T. LŪKÖS 17
17
Fālen
(Mt 18.6-7,21-22; Mk 9.42)
1Ngaich ngö ṙô Anga-aṅ tö yik mahaköp, Rö-ö, nun nö kô nö öt yih në lökngen töfukngö. Tötkôlò pöri anga-aṅ öp lökten u tö yih. 2Ĕhten kanôlò öp öre, yē ò nö kapòktu likeun tö tökiröng ihong, ngaich sūmi nö el mai; ĕhten tö ò yĕn hĕng tak ahōḵtö fanukngö nö i vē kun kūöṅnö. 3Haṙēmngenre yin. Yē ngam kahëm meh nö köölö fālen, ve-ekūö ò. Yē ò nö havöötö-ellōnre, aṙēlen ò. 4Yē ò nö sat heuh kanöölö fālen nö in meh, i töhĕng sumkam; ngaich sat heuh nö havöötökūöre nö in meh, nö ngö ṙô, Haṙivlōn chin; aṙēlen ò me-eṅ.
Ngam Mikah
5Ngaich ngö ṙô yik tanīnöṙô tö ngam Mā, Ṙuöhlö mikah ih Man. 6Ngaich ngö ṙô ngam Mā, Yē yīö höng sā kun kulöl ṙôken mikah, ngaich kô-òren yī-ö ngö ṙô tö ngòh tökiröng chōn, Taṙĕhĕi man yĕh; ngaich teūichtöre öm el mai; ngaich kô-òren anga-aṅ nö hang ṙô yīö.
La-en Ngòh Kūön Alaha
7Achīö ap öre tö yīö, tökūönuvö tö vamī panô-òṅ ane inrē amahtö pököre, öp tö ngö ṙô tö ò, yē ò nö yih nö ṙā-ang el panô-òṅ, Ta-ih ilööṙen, ūichngöre nya-aṅvkūö. 8Ngaich rö-ö nö ngö ṙô tö ò, Halēnken nya-aṅkūö chu; hayutlöre man, meukṙen chu, hanöng saha kinheūṅtökūö chu nyā, òk inrē. Unôichngöre me-eṅ min nyā, òk inrē. 9Ha-öiny ngam kūönre ang, pò ò nö teūngen tö nup hinôtöre tö ò? 10Ngatī yin yī-ö inrē; yē yīö keuheūten tö nup tinölôre, ngö ṙô, Tötkanôluṙô in ayī-ö kūön; teūngen in ngaich la-evṙen tö nup la-enre.
Lööken Yik Tösöm Tak Tarik Tö Tī Yēsū
11Ngaich cha-a nö el talöökö chamuh Yerūsalem, tö Ò nö lök hôi Samariā, Këlelī inrē. 12Kuhēthötre Anga-aṅ ngaich nö ik töhĕng tuhēt, söm tak yik tarik in e, töyeūnyuvö maheuṅkkūö Ò. 13Yik töng marôvat nö sökhaka, ngaich cha-a nö have-a nö ngö ṙô, Yēsū, Mahaköphöti; aheūkölōn Man tö ih.
14Ngaich meūkö cha Anga-aṅ, ngaich ngö ṙô tö cha, Kuṙòh; hameuktöre yin i yip kūönṙô. Ngaich lööken cha-a, tö saha cha nö ṙòngmö kiröönngöre. 15Ngaich hĕng tak tö cha, ök töng mameuktöre tö lanöökenre, havantöre ngaich, nö pōitô nö ha-öiny ngam Tēv. 16Sōntökūöre anga-aṅ ngaich nö i röön Ò, nö ha-öinyan. 17Ngaich ngö ṙô ang Yēsū Röh öi sömre taka öi lööken? Isuh yip pökeh tömachūötöre taka? 18Höng öthĕntak hòng mahavan töre nö ha-öiny ngam Tēv, höng ngòh tahëng tarik. 19Ngaich ngö ṙô Anga-aṅ tö ò, Choholre man; kuṙòh kiröönngöre; ap mikah meh ap tölöökentī tö meh.
Yanīhi Ngam Pūlngö
(Mt 24.23-28,37-41)
20Ngaich pò Ò nö hatönö tö yik Feresī, tö hē yanihih ngam pūlngö ngam Tēv; ngaich Anga-aṅ nö sapṙô cha, nö ngö ṙô, Rö-ö an ngam pūlngö ngam Tēv nö yih, nö sā mineūkö e. 21Ötrĕhĕn yip min nö ngö ṙô, Yĕh meuk, ihih; hēk, Umu-aṅ. Yĕh meuk; pò ngam pūlngö ngam Tēv nö ellōn yīö.
22Ngaich ngö ṙô Anga-aṅ tö yik mahaköp, Yih nup min sakāmö, yē yīö min hòṅ hēngö maheuṅk tö nup sakāmö ngòh Kūön Tarik; ngaich rö-ö yī-ö min meūkö e. 23Ngaich ngö ṙô cha-a min tö yīö, Yĕh meuk, umu-aṅ; Yĕh meuk, ihih. Ui kiröönngöre; ui rēhĕn tömrit cha, 24Pòn sā ngam hanyāṅlö, yē e nö hĕng lā yanāngökūö nö elkatòh ngam halīöngö, yang inrē nö i tahëng lā elkatòh ngam halīöngö; ngatī an min ngòh Kūön Tarik ip sakāmö Ò. 25Urĕh pöri Anga-aṅ nö pōyen kanihngen ane inrē sōḵov tö ngih tūmö tarik. 26Ane inrē sā hē nuk sakāmö Nō-a, ngatī min inrē i në sakāmö ngòh Kūön Tarik. 27Nyā yik yih, òk yik yih, hapīhö yik yih, kētu yik yih nö im inpihö; hanöng saha ngam hē ngam sakāmö Nō-a, nö yôklö nö ël ök chōn; ngaich ngam ṙanöingö nö kapahatī tö cha. 28Ngatī hē yanihih nuk sakāmö Lòt; nyā yik yih, òk yik yih, havah yik yih, inyih yik yih, teūich yik yih, māṅnö yih yih. 29Hē sakāmö chanuhu Lòt pöri, nö ṙāngö Sôtöm; ngaich tameūyö ök kumṙah ane inrē kantak, nö ṙāngö el halīöngö; ngaich kapahatī tö cha nö ṙòkhöre. 30Ngatī an min ip sakāmö ngòh Kūön Tarik, nö hameuktöre.
31Ip hē e angū-ö sakāmö, ngòh mi-i kui patī, ngaich nup chehen ò nö ël patī; uh an yĕh nö yônti nö kēḵngö u. Ngatī inrē ngòh me-el panô-òṅ; un havantöre nö i patīre. 32Köpölōn tö ök pihö Lòt. 33Ngòh lamukkö taneūngenre tö nômöre, öt teūngen tö e min. Ngòh tötteūngen tö nômöre aṅhatī min tö e. 34Ngö ṙô Chin tö yīö, Ip hē e angū-ö hatööm, nët tak min nap tarik me-el töhĕng chamam; hĕng tak min tökē-ĕyö, ngaich ṙā-ayö ngam tahëng taka. 35Nët tak min nap kikānö tumlön nö holṙenre; hĕng tak min öp tökē-ĕyö, ngaich ṙā-ayö ngam tahëng taka. 36Nët tak min nap tarik el panô-òṅ; hĕng tak min öp tökē-ĕyö ngaich ṙā-ayö ngam tahëng taka.
37Ngaich ngö ṙô cha-a nö sap ṙô Ò, Mā; isuh? Ngaich ngö ṙô Anga-aṅ tö cha, I chūök ngam alaha, in e min nup matēṙö nö hamūlöre.
Currently Selected:
T. LŪKÖS 17: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
