Zenez 28
28
1Izaak ti apel Zakob e beni li. I ti donn li sa lord: “Pa marye avek okenn fiy Kananeen. 2Al Padann-Aranm kot Betouel, ou granpapa. Pran enn bann fiy Laban, frer ou manman koman ou fanm. 3Bondye Toupwisan ava beni ou e donn ou bokou zanfan, pour ki ou ava vin en gran pep. 4I ava akord ou ek ou desandans benediksyon ki i ti donn Abrahanm, pour ou pran posesyon pei kot ou reste, ki Bondye ti donn Abrahanm!”
5Alor, Izaak ti fer Zakob ale. I ti al Padann-Aranm kot Laban, garson Betouel en Arameen, frer Rebeka, manman Zakob ek Ezai.
Ezai I Marye avek En Dezyenm Fanm
6Ezai ti war ki Izaak ti'n beni Zakob e anvoy li Padann-Aranm pour li al rod en fanm laba. I ti'n dir li, “Pa marye avek en fanm Kananeen.” 7I ti remarke ki Zakob ti'n obeir son papa ek son manman e al Padann-Aranm. 8Kan i ti remarke ki bann fanm Kananeen pa ti satisfer Izaak, son papa, 9Ezai ti al rod ankor en lot fanm kot Ismael, garson Abrahanm. I ti marye avek Mahalat, fiy Ismael, garson Abrahanm, ser Nebayot.
Zakob I Ganny En Rev
10Zakob ti kit Berseba e al Harann. 11I ti ariv dan en serten landrwa kot i ti pas lannwit, akoz soley ti'n deza kouse. I ti pran en ros koman zorye e dormi dan sa landrwa. 12I ti reve: En lesel ti sorti lo later e son latet ti tous lesyel. Bann lanz ti pe monte e desann lo la! 13SENYER ti pe debout devan li. I ti dir li, “Mwan menm SENYER, Bondye Abrahanm ou papa e Bondye Izaak. Mon pou donn ou ek ou desandans sa later kot ou pe dormi. 14Ou desandans pou nonbre parey lapousyer later e zot pou agrandi dan Was e dan Les, dan Nor e dan Sid. Atraver ou ek ou bann desandan, tou fanmir lo later pou ganny beni. 15Mon pou avek ou, mon pou protez ou e fer ou retourn isi. Mon pa pou kit ou ziska ki mon'n fer sa ki mon'n promet ou.”
16Apre, Zakob ti leve dan son sonmey. I ti dir dan li menm: Sirman SENYER i prezan dan sa landrwa e mwan, mon pa ti konnen. 17Sa landrwa i fer mwan per! Isi i vreman lakaz Bondye, laport lesyel i la.
18Zakob ti leve granmaten; i ti pran sa ros ki i ti'n dormi lo la e met li debout koman en pilye sakre. I ti vers delwil lo la. 19I ti apel sa landrwa Betel. Sa landrwa ti apel Louz avan. 20Zakob ti fer en promes: Si Bondye i avek mwan e si i protez mwan lo mon semen kot mon ale e si i donn mwan manze ek lenz, 21si mon retourn kot lakaz mon papa sen e sof, alor, SENYER ava vin mon Bondye. 22Sa ros ki mon'n fer en pilye avek e konsakre, pou vin lakaz Bondye. Mon pou donn ou en dizyenm lo tou sa ki ou pou donn mwan.
Currently Selected:
Zenez 28: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
