T. LŪKÖS 19

Nā Yēsū Nāṅ Sekkīös

1Kuhēthötre Anga-aṅ ngaich, ngaich lök i Yerikō. 2Hĕng taka ök tarik, maheuṅk ò, Sakkīös ök mine-eny ò; mākūö mahamūl ṙāi kinëhöt chehen ök, nö tökôlò. 3Ngaich anga-aṅ nö hòṅ meūkö Yēsū; ngaich öt kô, kūö më tömaṙôngö; pò ò nö töcheūḵlö. 4Fal anga-aṅ ngaich nö urĕh, nö yônlö nö i rōl chōn nö meūkan; pò Ò nö lök in e. 5Chalôḵ Yēsū nö i chūök ò, ngaich môklökūöre Anga-aṅ, ngaich ngö ṙô tö ò, Sakkīös, hēṙen man yônti; tön iyöng patī meh Chin tötaheui.

6Ka-eūyen ngaich anga-aṅ nö yônti; ngaich hōḵen Ò anga-aṅ nö ṙāmölōn. 7Ngaich hē cha nö meūkö e, ṙòkhöre cha-a nöng in re ṙô, nö ngö ṙô, Ngaich An nö iyöng patī ngam tarik tököölö fālen. 8Söklöre ngaich Sakkīös, ngaich ngö ṙô tö ngam Mā. Yĕh meuk, Mā; ròngti tī chin kē-ĕkūö yāich tö kanôlòre; ngaich yē chu chōchen i tarik, havantu angū-ö nö fënö ṙënngen. 9Ngaich ngö ṙô Yēsū tö ò, Tötaheui ap inyööken nö yih nö i ngih patī; pò ò inrē anga-aṅ nö kūön Aprahām. 10Pò ngòh Kūön Tarik nö yih nö chöh, ane inrē hayööken töchatngen.

Inchōḵoṙô Tö Ngam Humlum Rupīö

(Mt 25.14-30)

11Ngaich hē cha nö hāngö u, hĕng ök ṙô Ò inchōḵoṙô nö ṙūönyôre; pò Ò nö röhta nö i Yerūsalem, pò ngam pūlngö ngam Tēv inrē nö ka-eūyen mineūkö, tö lōn cha. 12Lökten Anga-aṅ nö ngö ṙô, Hĕng taka ök tökôlò tarik chamuh tömarôvat panam, nö kēḵ öp pūlngöre; ngaich hēk havantöre. 13Söm tak havë-ti anga-aṅ tö yik kūönre, ngaich söm paôn kinëḵeṅkūö tö rupīö (sunna pësa). Ngaich ngö ṙô tö cha, Havah yin ngaich, ane inrē inyih, hanöng saha yanihih chu. 14Ngaich yik tarik pöri aṅ ök panam nö kunyahaṅelmat tö ò, ngaich tīnngö tö-akaha tarik nö unôichrit ò, ngö ṙô, Sōḵo ngòh tarik in īhö, nö hayöngö ih.

15Ngaich hē ò nö havantöre nö hēk, nö ngaich nö teūngen tö ngam pūlngö; ngaich tölṙô invëkö yik kūönre anga-aṅ, yik tö kē-ĕvkūö tö rupīö; pò ò nö hòṅ akahalōn tö taneūngen cha nö i nyih. 16Yihtöre ngaich ngam mu-urĕh nö i kūö ò, nö ngö ṙô, Mā, ṙuhölre ṙôken an ngam rupīö meh nö söm. 17Ngaich ngö ṙô anga-aṅ tö ò, Töteūngen man, me-eṅ tö-akaha kūön; pò meh kô-en i tö rahëichyen; chöngu man yēḵ i tö söm panam. 18Yihtöre ngaich ngam innëtö, ngö ṙô, Mā; ṙuhölre ṙôken an ngam rupīö meh nö taneui. 19Ngaich ngö ṙô anga-aṅ tö ò inrē, Chöngu man yēḵ i tö taneui panam. 20Yihtöre ngaich ngam tahëng taka, nö ngö ṙô, Mā; yĕh meuk, ngih öng yih rupīö meh, töng haṙūngi tö chu nö el kun hilā. 21Pò chu pa-ekūö tö meh pò meh tökësen öm tarik; kamëḵ nup töt ṙahātöre man, ane inrē mahamūl nup töt taheūichre. 22Ngaich ngö ṙô anga-aṅ tö ò, Löknyö elvāng meh ṙô chin min kahòkken meh; me-eṅ tötlöök kūön. Akahalōn man tö chu tökësen tarik, kamëḵ nup töt taheūichre. 23Kūöyòh ömeh öt kēḵngö ngam rupīö chu nö el chūök rupīö? Ngaich yih hë chu-ö, ngaich kô-òren öich teūngen tö e, nö holtö ṙāi inṙūöngköre. 24Ngaich ngö ṙô anga-aṅ tö cha yik tösökhaka, Kēḵngö ngam rupīö yin, nö ṙā-ang in ò. Kētö e im tösömö aṅ-in. 25Ngaich ngö ṙô cha-a tö ò, Mā; ngòh ang yih tösömö aṅ-in. 26Ngö ṙô chin tö yīö, Ngòh tö-aṅhaṅv-in ngaich kē-ĕvkūö min; ngòh tötaṅhaṅv-in pöri, ngaich nö kē-ĕyö ap töng mi-in ò min. 27Më tökunyahaṅelmat pöri tö chu, më tö sōḵ nö hayöngö tö chu, kēten cha ihih; fëlngen cha nö i kūö chu.

Taneungta Ngam Tömihôiṅ Nö I Yeruselem

(Mt 21.1-11; Mk 11.1-11; Jn 12.12-19)

28Keuheūthë ṙô Anga-aṅ, nö ngatī ṙô, ngaich urĕh nö kiröönngöre nö chuh Yerūsalem. 29Ngaich hē Ò nö röhta nö i Petfēkē, nö i Petenī, i kui ap Rôngö Òliv, nët tak tahīnngö Anga-aṅ tö mahaköp. 30Nö ngö ṙô, Kuṙòh, chuh im tuhēt nan, i kūö nāṅ. In e nā-aṅ min kuhēthötre, ngaich kôtökūö tö ap kūön köttö, tö kapòkhaka, ap tö öölu nö ūichka uk tö tarik. Luhlen ò, ngaich kēten ò. 31Yē nāṅ hatönö tö tarik, nö ngö ṙô, Kūöyòh ang nö luhlöng tö nāṅ? Ngö ṙô pancha, Hòṅ īnu ap Mā tö ò.

32Kiröönngöre ngaich nak tötīni, ngaich kôtökūö nöng sā ṙô Ò tö cha. 33Ngaich luhlö ök kūön köttö cha-a, ngaich ngö ṙô tö cha yik töchehevṙen, Kūöyòh an luhlö ngam kūön köttö?

34Ngaich ngö ṙô cha-a, Hòṅ īnu ap Mā tö ò, 35Kētu ngaich anga-aṅ nö in Yēsū; afahal cha-a ngaich tö nuk hilāre nö i uk ngam kūön köttö; ha-ūichlöng ngaich Yēsū nö i uk ò. 36Ngaich hē ò nö kiröönngöre, haṙĕhtö hilāre cha-a nö el talöökö.

37Ngaich hē Ò nö röhta nö i paneūṅti ap Rôngö Òliv; ṙòkhöre yik tö maṙôngö mahaköp nö ṙāmölōn, ane inrē ha-öiny ngam Tēv nö pōitô, pò nuk minhôiṅyö la-en Ò, maheuṅk cha; nö ngö ṙô. 38Tökôlò An ngam Rācha ngam yamih nö i Minënyö ngam Mā Tēv. Kumchikṙen el halīöngö; kanôlò lātulöng.

39Rēvre yik Feresī mi-i yik tömaṙôngö tö ngö ṙô tö Ò, Mahaköphöti; vëkö më mahaköp Man. 40Ngaich sapṙô Anga-aṅ nö ngö ṙô. Ngö ṙô Chin tö yīö, Yē vē min nö ṙāngôre, kô-òren min në ihong nö ṙô-òv.

Peūnyö Yeruselem Ang Yēsū

41Ngaich hē Ò nö röhta, ngaich meuk ngam panam Anga-aṅ, ngaich peūinyö e; 42Nö ngö ṙô, Yē meh öre akahalōn i ngih sakāmö me-eṅ takô, tö nup mi-im kumchikṙen meh. 43Hayunngöre pöri anu-ö nö i mat meh. Pòn yih nup hē nö in meh, hē yip tökunyahaṅelmat min tö meh nö tangngö kūö meh nö havīlen meh, nö höngö meh nö keuheūtngöre lā-a; 44Ngaich sukten meh min nö el tumlat, yip kūön meh inrē, mi-in meh. Öt ṙahāngu min cha-a tö ihong mahachaphen höö nö in meh; pò meh öt akahalōn tö hē chinöhköre.

Chuh El Ök Töhet Chūök Ang Yēsū

(Mt 21.12-17; Mk 11.15-19; Jn 2.13-22)

45Kuhēthötre Anga-aṅ nö el ngam töhet chūök ngam Tēv, ngaich ahōṙi yik mi-inyih tö Ò; 46Ngö ṙô An tö cha, Tö ngö kinūch ngö an, Patī vine-eṅkūötēv ap min patī Chu; ngaich pöri yī-ö vīten e nö chūök mu-ulāya.

47Ngaich mumkahten Anga-aṅ nö örheūheu nö el ngam töhet chūök. Ngaich yik mākūö kūönṙô yik kamūich inrē, yik yöngṙen yik tarik inrē, nö hòṅ fëlngen Ò; 48Ngaich öt kôtökūö cha-a tö tīre; pò më tarik nö havīlen Ò, nö hang ṙô Ò.

Currently Selected:

T. LŪKÖS 19: CANIBSI

Highlight

Copy