JOHAN 9
9
Anahtohjungpü Surocho Kyangjücho
1Jisu-nü lahkhu tside, anahtohjungpü surocho nyüh khüdu abinü mütohcho. 2Amonotinü abi te tsingdhingcho, “Adorü, sü münyinü abi nahtohjungpü suronungthsa kangcho? Apu münyinü a mahkhang tpurü münyi nüo?”
3Jisu-nü lalingcho, “Abi nahtohba tsü apu münyi mahkhang tpurü münyi nüsü mah, ta abi chah Tsingrangba zii mishanung nengdang. 4Atsingsela Ihsanü I riwüsohba nguchi nguchinung; tunüo sünüsü münguchichehnungthsa ama tsü tsehle. 5Ih limih la lide, Ih limih atsingse.”#Mat 5.14; Jhn 8.12
6Abinü hütsüta yoko khanglang, Jisu-nü alih la müjü müchohcho ko müjü tsünü lishe külüpcho; ko lishe tsü anahtse la müyühjüpü 7abi te yocho, “Wüng ko Siloam (adüzü “müthehcho”) kihting la nü romih müpieng.” Achotsü nyitsarüba tsünü wücho ko aromih müpipehcho ko ngunü thali rocho.
8Hütsüde, kurümrü, ko amüngu abi chingkichingnang ngurünü tsingdhingcho, “Pümpü chingkichingnang pümbasü hivi mahrü do?”
9Khürünü yocho, “Hütsüvi süe” ta aparü khürünü yocho, “Abi mah, kyotarü due.”
Hütsüde apu jangjang yocho, “Ih hütsüvi süe.”
10Arühnü abi te tsingdhingcho, “Nüh ade khüta nguro?”
11Abinü lalingcho, “Jisu dsiba nyitsarü tsünü lishe külüp I nahtse la müyühjücho, ko Ite wü Siloam la I romih müpipehnung yocho. Achotsü Ihnü wücho, ko müpipehyeng Ihnü ngunung kohcho.”
12Arühnü tsingdhingcho, “Abi khüde liro?”
Abinü lalingcho, “Ihnü mümüdhe.”
Farisirü-nü Akyangcho tsü Yangchicho
13Achotsü arühnü Farisirü yang amüngu nahtohko liba tsü nowücho. 14Jisu-nü lishe külüp anah trahsohba tsü Sabath nyümong thsacho. 15Hütsüde Farisirü-nü nyitsarüba te tsü abinü khütapü ngucho ko tsingdhingcho. Abinü arüh te yocho, “Abinü I nahtse la lishe müyühkehjücho, Ihnü I romih müpipehcho, ko Ihnü ade ngunung kohre.”
16Farisirü khürünü yocho, “Hi nguchiba nyitsarü tsü Tsingrangba chahnü müthsanunge, tunüo abinü Sabath nyümong yuzeng mübichi.”
Ta aparünü yocho, “Amünyi nyitsarü khüdunü khüta thsayahiya hiroh-i nguchichehnung?” Hütsüta arüh yola achangnah chürocho.
17Hütsünü Farisirü-nü adesü nyitsarüba te tsü yocho, “Nü nahtoh abinü kyangjüchoepü nühnü yore, khang nühnü abi nengdang tu yoro?”
Abinü yocho, “Abi azikehrü khüdu.”
18Ta Jihudarü langnürünü abi tpurü dsiro “Hi nührü tsurü mah-o pü arüh te mütsingdhingde yu müdsicho. 19Abi nahtohjungpü surochoepü nührünü yore, khang, ade abinü khütapü nguro?”
20Abi tpurünü lalingcho, “Abi ihrü tsurüe ko abi nahtohjungpü surochoepü ihrünü müdhele. 21Ta ade abinü khütapü ngunung kohro, mahkhang sünü abi nahtse khangthrujücho ihrünü mümüdhe. Apu te tsingdhing; abi lümjingko, abinü apu nengdang lalingnung kohnung!” 22Jihudarü langnürü drüchonü abi tpurünü hütsüta yocho, tunüo sünü Jisu tsü Mesia epü yudsinang Sinagog lanü iipehnung arüh yutrümpü licho. 23Hütsünü abi tpurünü yocho, “Abi lümjingko; apu te tsingdhing!”
24Anyüpiusü arühnü abi dsipü yocho, “Nühnü yuje du chonungepü Tsingrangba te nyengchoung! Nüh kyangjüba nyitsarü hi münyirü khüduepü ihrünü müdhele.”
25Nyitsarübanü lalingcho, “Abi amünyi nyitsarü a mahnang Ihnü mümüdhe. Ihnü lango du müdhele: I nahtohcho, ade Ihnü ngure.”
26Arühnü tsingdhingcho, “Abinü nü chah tu nguchicho? Abinü nü nah khüta trahsohcho?”
27Abinü lalingcho, “Ihnü nührü te yopehko, ta nührünü münyi. Tuepü thali nyinyüro? Nührüsü abi mono kangnyürü mah-o?”
28Arühnü abi münyüjo yocho, “Nüh hütsüvi monoe, ta ihrülü Mosa monoe. 29Tsingrangba-nü Mosa te chotachoepü ihrünü müdhele, ta hivilü khüdenünang ihrünü mümüdhe!”
30Nyitsarübanü lalingcho, “Hi khüta anyemüyangnungo! Abi khüdenünang nührünü mümüdhe, ta abinü I nah trahsohko! 31Tsingrangba-nü münyirü te mühnyire; ta abi jengreng drürü ko abi lümcho nguchirü te du nyirepü Ihsanü müdhele. 32Limih thridinü sünüsü nahtohrü trahsohcho müyuchidhing. 33Hiba nyitsarü hi Tsingrangba chahnü rocho müthsakhang, abinü tu münguchichehnung.”
34Arühnü lalingcho, “Nüh amünyi la nümüsucho ko nühnü ihrü thsingyunung mah-o?” Ko arühnü abi Sinagog lanü iipehcho.
Anbü Nahtoh
35Khode Jisu-nü atikehcho tsü yuchicho, abinü nyitsarüba tsü shiro abi te yocho, “Nühnü Nyitsarü Tsurü chah yudsirü mah-o?”
36Nyitsarüba tsünü lalingcho, “Adirü, Ihnü abi chah yudsinungthsa abi süo?”
37Jisu-nü abi te yocho, “Nühnü abi nguko, ko ade nüte sünü chotaro hütsü abie.”
38Nyitsarüba tsünü yocho, “Abüdongba Ihnü yudsire” ko Jisu jingte mükhukehcho.
39Jisu-nü yocho, “Nahtohrünü ngunung ko sürünü nguro arüh nah tohnungthsa yukhanung Ih hiba limih yang rocho.” 40Farisirü khürü hütsüla abi te yarünü hütsü yuchi abi te tsingdhingcho, “Ihrü mii nahtohrü mah-o?”
41Jisu-nü lalingcho, “Nührü nahtohlanglü, nührü mümülangbae; ta nührünü ngurechonü, nührü mülangre.”
Currently Selected:
JOHAN 9: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
