Zenez 23
23
Abrahanm I Aste En Latonm pour Sara
1Sara ti viv ziska laz 127 an. 2I ti mor Kiryat-Arba, setadir Hebron, dan pei Kanaan. Abrahanm ti pler lanmor son fanm, Sara.
3Apre, i ti leve kot lekor Sara ti ete e al koz avek bann Hitit. 4I ti dir zot, “Mon pe viv isi parmi zot koman en etranze. Vann mwan en propriyete koman en landrwa pour anter mon fanm.”
5Bann Hitit ti reponn Abrahanm, 6“Ekout nou mon senyer! Ou en gran sef parmi nou. Anter lekor ou fanm dan enn nou meyer kavo ki ou kontan. Personn parmi nou pa pou refiz ou en latonm pour ou anter ou fanm.”
7Abrahanm ti leve e prostern ater devan bann Hitit, e devan bann zabitan sa pei. 8I ti dir zot, “Si zot vreman dakor ki mon anter mon fanm isi, sipliy avek Efronn, garson Soar, dan mon faver. 9Demann li pour mwan aste kavern Makpela ki pour li, e ki lo bout son propriyete. Dan zot prezans, mon ava pey li pri ki i vo, konmsa, sa tonbo ava mon propriyete.”
10Efronn ki ti la pe asiz parmi bann Hitit ti reponn byen for pour tou dimoun tande, 11“Non, mon senyer! Dan prezans mon pep, mon fer ou kado sa propriyete e mon donn ou sa kavern ki lo la, pour anter ou fanm.”
12Abrahanm ti prosternen devan bann pep sa pei. 13I ti dir Efronn dan prezans pep sa pei, “Ekout mwan! Si ou dakor, mon pou pey ou pri sa propriyete. Aksepte sa larzan e mon ava anter mon fanm la.”
14Efronn ti reponn Abrahanm, 15“Mon senyer! Ekout mwan: Sa morso later i vo 400 pyes larzan; ant ou ek mwan, sa pa nanryen ditou. Anter ou fanm la.” 16Abrahanm ti tonm dakor avek Efronn. I ti pez lakantite larzan ki Efronn ti'n mansyonnen devan bann Hitit: 400 pyes larzan dapre mezir ki bann marsan i servi.
17Alor, Abrahanm ti aste propriyete Makpela, vizavi Manmre, ansanm avek son kavern ek bann pye dibwa ki ti dan son balizaz. 18Sa tranzaksyon ti ganny fer devan bann Hitit e devan tou bann ki ti'n vin kot laport lavil.
19Apre sa, Abrahanm ti anter Sara son fanm dan kavern Makpela, vizavi avek Manmre, setadir Hebron, dan pei Kanaan. 20Tou bann Hitit ti rekonnet ki sa propriyete avek son kavern, koman propriyete Abrahanm kot i pou anter son bann mor.
Currently Selected:
Zenez 23: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
