Zenez 33
33
Zakob I Rankontre Ezai
1Zakob ti lev son lizye e regarde. I ti war Ezai pe vini avek 400 zonm. I ti partaz son bann zanfan ant Lea ek Rasel e son de servant. 2I ti met bann servant ek zot zanfan devan, apre Lea ek son zanfan, e an dernyen Rasel ek Zozef. 3Zakob ti al par devan e i ti prosternen set fwa ziska ki i ti ariv pre avek son frer.
4Me Ezai ti taye pour al zwenn li. I ti may li dan son likou, anbras li e zot ti plere. 5Kan Ezai ti lev son lizye e war bann fanm ek bann zanfan, i ti dir, “Lekel tou sa bann dimoun ki avek ou?”
Zakob ti reponn, “Zot bann zanfan ki Bondye in donn mwan, ou serviter.”
6Bann servant ti aprose avek zot zanfan e prosternen. 7Lea ti fer parey e an dernyen Rasel avek Zozef ti vini e zot ti osi fer parey.
8Ezai ti dir, “Akoz ou'n anvoy tou sa group ki mon'n rankontre par devan?”
Zakob ti reponn, “Pour mwan ganny aksepte devan mon senyer.”
9Ezai ti dir, “Mon annan dekwa, mon frer, gard sa ki ou annan pour ou menm.”
10Zakob ti dir, “Non, mon sipliy ou, si ou aksepte mwan, alor, aksepte mon kado. Annefe, mon pe vin dan ou prezans konmsi dan prezans Bondye. Ou'n resevwar mwan avek bonte. 11Aksepte, mon ensiste ki ou pran kado ki mon'n donn ou, akoz Bondye in sitan bon anver mwan e akoz mon annan ase.” Zakob ti fors li e i ti aksepte.
12Apre, Ezai ti dir, “Annou kontiny nou semen e mon ava akonpanny ou.”
13Me Zakob ti dir li, “Mon senyer i konnen ki bann zanfan i feb, e ki bann zannimo ki pe donn tete i dan mon responsabilite. Si zot mars tro bokou pandan en sel zour, zot pou mor. 14Les mon senyer pas par devan mwan e mon ava swiv dousman dapre lepa mon zannimo ki devan mwan e dapre lepa mon bann zanfan, ziska ki mon ariv kot ou, Seir.”
15Ezai ti dir, “Les mwan kit en pe mon bann zonm avek ou.”
Me Zakob ti dir, “Pa neseser. I sifi ki mon ganny aksepte par mon senyer.”
16Ezai ti retourn Seir. 17Me Zakob ti al Soukot, kot i ti konstri en lakaz pour li, e fer bann park pour son bann bef. Alor, i ti apel sa landrwa Soukot, savedir, payot.
Zakob I Kanpe Sikenm
18Zakob ti ariv sen e sof sorti Padann-Aranm, dan lavil Sikenm, ki dan pei Kanaan. I ti kanp devan lavil. 19I ti aste sa later pour 100 pyes larzan avek bann garson Hamor, kot i ti kanpe. 20La, i ti fer en lotel e i ti apel sa landrwa: El, Bondye Izrael.
Currently Selected:
Zenez 33: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
