Ranehlö 41
41
Vë-eny Manah Heūvö Ök Rācha Ang Yôsĕf
1Ngaich ngö inlahen, i kinheūṅtö nuk tö nët samyeūheu, heūv ngaich ang Fërō: ngaich, yĕh meuk, sökhaka angā-aṅ nö ikui öp tahël. 2Ngaich, yĕh meuk, sat nòng nuk umuh kan nuā meutlö nö ṙā-ang ël ök tahël, tökôlò, alāhavö inrē; nyā-aṅvkuö anū-ö tö rōi tafūyu. 3Ngaich, yĕh meuk, sat nòng nuk tahëng kan nuā meutlö nö unôichrit u nö ṙā-ang ël ngam tahël, tötkôlò, tölëv inrē; ngaich sökhaka nö ranghö nuk tahëng kan nuā nö ikui ngam Tahël. 4Ngaich nuk tötkôlò, tölëv inrē kan nūā nö kāngö nuk tösat nòng tökôlö, tö-alāhavö inrē kan nuā. Aṅhen ngaich Fërō. 5Haṙòh ngaich angā-aṅ, ngaich heūv im innët heuh: ngaich, yĕh meuk, sat nuk nëlö sāiny tösīöpnyi nö i rōi ök töhēngö kaha, tökôlò, tölöök inrē. 6Ngaich yĕh meuk, sat nuk nëlö töcheukyeung, töngāṅvngö inrē tökūö kuföt chuhöt, sīöplö nö unôichrit u. 7Ngaich nuk töcheukyeung nëlö nö ngeūṅktö nuk tösat tökôlò, tö tö tööḵlö inrē nëlö. Aṅhen ngaich Fërō, ngaich, yĕh meuk, höng heūvö angū-ö. 8Ngaich ngö inlahen im peuheū, ök ellōn ò nö kihngen; ngaich tīnngö mahavëken yik tömilūönö angā-aṅ aṅ Aikup, ṙòkhöre inrē yik tö-akāha tarik umuh: vë-eny ök heūvöre ngaich Fërō nö in cha; ngaich öt hĕng tak tökô nö vë-eny manah u nö in Fërō.
9Kaknyöre ngaich nö in Fërō ök yöngkūö yōm nyā-aṅkūö, nö ngöṙô, Fē-ĕlre chin i ngih sakāmö tö nuk fālen chu: 10Tainy ang Fërō töyik mahalanṙenre, ngaich chaphöt chu latuhēt el patī öp yöngkūö amahati, chū-ö tök mākuö vamī rôtī inrē: 11Hēngö hatööm āyö ngaich, angā-aṅ töchu inrē, ai heūv heūvö; köheūvö āyö, ngaich nuk heūvö ai nö kö asā manahre. 12Ngaich hĕngtak ap umuh ṙāltarik hol ih Hiprū apa; mahalanṙen öp yöngkūö amahati; vë-eny nang ò ngaich āyö, ngaich angā-aṅ nö vë-eny manah nuk heūvö ai; kö asā nuk heūvö ai ṙô angā-aṅ nö vë-eny manah. 13Ngaich ngö inlahen, teungtökūö angū-ö, sā ök ṙô ò nö vë-eny manah, havanten chu anga-aṅ el chūök minā-aṅre, kiseutngö ök umuh angā-aṅ.
14Ngaich Fërō nö tīnngö mahavëken Yôsĕf, ngaich kurāten chā-a nö kēnyen ò nö ṙā-ang el kinlōngö: kuhāköre angā-aṅ ngaich, haṙī-il hilāre inrē, ngaich kuhēthötre nö in Fërō. 15Ngaich Fërō nö ngöṙô tö Yôsĕf, Heūvheūvö chin, ngaich öt hĕngtak tökô nö vë-eny manah e: ngaich hang ineūkö meh chū-ö, tö meh yē meh hang heūvö, ngaich kô öm vë-eny manah e. 16Ngaich ngöṙô Yôsĕf nö sapṙô Fërō, Öt in chu ön: kē-ĕkūö Fërō An min ngam Tēv tö sanap ṙô aṅ i lanāmö. 17Ngaich vë-ekūö Yôsĕf ang Fërō, Yĕhmeuk, ip heūvö chu, sökhaka chū-ö ikui ngam tahël: 18Ngaich, yĕh meuk, sat nòng nuk umuh kan nuā meutlö nö ṙā-ang ël ngam tahël, tö-alāhavö, tökôlô inrē; ngaich anū-ö nö nyā-aṅvkūö nö i rōi minë tafūyu: 19Ngaich, yĕh meuk, sat nòng nuk tahëng kan nuā, unôichrit u nö meutlö, öt kôlô, höng lëv inrē, öt meuk tö ngatī öt kanôlô chin ing panam Aikup nö ṙòkhöre: 20Ngaich nuk tölëv tötkôlò kan nuā inrē nö kāngö nuk mu-urĕh tösat nòng kan nuā: 21Ngaich hē u nö keuheūtökūö nö kāngö u, öt akahaiṙen anū-ö töre nö kāngen u, ngaich pöri anū-ö nöng sön nöng ötkôlò höng sāre tö lā-urĕh. Ngaich aṅhen chū-ö. 22Ngaich meuk chū-ö ip heūvöre, ngaich, yĕh meuk, sat nup nëlö sīöpnyi nö i rōi öp tö hēngö kāha, tö tööḵlö, tökôlò inrē: 23Ngaich, yĕh meuk, sat nup nëlö tönyangngö, cheukyeung, ngāṅvngö inrē tökūö kuföt chuhöt, sīöplö nö unôichrit u: 24Ngaich nuk tösat töcheukyeung nëlö nö ngeūṅktö nuk tösat tökôlò nëlö: vë-eny e chū-ö ngaich i yip tömilūönö; ngaich öthĕng tak tökô nö vë-eny e nö in chu.
25Ngaich Yôsĕf nö ngöṙô tö Fërō, Höng hĕng an ngam heūvö Fërō: vë-eny nang Fërō an ngam Tēv töp tīre. 26Minë tö sat nòng tökôlò kan nuā; minë tösat tökôlò nëlö; tösat samyeūheu nun: höng hĕng an ngam heūvö. 27Ngaich nup tölëv tötkôlò kan nuā tösat nòng, nup mu-unôichrit u nö meutlö; tösat samyeūheu nun; ane inrē nup tösat töt aṅhanv nëlö töngāṅvngö tökūö kuföt chuhöt inyāchö nun min nö sat samyeūheu. 28Anū-ö nun ṙô chu tö Fërō; Hameukhömat Fërō An ngam Tēv töp tīre. 29Yĕh meuk, yih nup tösat samyeūheu tanëḵeṅ ṙòkngöre chūök nö ing panam Aikup: 30Ngaich unôichrit u min, sat samyeūheu öp inyāchö; ngaich vāchi min nö ṙòkhöre nup tanëḵeṅ nö i panam Aikup; ngaich öp inyāchö min nö keuheūt töng panam; 31Öt akahaiṙen min ngam tanëḵeṅ nö im panam tökūö öp inyāchö, pò e min nö kiröngen. 32Pòkūö ngam heūvö nö nët heuh hineūvö, nö nët van nö in Fërō: kūö e nö haköpiyö tö ngam Tēv, ngaich hataichtökūö e min ngam Tēv öt ṙôktörevö. 33Lökten ön yĕh Fërō nö ngëichkö öp tarik tö-akahaṙa, töhuveū-en inrē, ngaich ha-ūichlen ò nö ikui ngih panam Aikup. 34Ngö inlahen ön yĕh Fërō, hökngen ò inrē nö vīlö yip mameuka nö ikui ngih panam, ngaich kē öp tinneui milā-a ngam panam Aikup, isaha nup tösat samyēuheu tanëḵeṅ. 35Ngaich hökngen cha nö hamūl nup nyā-aṅkūö nö ṙòkhöre i nup yamih tökôlò samyeūheu, ngaich hamūlngö nup sāiny nö el katòh Fërō nö nyā-aṅkūö i në el panam, ngaich hökngen cha nö hayōmö e. 36Hachūöki min ngam nyā-aṅkūö nö im panam nö hanöng nup tösat samyeūheu inyāchö, nup mi-i ngam panam Aikup min; hòṅ ngih panam nö öt lëlngö tökūö öp inyāchö.
Vīlöngö Yôsěf Nö Hayöngö Aikup
37Ngaich angū-ö nö löök nö ikūö Fërō, ikūö yik tarik ò inrē nö ṙòkhöre. 38Ngaich ngöṙô Fërō töyik tarikre, Kô-òren öi kôtökūö tö tösā tö ngatī, öp tarik tö-īnu tö ma-alāha aṅ im Tēv? 39Ngaich ngöṙô Fërō tö Yôsĕf, Pön ngaich ngam Tēv nö hameukhömat meh tö në nö ṙòkhöre, öthĕngtak töngatī tö-akāhaṙa, töhuveū-en inrē nö sā meh: 40Më-eṅ man ngaich mahayōm ngih patī chu, asā öp ṙô meh vē tarik chu min nö ṙòkhöre nö hayöngö: höng el kantēra chū-ö min kiröng tö meh. 41Ngaich Fërō nö ngöṙô tö Yôsĕf, Yĕh meuk, ha-ūichlöng man ngaich ikui ngih panam Aikup nö ṙòkhöre. 42Ngaich ang Fërō nö silötnyö ök kinlong nö ṙā-ang in re, ngaich silöthöt ò nö in Yôsĕf, hayutlen ò inrē tö tö-aṙū-uti inyut, tövai linen inrē, hūöttö ök humlum sayōk inrē nö i likeun ò: 43Ngaich hōḵten ò angā-aṅ nö ël ök innëtö inröl ök in ò; ngaich chā-a nö urēhĕkūö ò nö hūḵa, nö ngöṙô, Simtökui kinmônöre: ha-ūichlen ò angā-aṅ ngaich nö ikui ngam panam Aikup nö ṙòkhöre. 44Ngaich ngöṙô Fërō tö Yôsĕf, Chū-ö chin Fërō, öt tarīku min mahachônglö këlre hēk kumchöötlö kalröönre nö öt lökngörit in meh ing panam Aikup nö ṙòkhöre. 45Ngaich kaheuk minë-eny Yôsĕf ang Fërō nö Safenatpaneah; ngaich kētö pīhö ò angā-aṅ tö Asenat ök kikānö kūön Pòtifera, ök kūönṙô, aṅ On. Ngaich Yôsĕf nö kiröönkūö ngam panam Aikup.
46Lūöi anāi samyeūheu ṙēti Yôsĕf hē ò nö ikūö Fërō nö sökhak. Kiröönngöre ngaich Yôsĕf nö ṙā-ang ikūö Fërō, ngaich chuh i nuk panam nö ṙòkhöre i Aikup. 47I minë tö sat samyeūheu tanëḵeṅ, ngam tumlat nö pōyen aṅ. 48Ngaich angā-aṅ nö hamūllö nup nyā-aṅkūö nö ṙòkhöre nup im panam Aikup, i minë tö sat samyeūheu, ngaich halinngen minë nyā-aṅkūö i minë elpanam: minë nyā-aṅkūö el panô-òṅ, nup mahavīlö nup panam, in u tī angā-aṅ nö halinngen u. 49Ngaich nup sāiny halinngen Yôsĕf nö sā ṙôken kuyāyö ngam mai, hanöngsaha ò nö ṙāngôṅre nö kaheuk; pò e nö öt kanṙeūken.
50Ngaich nëttak nak nyīö kikōnyö tö fötnyu kūön Yôsĕf urēhĕkūö ngam yanīhih ngam samyeūheu inyāchö, kayôḵnyö Asenat, kūön ò, ök kikānö kūön Pòtifera, kūönṙô aṅ On. 51Ngaich Yôsĕf nö kaheuk minë-eny ök lanòh nö Manasē: pò ngam Tēv, nö vīten chu vaichngö tö nuk kanihngen chu nö ṙòkhöre, tö patī ap yöng chu kikōnyö inrē. 52Kaheuk minë-eny ök innëtö angā-aṅ nö Ifrēm: Pò ngam Tēv nö vīten chu mikūönlö i panam kanihngen chu.
53Keuheūten ngaich minë tö sat samyeūheu tanëḵeṅ im panam Aikup. 54Rultöre ngaich nö yih minë tösat samyeūheu inyāchö, nöng sa ṙô Yôsĕf: keuheūtngöre chūök ngaich ngam inyāchö nö i minë panam; nyā-aṅvkūö pöri i minë panam Aikup; nö ṙòkhöre. 55Ngaich hē minë panam Aikup nö ṙòkhöre nö aheuk; ngaich yik tarik nö peuinyhökūö Fërō tö yik aṅ Aikup nö ṙòkhöre, Chuh in Yôsĕf yin kuṙòh; öp töng ṙô ò tö yīö, ngatī yī-ö. 56Ngaich ngam inyāchö nö keuheūtngöre chūök nö ikūö ngam tumlat: ngaich Yôsĕf nö löpnyökūö nuk patī chūök sāiny nö ṙòkhöre, ngaich inyīhihkūö yik aṅ Aikup; kalēḵ ngam inyāchö ngaich nö im panam Aikup. 57Ṙòkhöre nuk tahëng pumnāmö nö yih nö i Aikup nö in Yôsĕf nö havah sāiny; pò ngam inyāchö nö kalēḵ nö i minë panam nö ṙòkhöre.
Currently Selected:
Ranehlö 41: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
