LIPOH 8
8
Kihmülüm Nyehcho
1Tsingrangba-nü Noa ko singkong la abi te kanglungrü apüm münbüchücho; Abinü nyübong khüdu chüro füsohcho ko kih tsü nyehnung dikehcho. 2Alih yonglang kihnatung ko ningchah kihmülüm trahtri khangticho. 3Tsing zahcho ko nyümong thsih khüdupü dhünyangla kih tsü nyehcho. 4Choo dhünyehla nyümong dhüredhünyeu nyümong singkong tsü Ararat zong chah nyehkehcho. 5Kih tsü mütozah nyehcho, ko choo dhürela akhudiba nyümong akhang amüjohti ngucho.
6Nyümong yüre khanglang Noa-nü nyübongkhi khüdu khangthrucho 7ko khüyahla khüdu müthehcho. Ta kih tsü mükung yingcheh, abinü müthalipü mongchi rachicho. 8Hütsüde Noa-nü kih tsü münyehnang müdhenung mümüdhrü khüdu müthehcho, 9ta alih tsü kihnü tingti lichonü mümüdhrü tsü amongkehnung müngucho. Abinü singkonglang thali mong wücho ko Noa-nü akheh tohchehchü nüyohcho. 10Adesü abinü nyümong dhünyeh lipü thali mümüdhrü tsü müthehcho. 11Anyüzehlang abinü aha la olive va axeng sho bipü thali rocho. Hütsü khu Noa-nü kih tsü kungko pü müdhecho. 12Adesü nyümong dhünyeh lipü mümüdhrü tsü thali müthehcho; ko adelü thali mürocho.
13Noa kang 601 azirü thsade, akhudiba choo la akhudiba nyümong, kih tsü nyehcho. Noa-nü singkong lüpticho tsü khangthru dhingcho, ko alih kungpü ngucho. 14Choo anyüula nyümong mükyüpü dhünyeh-u nyümong limih tsü kungchehpü licho.
15Tsingrangba-nü Noa te yocho, 16“Nüh, nünitpü, nütsurüti ko arüh nitpürüti singkong lanü chüdung. 17Ko limih jeng suchehnung uza ko kanglungrü apüm müthehchüng.” 18Achotsü Noa, anitpü, atsurüti ko arüh nitpürüti nüpü singkong lanü chüducho. 19Kanglungrü ko uza apüm palu palu hung singkong la tsünü chürocho.
Noa-nü Kangmübü Jücho
20Noa-nü Abüdongba khyang bholu khüdu külüpcho; abinü amüsa kanglungrü ko uza müipi lanü khüdu throcheh üpümshünü bholu chah kangmübü trüpcho. 21Kangmübü axümlichi tsünü Abüdongba künyangsohcho, achotsü Abinü alasih la yocho, “Nyitsarü thsacholanü adelü khodesü limih müchokehcholanung; abi azadenü amünyi lümlong tsü Ihnü müdhele. Ade roh-i kanglungrüsü khodesü Ihnü müchangsohnung. 22Limih müchangkade khyümnung ko xanung, arüh ko adhsa, tsingkang ko müyü, anyümong ko aromang khodesü müchangkapü linung.”
Currently Selected:
LIPOH 8: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
