Zenez 13
13
1Abranm ti kit Lezip, e retourn ver Negev avek son fanm ek tou sa ki i ti posede. Lot ti al avek li.
Abranm ek Lot I Separe
2Abranm ti en zonm tre ris. I ti annan bokou troupo zannimo, ensi ki larzan ek lor. 3I ti kit Negev e par letap, i ti al ziska Betel, landrwa kot i ti'n deza kanpe ant Betel ek Ai. 4La, dan sa landrwa kot i ti'n deza konstri en lotel, i ti envok SENYER par son non.
5Lot ki ti pe akonpanny Abranm, ti osi annan troupo mouton, kabri, bef ek son bann latant. 6Sa rezyon pa ti prodwir ase pour kapab siport zot de. Akoz zot ti annan tro bokou byen, zot ti nepli kapab reste ansanm. 7En dispit ti leve ant bann berze Abranm ek bann berze Lot. Bann Kananeen ek bann Perizit ti ankor pe reste dan sa landrwa.
8Alor, Abranm ti dir Lot, “Fodre pa ki i annan dispit ant ou ek mwan, ant ou bann berze ek mon bann berze, akoz nou fanmir. 9La pei antye i devan ou. Annou separe. Si ou al agos, mon ava al adrwat, e si ou al adrwat, mon ava al agos.”
10Lot ti lev lizye, e i ti war vale Zourden kot ti annan bokou delo. Avan ki SENYER ti detri Sodonm ek Gomor sa landrwa ziska ver Soar, ti parey zarden SENYER, parey Lezip. 11Lot ti swazir vale Zourden; i ti al ver Les. Alor, zot ti separe avek kanmarad. 12Abranm ti reste dan pei Kanaan, tandis ki Lot ti al reste dan bann lavil dan laplenn. I ti mont son bann latant pre avek Sodonm. 13Bann zabitan Sodonm ti move e zot ti komet bann aksyon tre grav kont SENYER.
Abranm I Al Hebron
14Apre ki Lot ti'n separe avek Abranm, SENYER ti dir Abranm, “Lev ou lizye e get otour ou. Depi kot ou ete, get dan Nor, dan Sid, dan Les, dan Was. 15Mon pou donn ou avek ou desandans pour touzour, sa pei antye ki ou war devan ou. 16Mon pou fer ou desandans vin sitan nonbre, parey lapousyer later ki personn pa kapab konte. 17Ale, eksplor sa pei antye, akoz mon pe donn ou tousala.” 18Abranm ti deplas son bann latant e al etabli li obor bann gran pye dibwa sakre Manmre pre Hebron. La i ti konstri en lotel pour SENYER la.
Currently Selected:
Zenez 13: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
