PAWTDAWNA THU 2
2
Mosi Pianna leh Sênlai Hun
(Heb 11.23)
1Zia lai chun, Levi Inkuan ah kipat pawsal pakhat a chia ah, Levi Inkuan ah mi nungak pakhat ji’n a vanei a;
2 #
Nas 7.20; Heb 11.23 numei chun nau a hun vop ah, chapa a hun nei ah; a chapa chu a mêlpha ma ma hi ti a he ta’n, tha thum sung a sêlgu tai.
3A sêlgûk zaw tâk lo phatin, phâiluang in bawm pakhat a siam ah, vahaibuan leh thingnâi in a tuai bit ah; nausen chu zia bawm sung ah chun a koi ah, lui pang ah phâiluang lak in a koi ta ahi.
4A u nu chun bang a hung ti em ti he ding in gâl kâng deu in a entha zing a.
5Pharaoh chanu lui ah kisil dingin a hung suk ah, zia kâl chun a suak numeite chu lui pang ah a vâk vêl un. Hampa buk lak ah bawm chu a mu tau ah; a suaknu chu a la dingin a sawl a.
6A hon phatin a sung ah nausen chu a mu ta’n, a lungsiat ma ma ah, “Zia hi Hebrai nausente hi ngei ding ahi,” a tia.
7Ziaphatchun, a suapinu chun Pharaoh chanu kiang in, “Hebrai numei naudonte lak ah pakhat, nau hun dot tei piak thei ding ka vahawl piak diam?” a hung tia.
8Pharaoh chanu chunle, “Chia ta’n la,” a tia. Tichun, nungak chu a chia ah, nausen nu ma ma chu a vako tai.
9Pharaoh chanu chun a kiang in, “Zia nausen hi lân la, kei â dingin ei dot tei piak in, la thaman dingle hun pena’ng ka,” a tia. Tichun, numei chun nausen chu a la, a enkol tai.
10 #
Nas 7.21
A hung seilet phatin Pharaoh chanu kiang in a pui ah, ama chunle a chapa dingin a kilâk tai. “Tui ah kipat ka lakdaw ahiziak in, a min dingin Mosi hi hen,” ti’n a min a sak tai.
Midian Gam ah Mosi Jammangna
(Heb 11.24-25)
11 #
Nas 7.23-28
#
Heb 11.24
Mosi a hung pitin phatin, ni khat a chipite lak in a va vakdok ah, a nasep gim danteu chu a vamu ta’n. Aigupta mi pakhat in ama chipite a vok lai tak chu a mu’n.
12A khawda vêl ah, kuama a mulo phatin Aigupta mipa chu a that ah, a luang chu piaunêl lak in a sêlgu ta’n.
13A jing ah a vakdaw kit phatin Hebrai mi pani a la kidel lai tak a va tuak kha; a thiamlo zawkpa kiang ah chun, “Bang ding ah la Hebrai chanpi la vok a hem?” a tia.
14Ama chun, “Kua’n ka chung ua lal ding leh vaihawm dingin a hun guat bek ah a hem? Aigupta mipa la tha gual ah kha ei tha gua la hem?” ti’n a dawnhu a. Ziaphat chun, Mosi a lau ta’n, “Ka thilbawl kha min a het uh ahi tuak hilam e!” ti’n a ngaitua ta ahi.
15 #
Nas 7.29; Heb 11.27 Pharaoh in zia thu chu a het phat in Mosi chu tha’ dingin a hawl tai.
Himaleh, Mosi chu Pharaoh umna kipat in a tai mang tai. Midian gam in a hang chêngden ah; ni khat chu tuikul kiang ah a kichut lai in,
16Midiante thiampu chanu pasagi a neite chu tuikhai ah hung in, tui a thâl un, a pau belam honte dawn dingin a tuikuang ah chun a sung un.
17Himaleh, belamching midangte chun a hung naw mang tau a. Mosi a hung dingdok ah, amau chu panpi in, a belam honteu chu tui a sun piak ta ahi.
18Chuleh, a pau Reuel kiang lam a hung tun kit phat un, “Bangatia tu’ni hi hung tung kit pai ziang la hiu em?” a la tia.
19Amau chun, “Aigupta mi pakhat in belamchingte khut ah kipat in ei panpi ah; chuleh, tui ei suak piak ah, belam honte tui ei thâl piak ah ahi,” a tiu a.
20A chanute kiang ah chun, “Aleh, ama chu khoi ah a um tam? Bang ding ah hun nusia ziang la hiu em? Vako un, an hung ne hen,” a tia.
21Mosi’n ziapa kiang ah umden ding chu lem a sa’n; chuleh, ama chun Mosi kiang in a chanu Zipporah a ji dingin a pia tai.
22Ama chun chapa a hinpiak ah, a min dingin Gershom a sak ah; “Mi gam ah malzin ka hi tâk ziakin,” a tia.
23Chomkhat zaw in Aigupta lengpa chu a thi ta’n. Israel chate chu a saltânnau ah chun a thûm un, a kap tau a. A saltânnau ah a kâ thawmteu chu Pathian kiang a tung ta’n.
24 #
Thl 15.13,14 Chuleh, a kâ thawmteu chu Pathian in a ngaitha, Pathian in Abraham, Isak leh Jakob kiang ah a thuthung kha a hezing a.
25Pathian in Israelte chu entha zing in a ngaisak zing hi.
Currently Selected:
PAWTDAWNA THU 2: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
