm; mih nekdiap chhah; ngale nang nyong awa nginkepkep dango.’ ”
20Mihwa pumma dânthâng wah, “Hethôte,” “Are chentô hôkum heh ngama letachha thuma kepwah.”
21Jisu ma atenâng mînchen nungma thongthong sûlahma ngatwah, “Nang rãngma wanthe loloba lemeka. Wãnglohma nangnâng chhahkhem chentô tongho heh phangtang sengwãng lohma ngunpa tangchhih hehnâng koh o, ngale nanga rangkhethung nâng techhu thôan edango; erediko kalohma nga demnâng johchhoan hang.” 22Mihwa pumma are nginpa tatlahma, ate thhenpa khûjâwah, ngale hung keke ngakchhoanwah, chenrãngma ngako, atea nyahrãng techhu dângwah.
23Jisu ma ate dijunte hehnâng tûmlit phoangsû lahma thinnâng ngatwah, “Techhu hehrãngma Joban Hahsông thenâng wângpa chentolat a!”
24Dijunte heh ere nginko patrit rewah, rohkomin Jisu ma thinnâng ngatwah, “Ngachha heh Joban Hahsông thenâng wângpa chentolat a! 25Techhu heh Joban Hahsông thenâng tâwâng noma ut peba metku polo pumma eta lienlup a.”
26Are nginko dijunte heh nyahrãng barii lahma wathema wathe nâng chhienmînwah, “Eroh medang ako henkho tâpemin a?”
27Jisu ma thinnâng thongthong sûlahma dânthâng wah, “Mihnyan nyuchha rãngma arepa letadangli, rohkomin Joban rãngma chenjô letadangthin aho.”
28Erediko Piter ma loatjabwah, “Sûtan, nima chentôpa thinphe lihma nang dijun eki.”
29Jisu ma thinnâng ngatwah, “Danga,” “Ngale ngama nenâng linlin thôkoh eka, nekhu henhenma mâmâ humte tangkâ, pho anya, nyong awa, chhuchha, pit ajo heh ngarãng ngale Nginkongsen rãngma thinphe thien eken a, 30erehehma are rôanko ajah echohwak a. Châthethiak nomemin ajah hum ahah, pho anya, nyong awa, chhuchha, ngale pit ajo echohwak a, ngale mihma chêmchei thukmin echohwak a; ngale khediwah hokmin rôanko roantang roanjêng roandông echohwak a. 31Rohkomin, athângheh ajahthem khebeng thôan dangeka heh khedinâng elitdanga, ngale athângheh ajahthem khedi dangeka heh khekho elitdanga.”
Jisu ma Lôremrãng Ate Rit junma Jabwah
(Mt 20.17-19; Luk 18.31-34)
32Jisu le ate dijunte heh Jeroselem nâng wãng lahma lemnâng dângwah. Jisu ma dijunte heh mamako lemsên danglahma khôamwah, phumma dijunte heh bârit rewah; ngale thin diwah junkhôamte mihnyan heh achei rewah. Eredikomin rekthe Jisu ma ate dijunte heh sietchhoan lahma Jeroselem hahnâng ate khohnâng chenni hokmin a ereheh thôkoh wah. 33Atema thinnâng thôkoh wah, “Tattan en,” “Nãnga Jeroselem nâng wãngeki, enâng Mihnyan Chhapa soam aroakte adong ngale Niemarang hethôte heh deknâng ekoh a. Thinma ritphe rêmin ngama nginpat lahma Jews ledangte heh deknâng ekoh a, 34erehehma atenâng thãjô lembe ehôan ejôan a, ngale thoakkahma thoak erea, erediko wat rewak lahma ritphe erea; rohkomin jârem diko ate ngakhin erea.”
Jems ngale Jon ma Roatsep
(Mt 20.20-28)
35Zibidi chha Jems ngale Jon Jisu tânâng hokwah. Thinma ngatwah, “Hethôte,” “Nangma nirãng chenni komin momêng kohhi.”
36Jisu ma thinnâng, “Erepa chennia?” ngama thôngphâ wah.
37Thinma dânthâng wah, “Chenthu nang Hahsông phiak kowah Lowang Tongthinko metong tohko, nang demko dekhit wathe ngale dekchah wathe johtong thuk hi.”
38Jisu ma thinnâng ngatwah, “Nema chenni thaeken a arepa jetmet. Ngama chêmchei chohmin pa nema tatha en a? ngale Nga chenroh baptijem kepmin a eroh nema takep en a?”
39“Nima tae,” ngama thinma dânthâng wah.
Jisu ma thinnâng ngatwah, “Linlin nema nga chêm rãngrãng etachêm en, ngale chenroh ngama baptijem kepmin a eroh eta kepen. 40Rohkomin nga dekhit dekchah ko hentôngmin a arepa ngama tarenmek. Joban ma henrãng khoakhem kotah a erehehnâng atema ekoh a.”
41Chenthu ahan waechhi dijunte hehma erepa tatlahma Jems ngale Jon demnâng rinkhah wah. 42Ephumma Jisu ma phangtang roamroo lahma ngatwah, “nemajet Jews ledangte jat mihnyan heh khoko thin pênte heh leng achaanrii lahma pên eka, ngale thin lemsente khhepho phannang heh thinkhoko leng achaanrii eka. 43Phumma ererãngrãng pa nekhu nâng ledangmin. Nekhuwah wathe adongdâng mehun enko, nanga ahan heh haarãng dango; 44ngale nekhuwah wathe khekhodâng mehun enko, nanga anga nga haarãng dango. 45Chenrãngma ngako, Mihnyan Chha tumin mihma khoakhêmrãng katwah dangmah; atema mih khoakhêmrãng katwah ngale ate roandôngpa ajahthem mihnyan pesietrãng koheka.”
Jisu ma Mitdoak Bartimias Sênsiet
(Mt 20.29-34; Luk 18.35-43)
46Thin Jeriko nâng hokwah, phumma Jisu ate dijunte ngale loangchhang demko erehah kowah loatchhoan poatko, chutphhek chhahte mînpa Timaias chha Bartimias lemko tônglâwah. 47Chenthu atema Nazarat wah Jisu dankhoam eka ngama tatphumma, ate hôngrakwah, “Jisu! Devit Chha! nganâng mammînchen hang!”
48Ajahthem mihnyan hehma atenâng ritnga lahma kihchepchep tongo ngatwah. Rohkomin ate jêngjah jahchaanrak rakwah, “Devit Chha, nganâng mammînchen hang!”
49Jisu ma cheplahma ngatwah, “Ateroo en.”
Ephumma thinma mitdoak wapa roowah. Thinma ngatwah, “Khuhah nâhah dango,” ngale “Toanchep o, atema nangroo eho.”
50Ephumma atema khet heh koakphethien lahma, toaklahma Jisu tâko katwah.
51Jisu ma atenâng chhienwah, “Ngama nangrãng chenni moatkoh hun eko?”
Mitdoakwa pumma dânthâng wah, “Hethôte,” “Nga mitma khehun ekang.”
52Jisu ma atenâng ngatwah, “Choan o,” “Nangwah putedâlem pumma lâsensiettho.”
Phumma lemlienma jienkhe lahma Jisu diko lemko junkhôam chhoanwah.
Currently Selected:
MAK 10: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
