LUK 2
2
Yisu Chettsün
(Mat 1:18-25)
1Nung ajekhaiu ko goumchi apemai nian sattao noin ta Caesar Augusta Akhengting nokshing ainou ngiokhem hong. 2Nung Quirinius Syria goumchiko nokshingpaou noinai aya niansat noiküla. 3Apem meshen nian satao meshen noksong ai khun.
4Yosep lüko Galil ai Nazaret noksong ainou Yihuda ai Betlehem ta jontsün, David noksongai sung, tititenai apa David kau naiuso tsammong ainou noiküla. 5Apaüh emkü noitsün Mari pemtsükengkü noinai, apa nian satao thaiutha khun. 6Ngüso Betlehem ai noinai, apa methso chettao ajekhaiu saojikan. 7Apaüh ayating melothso chet. Naiuso apaüh apa niothom ne nou nyingjeikü tsokap hetsün kim tsak ko taiu, tititenai ngüso anoiao tsampai tsünoiküla.
Onnemok Jimtsünso Naiuso Aünhonghoi
8Nung shingkhannio nouko onnemok jimhoi ahsu meshen onnemok jimkü noiküla. 9Apaou aünhong tsak ngüso shimkü tsakü Apaou ajinka ngüso lemkü thsalut. Naiuso ngüso thatü hatkü noiküla. 10Hong nou ngüso tü ngiom, “Tsühatkü lünoi! tititenai athaplu, ngü asam dongai khaiunia chikü thaiutha amongling asong ngem amei kankü shiji. 11Tititenai lonyi asam hao David noksong nai Aasantsün tsak chetkü noin; apa Apaou Khrista noin! 12Naiuso asam tü ii nou nung noi-e; asamüh methso tsak niothom ne nou nyingjeikü, tsokap hetsün kim nai saikü eppe.”
13Alekta aünhonghoi piakü sungkü Goa nian lomkü ngiom:
14“Asongting nai Goa tü ajinka,
naiuso goumchi ko apa mongtsamtsün khaiunia ongko aalou!”
15Tilai aünhong nouso ngüso ainou pungekü aün ai sung, onnemok jimhoi nou chitekü ngiom, “Ti Apaou nou sam tü nge-in naiuso ti sung, lo samüh Betlehemai saokü nung ta thapao khuko.”
16Ngüsoüh khaolaokü shikü Mari si Yosep neko methso nou tsokap hetsün kim nai saikü ep. 17Tilai ngüsoüh nung ep, methso nou thaiutha ngüso tü ngio ngiotsün nge-in. 18Nung luküta chikü nou ngüso tü onnemok jimtsünsoüh chitetsün thaiutha ngawan. 19Lüko Mariüh nung ngiotsün chikü mongai yangkü taiu. 20Ngüsoüh ngiotsün naiuso eptsün chikü thaiutha ngüso tü ngiotsünli, onnemok jimtsünsoüh Goa ajinka-ikü nianlomkü laokü shin.
Yisu Nian Niantsün
21Tilai apa tippanao ajekhaiu petjeinyi thapungjikan, aünhong nou thaimongai pem tsükengkü moiulakünai nian kiutsünli apa nian Yisu ta nian.
Amkham Tsamai Yisu Losiotsün
22Tilai Mosa Ngiokhemli ngüso losiotsün ajekhaiu saojikan, Yosep si Marineüh methso nou Apaou hao kiuao thaiutha Yirusalemai kanlükhun. 23Tititenai Apaou ngiokhem nai satkü noitsünli! “Aya chet nou melothso pungkü Apaou tü asio ta jone.” 24Apaou ngiokhem nai ngiotsünli, mükham nime tsüdekünai chongmükam thso nime ngüsoüh chaithio kiuao shin.
25Nung taoko Yirusalemai khaiunia tsak nian nou Simeon; nung asio naiuso don nai mongkiukü tsüojintsün noiküla. Israel kipsanao nou thaiutha apaüh taiukü; naiuso Asio Onthso apa khako noiküla, 26naiuso Apaou nou thaloutsün Messiah moepkün lektso apa tsü-e-e ta thatkü noiküla. Asio Onthso nou niakü apa Amkham Tsamai sung. 27Tilai Yisu methso thaiutha ngiokhem saili kankeiao posinyiu nou apa kankü shin, 28Simeonüh apa pha nou Yisu loum, naiuso Goa lomsankü ngiom; 29“Lo Apaou, ni angioli, ni yathsüotsün aalu nai lüpunge-i. 30Tititenai Melemaohoi tü awon achiai sungao naiuso asahoi Israel tü achiai sungao naiuso asahoi Israel ajinkaao thaiutha, 31Sübao ni hoi nouso kha chikü khako khemlu-iu; 32Jü nioveiüh aasantsün epiu.”
33Apa posinyiu ne apa thaiutha chitetsün nou ngakü noi. 34Simeonüh ngüso oukkiu naiuso apa nyiu Mari tü ngiom, “Nung methso nou Goa nou Israel nai aloianiao naiuso akipsanao thaiutha chosan. Apa thako khaiunia piakü chiteao apa Goa ainou ii tsak noi-e. 35Naiuso ngüso akhei mongyang achiai sungi-e, naiuso sah amon nou hetsünli, amongsaiu nou asam meshen mongpem lothe-e.”
36-37Nungai jihi E-nyiu tsak nian nou Anna, Asher kau ainou Fanuel thso noiküla. Apa meso tao apa tsammongpo ko pon chinyat kihakütün phiai lo pon aopetjeikü püle ngoikü apaüh Amkham Tsam tsüle; Apaüh ahsu naiuso ahnyi tsüyangkü Goa amkhamkü keithon naiuso misaokü noiküla. 38Nung taokolu sungkü apaüh Goa hao nianlom kiu naiuso Yirusalem aasan thaiutha taiutsünso chikü tü methso nou thaiutha chite.
Nazaret ai Laokü Shiji
39Tilai Apaou ngiokhemli ngüsoüh chhi apem khemküshin, ngüso Galil ai noitsün meshen noksong Nazaret ai laokü shin. 40Methso nou songjikan, naiuso oukongkü iulan; apa mongyang ahaopungkü iula naiuso Goa ouk apa khako noiküla.
Methso Yisu Amkham Tsamai
41Pon tsütokü Yisu posinyiu Aasantsün Sümai taoko Yirusalem ai sung. 42Tilai Yisu pon chekü nime ngoi, ngüso sümai nai haao Yirusalem ai sung. 43Tilai sümai ajekhaiu thonkü shin, ngüso laokü yanai, Yisu Methso tsüyahakü Yirusalemai noian. 44Naiuso apa posinyiuüh nung tsüngekü, lüko apa haiso ongko noi-e ta yangkü ngüso ajekhaiu tsak yam khuwan. Nungai ngüsoüh tsammonghoi naiuso haiso ongko apa tü yam, lüko tilai ngüsoüh apa tsüep, 45apa tü yamkü Yirusalem ai laokü khushi. 46Ajekhaiu samnyi khukütün phiai ngüsoüh apa amkham tsamai atsandetsünhoi jetko ngüso ngio angkü naiuso ngüso tü ngio sangkü moknoikü ep. 47Apa ngio lutsünso chikü nou apaüh ngetsün naiuso thalatsün nai ngawan. 48Tilai ngüneüh apa ep, ngüne ngawankü apa nyiuüh apa tü ngiom, “Methso, tiau ni sam tü nungti kankei? Apo si ngo mongtsonkü ni tü yam.”
49Apaüh ngüne tü ngiom, tiau asamüh ngo yamji? “Ngo jü po tsamai noi-ela ta asamüh tsüngeso?” 50Lüko apaüh ngüso tü ngiotsün ngüsoüh tsüngela.
51Apa ngüso ko Nazaret ai shin, küta ngüso ngiokhem ko noi. Naiuso apa nyiuüh nung ngiotsün chikü meshen mongai taiu. 52Yisu mongyang nai, pem nai, Goa naiuso khaiunia khako atsüojin nai songjikan.
Currently Selected:
LUK 2: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
