LUK 21

Chomitpü Amübü

(Mrk 12.41-44)

1Jisu-nü dhingmükangcho ko alirütinü amübü thsibong la arüh amübü yohcho ngucho, 2ko abinü ailümrü chomilarü khüdusü paisa anyüh yohcho ngucho, 3ko abinü yocho, “Ihnü nührü te yuje yonung, ailüm chomitpü hinü atümung tenü adrongu yohko. 4Tunüo aparü atümung tsünü arüh khütang licho lanü jücho; ta abükyünü, iilümsüseh, abükyü akang linung nengdang alicho apüm jüko.”

Amübükuh Thsangnyangnung Chocho

(Mat 24.1-2; Mrk 13.1-2)

5Mono khürünü amübükuh lung akhachehnü thsacho adhingnung khüta atsah atsa ko Tsingrangba khyang amübü jücho nengdang chota yade, Jisu-nü yocho, 6“Nührünü nguba hi apüm hila lung khüdusü ajojila müjonung; ko atümung trümnyangnung bekhyah tsü ronung.”

Dhsümthsedhsümloh ko Chongcha

(Mat 24.3-14; Mrk 13.3-13)

7Arühnü tsingdhingcho, “Athsingyurü, hi khode tikehnung? Ko hi tikehnung thsade amüdhethsa tu linung?”

8Jisu-nü yocho, “Nührü mükihyochüsohnung müzahng. Tunüo adrongnü I nengla ronü, ‘Ih abie’ ko Becho chihko pü yonung. Ta arüh tüiwü. 9Khode nührünü khata ko nyümta yusi yuchinang müci türohcho; hiri akhu tikehnung, ta hütsü achangkarü mah.”

10Abinü mütozah yocho, “Yuchonü yucho nyüm ko yanglihnü yanglih nyüm shemüsunung. 11Apümlang adrünung alihyo zingnung, yangkongdhsükong, ko arümra linung, ko ninglangnü adrünung ko amüdhethsa linung. 12Ta hiri tikehnung thsade, nührü rangnung ko dhsümthsenung; nührü Sinagog ko arangyoh kuh la nowünung; nührü yangthsarü ko governor bete noronung. 13Hiba bekhyah hi yuzithsanung nührü nengdang shikhe atsa khüdu linung. 14#Luk 12.11-12Nührünü khüta lalingnung tsehleh tülümxü, 15tunüo nührü rorüh sünüsü mülalingchehnung mahkhang müdongzinungthsa nührünü tu yonung Ihnü nührü khyang lümlong ko yu jünung. 16Nührü tpurünü, nührü jünirütinü, nührü tsutpurünü ko nührü shangrünü nührü khakhuchüjünung; ko nührü khürülü süsohnung. 17I thsacholanü atümungnü nührü thrünyinung. 18Ta nührü thah chah kuvapüm khüdu mii müchahnung. 19Drengdreng yang, ko nü jangjang nüh khümchonung.

Jisu-nü Jerusalem Thsangnyangnung Chocho

(Mat 24.15-21; Mrk 13.14-19)

20“Khode nührünü athrungrünü Jerusalem dhsutipü ngunang, hütsü thsangnyangnung thsakopü müdheing. 21Hütsüde sürü Judea la liro azonglang tsieng; sürü yangdila liro tsieng, ko sürü yangpilang wü liro arühnü yangdi lang tsü tüzüdu. 22#Hos 9.7Tunüo amüsa yula thrah licho tikehnung nengdang hirihi ‘Rühyangba Nyümongti linung.’ 23Hütsüri nyümongla khingkurü sürü longla liro ko akhunga liba atpati nengdang khütoh-i adrünung thsanung! Tunüo limih la adhsangthsi amülah hiri nyitsarü michah rihlong chüroba linung. 24Khürü nohshengnü kyüsehnung, ko aparü yucho apümlang rang hitsinung; arüh becho müchide müyudsirünü Jerusalem dhrümchinung.

Nyitsarü Tsurü Roba

(Mat 24.29-31; Mrk 13.24-27)

25 # Isa 13.10; Ezk 32.7; Joel 2.31; Mis 6.12-13 “Nyü, chonu ko chenghiti chah amüdhethsa chüronung. Limih la yuchoti apüm kiloh kihdi khongcho drüchonü lümdhama pehnung. 26Nyitsarünü lihküp michah atikehnung licho yingde adrüchonü sütünung, tunüo ningchah liba taseti shühnahnung. 27#Dan 7.13; Mis 1.7Hütsüde Nyitsarü Tsurü tsü nyükhila tase amülah ko ahechi la ronung. 28Khode hiri tikehmüsunang, shemüsung ko nührü ku tsungmüsung, tunüo nührü akangcheh amünyethsa lile.”

Ngurüsing khu Anyichoba

(Mat 24.32-35; Mrk 13.28-31)

29Hütsüpü Jisu-nü arüh te yukita khüdu yocho: “Ngurüsing ko apa singdongti apüm lümdhing. 30Khode nührünü arüh ava thümlang ngunang, müyü amünyethsa rolepü müdhere. 31Hütsü kyo, khode hiri tikehcho ngunang, Tsingrangba Yanglih tsü ronung thsakopü nührünü müdheing.

32“Ihnü nührü te yutsatsa yonung: hiri apüm mütikehkhangde, hiba shang mükhutsinung. 33Ning ko alih khukhang tsinung ta I yu khodesü mükhutsinung.

Khengyengnung Dhsütah

34“Alaa tsu ko yongnü hiba akang shulüm lümxüba ko müdengseh linung lanü nührü jangjang müzahng, mahkhang hütsü nyümong uzathsala roh-i dhrongyengnü nührü xohnung. 35Tunüo hütsü lihküp la apümlang nyitsarü atümung chah tikehnung. 36Atikehnung licho apüm lanü tsichehnung ko Nyitsarü Tsurü bete yachehnungthsa lede xengxeng ko dangkhidangnang.”

37 # Luk 19.47 Ko nyümong mükhu Jisu-nü amübükuh la docho, ta aromang abinü Olive zong la yüpcho. 38Nyangnyü mükhu nyitsarütinü mütoh amübükuhlang abi yu nyinung wücho.

Currently Selected:

LUK 21: SANGBSI

Highlight

Copy