JOHAN 17
17
Monoti Nengdang Dangkhidangnangcho
1Jisu-nü yu hiri chopü, ninglang dhingnü yocho, “Uwa, becho chihko. Atsurünü nüh hechinungthsa, nü Tsudhre hechisohng. 2Nühnü abi khyang jübati khyang abinü müchangkaba akang jünungthsa, nühnü amüi tsurü atümung michah abi khyang zii jüko. 3Ko müchangkaba akang adüzü yujeba Tsingrang, ko nühnü riwüsohba Jisu Khrista müdhenung. 4Nü ahechi Ihnü limih la hechisohko; ko nühnü I khyang nguchinung jücho nguchi tsü thümko. 5Uwa, limih müthride Ih nüte lide tu ahechi licho, hütsü ade nüpu linü hechisohng.
6“Limih lanü nühnü I khyang jübati khyang Ihnü nüh müdhesohko. Arühnü yo licho, ko nühnü arüh I khyang jücho. Arühnü nü yu nyicho, 7ko nühnü ade I khyang jücho lüpcho tsü nü chahnü rorepü arühnü müdhele. 8Nühnü I khyang jüba yu tsü Ihnü arüh khyang jücho, ko arühnü hütsü khyüchocho; ko Ih nü chahnü roba tsü yuje Ih nühnü müthehchoepü arühnü yudsicho.”
9“Ihnü arüh nengdang kihchire. Ihnü limih nengdang mükihchire, ta nühnü jübati nengdang kihchire, tunüo arüh nüyo lile. 10I licho apüm nüyo ko nü licho apüm I yo; ko I ahechi tsü hütsüri khu ngusohre. 11Ko Ih ade nüh yang rore; Ih limih la mülinung, ta arühlü limih la lile. Amüsa Uwa! Ihjü tu khüta khüdu liro, hütsü roh-i arühsü khüdu kang linungthsa, nü neng zii khüiba nühnü I khyang jücho, hütsünü arüh khümcho yohpüjüng. 12Ih arüh te lide nühnü I khyang jüba nü neng zii tsünü arüh khümcho yohpücho. Ihnü arüh tsungticho, ko amüsa yu tikehsohnung sü chahnung licho, abi chah khu arüh süsü müchah.#N. Khi 41.9; Jhn 13.18 13Ko Ih ade nüh yang rore, ko I akünyang arüh chah ajeng linung nengdang Ihnü limih la yu hiri chore. 14Ihnü arüh khyang nü yu jüko, ko limihnü arüh thrünyicho, tunüo Ih khüta limih yo mahro, hütsü kyo arühsü limih yo mah. 15Arüh limih lanü notsiengpü Ihnü nüte mükihchire, ta arüh amünyi chahnü khümcho yohpüngpü kihchire. 16Ih khüta limih yo mahro, hütsü kyo arühsü limih yo mah. 17Yuje tsünü arüh müsachehjüng; nü yu yuje lile. 18Nühnü Ih khüta limih yang müthehcho, hütsü roh-i Ihnü arüh limih yang müthehko. 19Arühsü nüte yuje la müsachehsohnungthsa, arüh khyanglangnü nüte Ipu jangjangthsa müsachehre.
20“Ihnü arüh nengdang du kihchirü mah, ta arüh yusi khu sürünü I chah yudsiro arüh nengdangsü kihchire. 21Uwa! Nüh I chah ko Ih nü chah licho kyo, arüh Ihsa chah lisohng. Ih nühnü müthehchoepü limihnü müdhenungthsa, arüh khüdu kang lisohng. 22Ihsa khüta khüdu liro, hütsü roh-i arüh khüdu du linung; 23Ih arüh chah ko nüh I chah; hütsünü arüh khüdu du kangnung, ko nühnü Ih müthehcho ko müicho kyo arüh mii müirepü limihnü müdhenung nengdang, ahechi nühnü I khyang tu jücho Ihnü arüh khyang jüko.
24“Uwa! Nühnü arüh I khyang jücho, hütsünü Ih khüde linang arüh hütsüla lisohnyüre; ko nühnü I khyang jüba Ih ahechi tsü arühnü ngunung, tunüo limih müthridenü nühnü Ih müicho. 25Amüsa Uwa! Limihnü nüh mümüdhe, ta Ihnü nüh müdhele, ko nühnü Ih müthehchoepü hirinü müdhele. 26Ihnü arüh khyang nüh müdhesohcho, ko nühnü Ih müiba tsü arüh chah linung, hütsünü Ihsü arüh chah linung nengdang, Ihnü mütozah hütsü roh-i nguchinung.”
Currently Selected:
JOHAN 17: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
