MAK 6

Nazarat nâng Jisu Thãsê

(Mt 13.53-58; Luk 4.16-30)

1Jisu erethe kowah chhoan lahma ate hahnâng katwah, eko ate dijunte hehmin junkatwah. 2Phumma Pientông jâko Jisu ma thinnâng hethô wah. Ereko jahmõang mihnyan dângwah; ngale chenthu thinma ate ngin chohtatko, phangtang bârit rewah. Thinma ngatwah, “Atema areheh chenwah chohjet eka?” “Henma are buthi mongthem heh atenâng kohlahma areheh jeteka?” ngale are patritli heh chenroh jienmo eka? 3Atea Mariam chha khoangtek tepa ledangne, ngale atea Jems, Josep, Juda, ngale Simon heh pho ledangne? Arekowah song eka heh ate naa dihiaknya heh ledangne?” ephumma thinma ate thãsê wah.

4Jisu ma thinnâng ngatwah, “Mõng heh chentô thenâng toak asân eka, thinnok ahah ngale thintang amang, erediko thinhumte tangkâ hehma lolo toak asân mah.”

5Atema eretheko chenni patritli moatlemjô jienta moho, ate dekma sahlo lahma khunte wathe wanii loloba mesietwah. 6Ate nyahrãng patritwah, chenrãngma ngako, mihnyan hehnâng putedâlem hothangma dângwah.

Jisu ma Echhi Wanii Dijunte heh Chienchhoan

(Mt 10.5-15; Luk 9.1-6)

Erediko erethe tûm arien wah hahdaang hehnâng Jisu phoangkhoam lahma Joban ngin phoang hethô wah. 7Atema dijunte echhi waniipa aroamma khôanroo lahma wanii waniima chienchhoan wah. Atema thinnâng juchhih heh junloat rãng chaan kohwah 8ngale atema thinnâng ngatwah, “Nedemnâng chennimin nekkep chhoan en, menthun loloba kepen - phhekchhah, tõng, ngale khetthok chhemchong, tõngnâng ngun akem min nek hènchhoan en. 9Dapheng phãngen, rohkomin chhemchong bâm nekkepen ngama ngatwah.” 10Atema thinnâng arohmin ngatwah, “Ne chenko tãngroo ehèn a, ere humko erethe kowah ne mangak ngakchhoan eko tongen. 11Ne letangroote ba ne ngin lekepte heh hahdaang nâng mehûkhoam enko, erethe kowah loatchhoan re en, ngale neda wah bum khep eka pemin finekthien re en. Erepa thinnâng achhih ngama ngat ranchâ thiakpa edanga!”

12Ephumma thin chhoan lahma mihnyan hehnâng thin papwah hunglit rãng Joban nginpa phoangthô kohwah. 13Thinma juchhih jahmõang junlo phekoh rewah, ngale ajahthem khunte hehnâng Oliv tienma hutko lahma mêsiet wah.

Jon Baptis Rit Ngin

(Mt 14.1-12; Luk 9.7-9)

14Hirot Lowang#6.14: Hirot lowang: Hirot Antipas, Galili pênte. ma are nginpa chohtatwah, chenrãngma ngako, Jisu mînpa chentô thenâng chohtatwah. Khaka mihnyan hehma ngatwah, “Jon baptis pa ngakhinwãng era! Erohwah atema are patritli moatlem heh tamoeka.”

15Ahân hehma, “Atea Ilija” ngama ngatwah.

Khaka hehma, “Atea mõng, tewa rôanpa nâng dangtah mõng heh rãngrãng” ngama ngatwah.

16Hirot ma arepa chohtat lahma, ngatwah, “Atea Jon baptis! ngama ate khopa thahdoakwah, phumma ate ngakhinwãng era!” 17Hirot ate dedema Jon loatkhhek rãng chienwah, ngale atema khhek lahma phâtek nâng sekwah. Arepa Hirot ma Hirodik ma ngat junko moatwah. Hirodikpa ate naa Filip tangnyu dângwahjô medang akomin Hirot ma ate tangnyu rãng thêkepwah. 18Jon baptisma Hirot nâng, “Nangma nangnaa tangnyupa nang tangnyu rãng takepmoh!” ngama ngatwah.

19Erohwah Hirodik ma Jon nâng nyahrãng chhihchoh lahma ritphe hunwah, rohkomin Hirot junko atema jienritpheho. 20Hirot pa Jon ranchei dângwah, chenrãngma ngako Jon pa mihnyansen ngale Asâthôan mihnyan ngama Hirot ma jet dângwah, erohwah atema pepâng lahma thienwah. Jon wah ngin chohtat roakweih Hirot hungjô mephaang akomin, atema Jon wah ngin jetat chîhunwah.

21Athôanko Hirodik ma Jon ritphe rãng wanthe helem chohwah. Erepa Hirot chhat rangwo jâko Hirot ma Galili wah chentô govmen sahhabdong, Sipâhi sahhabdong, ngale khhepho phannang heh roolahma phhekchhah ngetwah. 22Hirodik chha dihiaknya#6.22: Hirodik chha dihiaknya; wanwanthe nâng ate chha dihiaknya ngama raanglahma tonga. hûlahma bôangkohwah, eko Hirot le atema kuhhôan phhekchhah chhahrãng lemru rootah heh nyahrãng khuhahwah. Ephumma Lowang pumma dihiaknya ko ngatwah, “Nangma chenni hun ekoa? Nangma chenjô mehun okomin thahang arepa ngama ekoh e.” 23Ngale ajahthem toamsem jabkhab demnâng atema dihiaknya ko ngatwah, “Ngama toamsem ekang nangma chenjô metha hang komin koh e, nga Hahsông kowah khakajô metha hangkomin koh e!”

24Ephumma dihiaknya pa chhoan lahma, “Ngama chennitha anga?” ngama ate nyong nâng thôngphâ wah.

Ate nyong pumma, “Jon baptis khophangpa thao,” ngatwah.

25Dihiaknya pa lemlienma Lowang tâko ngakwãng lahma thâwângwah, “Are theko athâng thângheh Jon baptis khophangpa wankhoang nâng pehu kohhang!”

26Ephumma Lowang pa nyahrãng hungchhih wah, rohkomin kuhhôan thinwah ate lemru rootah heh nâtatko toamsêm wah dâng phumma atema dihiaknya ko jienkohmih ngama tadak tûho. 27Ephumma ate sipâhi heh Jon khopa thahrãng lemlienma chienchhoan wah. Sipâhi heh chhoan lahma phâtek khenkowah Jon khopa thahdoak katwah; 28erediko atema wankhoang nâng pewên lahma dihiaknya ko kohwah, ngale dihiaknya pumma ate nyong nâng wênkohwah. 29Jon dijunte hehma erengin pa chohtat wah. Phumma thin hûlahma Jon mangpa pechhoan lahma ruchhoanwah.

Jisu ma Hahjat Bangâ Mihnyan nâng Phhekchhah thuk

(Mt 14.13-21; Luk 9.10-17; Jhn 6.1-14)

30Moattat chhoante heh ngakhû lahma Jisu demnâng chohmînwah, ngale thinma motah le hethôtah heh phangtang thôkoh wah. 31Jisu le ate dijunte hehma phhekchhah chhah sanpoatjô lechoh mihnyan heh jahmõang hokte achhoante ditkhoam lahma dângwah. Erohwah Jisu ma ate dijunte hehnâng ngatwah, “Mihnyan henjô aho thenâng nãnglolo tongchhoan e, nemin poatthetô boantong mêngen.” 32Ephumma khôankhoma chhoan lahma mihnyan henjô aho thenâng thinlolo tongchhoan wah.

33Rohkomin jahmõang mihnyan hehma thin loatchhoanpa khewah, ngale mihnyan hehma atea Jisu ngama lemlienma jetloatwah; ephumma chentô hahdaang hehwah mihnyan heh loatchhoan lahma dakhôam lemma Jisu le ate dijunte heh tôngchhoanrãng ngaeka theko thinmama hokkhôam lâwah. 34Chenthu Jisu khôankho kowah loatkhôam katko, atema ere mihnyan khupa chohkhe wah, phumma atema thinnâng nyahrãng mînchenwah, chenrãngma ngako, thin a asokte ahoma phoanghâm ritwah saak rãngrãng dângwah. Ephumma Jisu ma thinnâng ajahthem ngin hethô wah. 35Sanhêmthah dâng phumma, ate dijunte heh Jisu tânâng wãng lahma atenâng ngatwah, “Nyahrãng sanhêmthah ledangtah, ngale aretheko mihnyan henjô songmah. 36Mihnyan heh chien chhoan eko, nãng kêanâ wah duken ngale hahdaang hehnâng chhoan lahma chenkomin chenri phhekchhah chhoanwak a.”

37Jisu ma dânthâng wah, “Nema chenni akomin phhekchhah thin koh en.”

Phumma thinma Jisu nâng chhienwah, “Nima thinnâng phhekchhah thukrãng chânii janngun ma chenri chhoankoh e#6.37: janngun pha: janngun phathe pa dekbi bithetha dângwah (Mt 20.2 ko tasûe). ngama thonghun ehia?”

38Ephumma Jisu ma thinnâng ngatwah, “Sûwãng tan en, Nenâng bankên chentô tonghèn a?”

39Erediko Jisu ma dijunte hehnâng mihnyan heh phangtang mâmâ khukhu hinkoh hehnâng phantongthuk en ngama ngatwah. 40Ephumma mihnyan heh châthema roak bangâ ma phântông thukwah. 41Erediko Jisu ma bankên wanbangâ ngale ngah laniipa sem lahma rangkhethung nâng sûwên lahma, Joban nâng dangkoh a ngalahma rangsoam wah. Atema bankênpa chhupsiet lahma ate dijunte hehnâng mihnyan hehnâng phenkoh en ngama kohwah. Ngale atema ngah lanii pemin thinkhu phangtang nâng phenkohwah. 42Anga ngama phoatphoat phhekchhah wah. 43Erediko dijunte hehma bankên le ngah bâ heh echhi phânii chõngchõng khôantôan wah. 44Erekowah jokphhek chhahte mihnyan heh hahjat bangâ dângwah.

Jisu Jokhohma Khôam

(Mt 14.22-33; Jhn 6.15-21)

45Jisu ma lemlienma ate dijunte heh khôankhoko chhang thuk lahma josi rankawah Batsida hahko ate mako dânwânglâ thukwah, erepoatko atema mihnyan heh chienchhoan wah. 46Mihnyan heh demnâng phânmîn diko, hahkong khonâng wãng lahma rangsoam wângwah. 47Chenthu sanhêmthah dâng phumma khôankhopa josi mongtãngnâng hûchoan dângwah, phumma Jisu a atelolo bamko dângwah. 48Jisu ma ate dijunte heh khôankho kowah thõngko rõngrõng khitwak lahma khewah, chenrãngma ngako thintâko pôngpông hokwah; Rangkhahkho wanrem le wanrok sanpoat tungko Jisu jokhohma thintanâng khôamhokwah. Atea thintâ pumma dânkhôamrãng ngatwah,#6.48: thinta pumma dankhoam; ba thindem nâng johroam. 49Phumma thinma Jisu jokhohko khoamlahma khewah. Ngale thinma, “Mihdâpha khe eki!” ngama thonghun lahma rak wakwah. 50Thin phangtangma Jisu khelahma patrit rewah.

Jisu ma thinnâng lemlienma rânjabkat lahma ngatwah, “Hungdongsiet en!” “Arepa ngae. Nekchei en!” 51Erediko atemin thindem ko khôankhoko johchhang wângwah, ngale pôngpôngpa jekrewah. Phumma dijunte heh nyahrãng bârit wah, 52chenrãngma ngako, hahjat bangâ mihnyan nâng phhekchhah thuk pejô thinhungma senthemthem jetmah; thin hungma erepa tajetlo wakmah.

Jisu ma Ginisarat nâng Akhunte Mesiet

(Mt 14.34-36)

53Thinma josi ranka dan lahma Ginisarat hahnâng hokkhôam wakwah, ngale khôankhopa erehahko khhekthien wah. 54Thin khôankho kowah jâkhoam chhoan rienrien mihnyan hehma lemlienma Jisu nâng jetloatwah. 55Ephumma mihnyan heh phoangchhoan lahma erethe kowah chentô mihnyan hehnâng phoangthô kohwah; ngale thinma Jisu chenriang nâng chohtat eka, eretheko thinma khoanchette mihnyan heh thinhemko jupthuk lahma pehok wah. 56Ngale chentô hahdaang, sumhah, ngale chentô thenâng Jisu phoangkhôam wah, ngale mihnyan hehma khun atamte heh Jisu diko bôjat nângmin junpehû lahma khoanchet sênrãngma nangkhet sakojô medang akomin mamsahlo thukmêngo, ngama roatsep wah. Ngale Jisu khetko sahloatte chentôpa sênwah.

Currently Selected:

MAK 6: NOKTBSI

Highlight

Copy