T. LŪKÖS 15
15
Tö Chatngen Pököre
(Mt 18.12-14)
1Ngaich ṙòkhöre yik mahamūl ṙāi kinehet chehen, yik tököölö fālen inrē, nö ṙūötöre nö hòṅ hang ṙô Ò. 2Ngaich ngö ṙô yik Feresī, yik kamūich inrē nö vëken Ò, Hōḵen tököölö fālen ön ngòh tarik; nya-aṅvkūö inrē nö holkūö cha. 3Ngaich ngö ṙô Anga-aṅ tö cha, tö ngih inchōḵoṙô,
4Achīö ap öre tö yīö öp tö hēngòng pököre; ngaich hĕng nòng öp töchatngen; öp tötṙamāngö nup tömachūötör anāi machūötör nö el-inchōn, ngaich chöh ngam töchatngen hanöng saha kanôtökūö ò. 5Ngaich yē ò nö kôtökūö, tayūkö ngaich tö ò nö elranôṙö ò nö ṙāmōlön. 6Chalô anga-aṅ nö i patīre, have-eti tö yip holre hanöngkisānöre inrē; ngaich ngö ṙô anga-aṅ tö cha, Hanôltö ṙanāmölōnre yin in chu; tön kôtökūö chin tö ngòh pököre chu, ngòh töchatngen. 7Ngö ṙô chin tö yīö, Ngatī ṙanāmölōn min nö el halīöngö i ngòh töhĕng taka tököölö fālen, mahavöötö ellōnre; mööḵlö tö yip tö machūötör anāi machūötör tölöök tarik, yip tö rö-öv nö hòṅ havöötö ellōnre.
Tö Chatngen Rupīö
8Hēk achīö ap öre kikānö, tö söm tāk rupīö, ngaich hĕng hang tāk öp töchatngen; öp töt tamôttökūö ëṅāvö; ngaich fòh ël ngam patī, haṙēmngenre nö chöh, hanöng saha kanôtökūö ò tö e. 9Maichtöng kôtökūö anga-aṅ tö e, have-eti ngaich tö yip holre, hanöngkisānöre; nö ngö ṙô, Hanôlò ṙanāmölōnre yin in chu; tön kôtökūö chin tö ngih töchatngen rupīö. 10Ngö ṙô chin tö yīö ngati ap ṙanāmölōn i kūö yip ma-ahānga ngam Tēv, i ngòh tö hĕng tak tököölö fālen mahavöötö-ellōnre.
Kūön Tö Chatngen
11Ngaich ngö ṙô Anga-aṅ, Hēng taka öp tarik tö nët tak kūön. 12Ngaich ngö ṙô öp manāngö töp yöngre, Kayöngö; kē-ĕkūö chu man, tö nup mine-eny chu chehen. Ngaich anga-aṅ nö katölhökūö cha tö nup chehenre. 13Ölu nö ṙōlhang sumkam, hē ngam manāngö nö halēnnup chehen, kiröönngöre ngaich nö chuh tö marôvat panam. In e anga-aṅ ngaich nö mëichngö nup chehen, nöng ötlēnen. 14Keuheūthëtī anga-aṅ tö u, chalôḵ ngaich ök yöng inyāichö im panam; ngaich anga-aṅ nö ötkôlò. 15Feus anga-aṅ ngaich, nö hamūltöre nö hĕngkangchūök nö i yik aṅ ngam panam; tīni anga-aṅ ngaich tö ò, nö ha-òk ha-un. 16Ngaich anga-aṅ nö hòṅ nyā nuk nya-aṅkūö ha-un; ngaich rö-övö nö kame-eṅvkūö. 17Ngaich hē ò nö fē-ĕlre, ngaich ngö ṙô ò, Ām tak yip kūönkūö öp yöng chu, ngaich kô-òngkūö nö nyā, chöḵ-övkūö inrē; ngaich chu-ö höng ihih hòṅ kapah tö kinpahare. 18Hòṅ choholre, chin, öich chuh ip yöngre, öich ngö ṙô min tö ò, Kayöngö, köölö fālen chin ngaich im halīöngö, i kūö meh inrē; 19Rö-ö chin ngaich kô öich kūön meh invëka; vīten chu man sā yip kūönkūö meh. 20Ngaich choholre anga-aṅ, ngaich yihtöre nö ik yöngre. Ṙòngmö marôvat anga-aṅ, ngaich meūkö tök yöngre; ngaich anga-aṅ nö aheūkö ellōn, faltöre ngaich, sarālöre nö elranôṙö ò, ngaich hāmkūö ò. 21Ngaich ngö ṙô ngam kūön ò, Kayöngö; köölö fālen chin ngaich im halīöngö, i kūö meh inrē; rö-ö chin ngaich kô öich kūön meh invëka. 22Ngö ṙô pöri ngam yöng ò tö yik kamūönkūöre, Ka-eūyen yin; kētö ap tölöök inyut, hayutlö e in ò; kalonghöt kuntī ò inrē tö kinlong; kunröplö kunröön ò inrē tö kunröpö. 23Kētö ap tö alahav kun nuā inrē ṙatnyö likeun ò; ta-a, töi nya-aṅvkūö, öi ṙāmölōn. 24Pò ngòh kūön chu nö tö kapah, ngaich aṅlö nö hēk; tö chatngen an, ngaich kôti. Ngaich cha-a nö ṙāmölōn.
25Ngaich ök maṙöinylö kūön ò nö elkahôyö. Yihtöre anga-aṅ ngaich, nö haröhtöre nö im patī; ngaich anga-aṅ nö hang ṙô ranöng, kumṙīön inrē. 26Hĕng tak havëti anga-aṅ ngaich tö yik kamūönkūö, ngaich hatönan töp tö taṙōlaṙen. 27Ngaich ngö ṙô anga-aṅ tö ò, yih ap kòl kahëm meh; ngaich ap yöng meh nö ṙatnyö likeun tö-alahav kun nuā; pò ò nö teūngen tö ò nö lööken. 28Ngaich līn anga-aṅ, öt hòṅ kuhēthötre; kunyī-inyre ngaich ök yöng ò, ngaich ve-ekūö ò. 29Ngaich ngö ṙô ò nö sap ṙô ök yöng re, Yĕh meuk tum samyeūheu chu halanṙen meh; öthĕngheuh öich öthang chöngö meh. Ngaich me-eṅ öthĕngheuh kē-ĕkūö chu tö kun pököre; hòṅ chu öre haṙamlōnre holtö holre. 30Chalôḵhë ngòh kūön meh, ngòh kumheūṅtngö nup chehen meh nö i tötkôlò kikānö, ngaich me-eṅ ṙatnyö likeun kā ò tö tö-alahavö kun nuā. 31Ngaich ngö ṙô anga-aṅ tö ò, Kakūönö; töng örheūheu man in chu; chehen meh nun në taṙòkhöre chehen chu. 32Kô in tö hòṅ ṙāmölōn; pò ngòh kahëm meh nö tökapah, ngaich hēk nö aṅ; töchatngen an ngaich kôti.
Currently Selected:
T. LŪKÖS 15: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
