HONGTHONHOI CHHI 5
5
Anania Naiuso Safira
1Khaiunia tsak nian nou Anania naiuso apa tsammongnyiu Safira neüh lüko ngüne ün gohthang tsak jan. 2Apaüh amai nou ajantso apa tsammongnyiuüh lüko ngekü taiuwan, küta apoi nou kankü shikü hongthonhoi dongko taiu. 3Nungaih Peterüh sangkü ngiom, “Anania, Asio Onthso khako atsüotsüdekü chiteau, naiuso gohmai ajantso taiuwanau tiau Biya hau among mean-in? 4Nung mojankün khako ni ün noiküla; naiuso nung jankütün phiai ni nung tangka nou ni ün naito, tiau ni nungti chhiau thatsan? Ni khaiunia khako tsüde lüko Goa khako atsüotsüdekü chite-iu!” 5Tilai Ananiaüh nung ngio lula, apa nungko yaktaiukü loikü ean, naiuso nung lulatsün chikü thatü hat. 6Oumhoi nou shikü apa pem tsanloküta kankü khukü khanan.
7Gontao süme thatso noikütün phiai nung khako ti thawao nung tsüngekü apa tsammongnyiu nou sungh. 8Peterüh apatü sangkü ngiom, “Ajeüh goh nou nungtitsohe jan süne tsüde, ngütü angio?” Nungaih apaüh, “Ah, nungtitsohe jan” ta thalakü ngiom.
9Nai Peterüh nyiuhai noutü ngiom, “Apaou Onthso liluau titi thekü aje ngio jeiai-in? Athaplu, atsammongpo khantsünso koukhan dongko noin, naiuso ngüsoüh ni lüko kankü khu-e!” 10Nungailu apa dongko nung nyiuhai nou yaktaiukü ean. Naiuso nungko oumhoi nouso shikü, apa ekü epkü kankü saoküta apa tsammongpo khanthang shimkü khanan. 11Amonglamhoi apem nung ngiolutsünso thatü hat.
Ii Naiuso Athanga Nouso
12Hoi ongko hongthonhoi pha tsangkü ii naiuso athanga piakü chhisan, naiuso ngüso chikü mong tsak hau thekü Solomon tsamsuo ai noiküla. 13Lüko ngüsoko haau amaohai ongko sauüh tsümongsong, nungti lüko hoi nou ngüso mong losong-in. 14Apaou da monglamtsün nyiuhai naiuso pohaihoi piakü ngüsoko haove nai halut. 15Nungshioko Peter yanlükhun nai ngüso apa sohüh lüko ajantso sohjeiau thaiutha ngüsoüh akiahoi sonkeng nai niajikankü then naiuso sham chiai taiukiu. 16Naiuso loüh Yirusalem lemkü noksong nouso ainou khaiuniahoi nou akia nouso si angei onthso nou angjakü noinso aikü niakü shikü kamshi, küta ngüso khaiunia pungkü lomeikiu.
Hongthonhoi nouso Jeiat-in
17Lüko Akhengteng Meson naiuso apako noinso Sadokihoi apem niokia mongkhem nou mean, nungtiphe ngüso tü pha poh au ngüsoüh thatsan. 18Ngüsoüh hongthonhoi nouso tü pha pohkü ngüso keloküta noksong nai apin akhutsamai khothio. 19Lüko Apaou aünhong nou asoh akhotsam kou soppankiukü ngüso niasankü ngiom, 20“Asam khukü Amkham Tsam nai tsaküta khaiuniahoi nouso hau nung aa ayan thaiutha lüchite.” 21Hongthon nousoüh angiotsün angkü, ngüso Amkham tsamai sungküta atsandeau yalou.
Akhengteng Meson naiuso apa haisoüh Yihuda petchehoi nouso apem akhengteng ngiokam kamau thaiutha jonkam, nungaih akhotsam ainou hongthon nouso ngüso khako nialokü shiau thaiutha ngüsoüh ngiokhem kiu. 22Lüko kam petchehoi sauhai shin, ngüsoüh hongthonhoi nouso akhotsamai tsüep, küta laokü shikü ngiom, 23“Samüh akhotsam meikü kiapkü ep, naiuso ajimtsünso kuokhanko tsakü noiküla, lüko tilai samüh kuo soppan, tsammongai sau tsüep!” 24Tilai Akhengteng Meson nouso naiuso amkham tsam ehühoi nouso niakeitsün nou hongthon nouso tü ti thawaoküla nung lulan, nungko ngüso ngawan. 25Lüko khaiunia tsaküh shikü apatü ngiom, “Anglu! asamüh akhotsamai lothiotsün khaiuniahoi nousoüh amkham tsamai tsakü hoi nouso hau tsandeji.!” 26Nungai kam petchehoi nousoko petchehoi khu, naiuso hoi nousoüh lung yakkau hatkü ngüso tsümongmatkü nialokü shin.
27Hongthonhoi nouso achosanhoi ngiokam kamtaiunai nialokü nap, küta ngüso khako tsa-i, nungaih akhengteng meson nou ngüso tü sangkü ngiom, 28Apaüh ngiom, “samüh nung Khaiunia nou nianko tsütsandeau asam tü thatü mongkü ngiokhem kiuji.” “Lüko athaplu, asamüh ti chhin! Asamüh tsandetsün ngem nou Yirusalem meaniu, naiuso asamüh nung Khaiunia eantsün thaiutha aphio nou sam da sungiau aiuji.”
29Lüko Peter naiuso hongthonhoi nousoüh thalakü ngiom, “Samüh khaiunia noukoto Goa ngiobao angau noin. 30Yisu, sau asamüh paiphu tsak tü lalutkü loat, sam paosipo Goa nou apa ahkü shi-in. 31Apa nokpao naiuso aasantsün iulaau, naiuso Israelhai mongphokletsün naiuso angei wantsün kiuau thaiutha Goa nou apa uai noi-in. 32Nung thaiutha sam mitha noin, Asio Onthso sau Goa nou apatü angio angtsünso hau kiu-iu, apa lüko mitha noin.”
33Lüko tilai ngüsoüh nung lula, ngüso mongmat achiai sung, küta ngüsoüh hongthonhoi nouso loatau aiu. 34Lüko Farisihai naiuso ngiokhem tsandetsün asong tsak nou naiuso khaiunia apemüh asuhatkü loutsün khaiunia tsak nian nou Gamaliel, apa ajeiaikam nai tsakü khaiuniahoi jam kengchiai soi-iau ngiom, 35naiuso nungai apaüh achosanhoi noutü ngiom, “Israelhai, asamüh nung khaiunia nouso tü ti chhiji lütsüolo. 36Tititenai kümi naiüh Tudaüh apa chija asong ta shankü tsalou, naiuso apako khaiunia haove tsom püle hoilut, naiuso apa phiai hoiluttsünso chikü penglükhun küta titso tsüiula. 37Nungphiai Galilhai khaiunia tsak Yihuda nung niansattsün taoko shi, apa phiai khaiuniahoi asong tsak tailükhun, apa lüko loattan, naiuso apa phiai hoiluttsünso chikü pengkü khuwan. 38Lo, nung asamtü ngioko, nung khaiunia nouso tü titso lakankei, küta ngüso nungti lütaiu! Tititenai ayangtsün naiuso chhi nung khaiunia ainou naito, nung mowane. 39Lüko nung Goa ainou naito, asamüh ngüso mowaniau tsüshio-e, naiuso asambao Goa thako li-elatkü shithonane!” Ngüsoüh apatü ah, ta thalo. 40Tilai petche nousoüh ngüso dongai hongthonhoi jon, ngüsoüh hongthonhoi ta shiuh, küta Yisu nianko tsüchiteau ngiokhem kiukü hongan. 41Nungtiphe Yisu nian thaiutha amiam epkühau tinkü veha nou shioko monglingkü ajeiaikam ainou ngüso punge. 42Naiuso ajekhaiu tsütokü amkham tsamai si tsamai Yisu nung Khrista ta atsande naiuso achimtsün tsülao.
Currently Selected:
HONGTHONHOI CHHI 5: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
