MAK 8

Jisu ma Hahjat Belii Mihnyan nâng Phhekchhah Thuk

(Mt 15.32-39)

1Erediko wah chentô letaangko ahan loangchhang dong wîenroam hokwah. Mihnyan hehnâng jokphhek chhahthin thôandiko, Jisu ma dijunte heh ate tâko roolahma thinnâng ngatwah, 2“Ngama are mihnyan hehnâng nyahrãng mînchen ekang, chenrãngma ngako, ngademko jârem lâjoh khoamthang, ngale ade phumma thinnâng jokphhek chhahthin chenjô ahotu. 3Ngama chenjô lephhek chhahthuk thangma humnâng mengak chienchhoan angko, lemko rêmritma chêm lahma môangweri wak a, chenrãngma ngako, wawathe pa taangmõang wah hûera.”

4Ate dijunte hehma Jisu nâng thôngphâ wah, “Are sehah kowah aretô mihnyan hehnâng lânle phhekchhah thukroh chenwah phhekchhah chohmin a?”

5Jisu ma thinnâng thôngphâ wah, “Nenâng bankên chentô tonghèn a?”

Thinma, “Wanengit tonghi” ngama dânthâng wah.

6Atema loangchhangko hahko tongen ngama chienwah. Erediko atema bankên wanengit pa semlahma Joban nâng dangkoh a ngalahma chhupsietwah, erediko ate dijunte hehnâng loangchhangko phenkoh en ngama kohwah; ngale dijunte hehma phenkohwah. 7Dijunte hehnâng ngahmin roanchhe dângwah. Jisu ma ngahrãng memin Joban nâng dangkoh a ngat rangsoam lahma dijunte hehnâng phenkohrãng chienwah. 8-9Anga ngama phoatphoat phhekchhah wah - erekowah mihnyan heh hahjat beliirãng dângwah. Erediko dijunte hehma bâachâ heh phâengit chõngchõng khôantôan wah. Erediko Jisu ma mihnyan heh chienchhoan wah 10Ngale lemlienma ate dijunte heh demko khôankhoko chhangwãng lahma Dalmanutha jaa nâng wângwah.

Farasi hehma Apatritli Moatlem Khesokhi ngama Ngat

(Mt 16.1-4)

11Farasi khuthe Jisu tânâng hûlahma ate demnâng chhiakmîn wah. Thinma Jisu bukritthuk hunwah, erohwah thinma Jisu nâng nanga Joban demwah kaero ngama jetrãng patritli moatlem molohma khesokhi ngama ngatwah. 12Phumma Jisu ma khòreksiet rãngrãng rowa lahma ngatwah, “Chenrãngma arerôan wah mihnyan hehma patritli moatlem khehun eka? ngama nenâng thôkoh eka! arerãngrãng patritli moatlempa are mihnyan hehnâng lekhesokmin!”

13Phumma thintâ wah chhoan lahma, khôankhoko ngakchhang kalahma joranka nâng ngakdânwâng wah.

Farasi ngale Hirot Wichhi

(Mt 16.5-12)

14Dijunte hehma bankên ajah lekep thangma lekphewah, khôankhoko thin demnâng bankênpa wanthe loloba dângwah. 15Jisu ma thinnâng ngatwah, “Jetletma dangen” “Farasi ngale Hirot wichhi wah jetletma dangen.”

16Dijunte heh thindede tungko jabmînwah: “Atema are ngaeka pa nãngnâng bankên aho dâng phumma ngaeka.”

17Thinma chenni jabmîn eka erepa Jisu ma jetloatwah, ephumma atema thinnâng ngatwah, “Bankên aho junko chenrãngma jabmîn eken a? Nema athângnâng majet ekenne? Nema tajetlo metne? 18Nenâng mit tonghèn - phumma mit pumma khemetne? Nenâng nâ tonghèn - phumma nâ pumma tatmetne? Nema thonghun metne 19ngama bankên wanbangâ pa hahjat bangâ nâng phhekchhah thuktekpa? Ngale nema bâachâ heh phâmeroan khôantoan tet a?”

Thinma, “Echhi phânii,” ngama dânthâng wah.

20“Ngale bankên wanengit pa hahjat belii mihnyan nâng phhekchhah thuktek pa thonghuntan en,” “Nema bâachâ heh phâmeroan khôantoan tet a?”

Thinma, “Phâengit” ngama danthângwah.

21Erediko Jisu ma thinnâng ngatwah, “Phumma nema athâng hehmin jetmetne?”

Jisu ma Batsida nâng Mitdoak Sênsiet

22Thin Batsida nâng katko, mihnyan khuthema Jisu tânâng mitdoak wathe siethu kolahma atenâng dekma sahloatrãng roatsep wah. 23Jisu ma mitdoakwa dekko sietlahma hahdaang kowah panthong liennâng sietchhoan wah. Jisu ma mihwa mitko thoakkahma thoakkoh diko ate dekma sahlo lahma atenâng chhienwah, “Jienkhe ekole?”

24Mihnyan pumma toaksûwên lahma ngatwah, “Ngama mihnyan heh khe ekang, rohkomin thin a bãngheh phoangkhôam wah rãngrãng khe ekang.”

25Phumma Jisu ma mihwa mitko ate dekma thengak sahloat kohwah. Erediko mihwa pumma senthemthem kanlahma sokwah, eko ate mitpa senchhoan dângwah, ngale chentôpa sâpoangpoang jienkhe wah. 26Jisu ma mihwapa humnâng chienwênwah, ngale atenâng ngatwah, “Hahdaangko nekngakwãng.”

Piter ma Jisu pa Ahin Joban Chha ngama Loatjab

(Mt 16.13-20; Luk 9.18-21)

27Erediko Jisu le ate dijunte heh Filipien wah Kasaria hah kêanâ wah hahdaang hehnâng chhoanwah. Lemko Jisu ma thinnâng thôngphâ wah, “Thôkoh tanha, mihnyan hehma nganâng hen edanga ngama ngaehanga?”

28Thinma dânthâng wah, “Khakama nanga Jon baptis ngaeho,” “Khakama Ilija ngaeho, ngale khakama mõng ngaeho.”

29Jisu ma ate dijunte hehnâng thôngphâ wah, “Nema chenroh thonghun eken a?” “Nememin nganâng hen ngama ngaeha?”

Piter ma dânthâng wah, “Nanga Misaia.”

30Erediko Jisu ma, “Nga junma mihnâng hennâng min nekthôkoh en” ngama ngatwah.

Jisu ma ate Chêmchei ngale Rit Junma Loatjab

(Mt 16.21-28; Luk 9.22-27)

31Erediko Jisu ma ate dijunte hehnâng hethô wah: “Mihnyan Chhama nyahrãng chêmchohmin, ngale khhepho phannang, soam aroakte adong, erediko Niemarang hethôte hehma ate roak atoak leweihmin. Atea ritphe erea, rohkomin jârem diko ngakhîn erea.” 32Jisu ma dijunte hehnâng chentôpa laangthô kohwah. Ephumma piter ma sietchhoan lahma Jisu nâng ritngatwah. 33Phumma Jisu litphong lahma, ate dijunte ahan hehnâng sûwên lahma, piter nâng ritngatwah. “Joak, nang ngatâ wah taangchhoan o,” “Nangma Joban ngewah thonghun dangmoh, mihnyan hungwah thônghun eko!”

34Erediko Jisu ma loangchhang ngale ate dijunte heh ate tâko roolahma thôkoh wah. “Nekhuwah henma komin ngadijun hun medang enko, nedede lekpherii letma, ne bãngphakpa peletma ngadijun ha. 35Chenrãngma ngako, nema nedede roandôngpa pêsietrit mehun enko, nema mahphe ere en; rohkomin ne roandôngpa ngarãngma erediko Nginkongsen rãngma memahphe enko, nema ne roandông pa eta pesiet en. 36Nema rangkhen kowah chentô sêmmak heh phangtang nerãng takep letma ne roandôngpa memahphe enko, nema chenni echoh en a? chenjô chohmet! 37Ne roandôngpa ngakchohrãng chenjô talit kohmet. 38Are Joban lejetrôan ngale papi rôanko mihnyan heh nganâng rêsê, erediko ngama hethô ekang nginkong rãngma rêsê mere ako, Mihnyan Chhamin ate Wa chaan keplahma Asâthôan ngintatte heh demnâng katjâko thinnângmin rêsê erea.”

Currently Selected:

MAK 8: NOKTBSI

Highlight

Copy