PAWTDAWNA THU 5
5
Mosi Tawh Pharaoh Kinialna: Mipite Puakgik Belapna
1Ziazaw chun, Mosi tawh Aron chu Pharaoh kiang in a chiau ah, a kiang in, “Lalpa, Israel Pathian in: Ka mipite pawt dawsak inla, gamthip ah ka kiang ah Kût a bawltheina ding un, a tii,” a tiu a.
2Himaleh, Pharaoh chun, “Israelte ka chiasak ah, a thu ka ngai ding Lalpa chu kua a hem? Zia Lalpa chu ka hepua’n, Israelte chu le pawt daw sak lo ding ka hi,” a tia.
3Ziaphatchun, amau in, “Hebraite Pathian ngei chun kei uh ei kimupi ta’n: gamthip lam ah ni thum chiana ah gamla ei chiasak inla; tichun, Lalpa ka Pathian kiang ua kithoina bawl ing kau; achutiloleh, ama’n I chung un hipi a hem, chemjam a hem hun lênsak kha ding ahi,” a tiu a.
4Himaleh, Aigupta lengpa chun a kiang un, “Mosi leh Aron, bang ding ah mipite hi a nasepnau ah kipat pui mang gua la hiu em? La nasepna lam chiat uh kizot tau in,” a tia.
5Pharaoh in a gen jel a: “Ngai un tu’hin a gam mite sâng ma in amau a tam zaw hial tau ah, a nasepnau cholsak ding la ti nalai sêt un,” a tia.
6Zia ni ma ma chun Pharaoh in mipite nasêmte enkol leh a hotuteu chu thu a pia’n:
7“Tu’ma gual ah khan mipite chu a chêktang siamna ding un bupawl la piak tâk lo diu ahi; amau vachia in vakihawl tau hen.
8Ahi’n, tu’ma chêktang a siam jat mau kha la phût tho diu ahi; la sukkiam him him lo diu ahi. A thâtbei ziak un, ‘Ei pawt dawsak unla, ka Pathian kiang un kithoina ei bawl sak un,’ a tiu hi.
9Na haksa zaw diak sepsak un; tichun, a nasep ding bep uh buaipi in, thumanlo a ngaisak manlo’na ding un,” a tia.
10Tichun, nasêm enkolte leh mipi lak ah hotute chu a chia dok un, mipite kiang ah chun, “Zia gual hin Pharaoh in a gen hi: Bupawl hun peta lo ding ka hi,
11nang uh chiau inla, la mutheina taphot un kilâk ziang tau in; himaleh, la nasep ding uh chu neuchale suktawm hi diak lo ding ahi, a tii,” ti’n a gen tau a.
12Tichun, mipite chu Aigupta gam zosia ah chun bupawl ah mat ding, bu kungsum hawl khawm in a kithejak tau a.
13Nasem enkolte chun kin tak in a nawu ah, “La ni khat na’teu chu bupawl piak ah la um lai gualmau khan sêm zo kin un,” a tiu a.
14Israel nam lak ah puitute chu Pharaoh nasep enkolte chun a vuau a: “Bang ding ah tu’ma gual ah kha ja’ni leh tu’ni hin la chêktang bawl ding uh zo lo la hiu em?” ti’n a nawu a.
15Ziaphatchun, Israelte lak ah hotute chu Pharaoh kiang in a hung ua, a kiang in, “Bang ding ah la suakte zia gual lawm lawm ah hi lei bawl ziang uh a hem?
16La suakte kiang ah bupawl piak ahi puai; ahi’n la, amau in ka kiang un, ‘Chêktang siam un’ ei tiu a. En tiam in, la suakte hi bang gual ah vok ah um ka hiu em! La mipite chung ah la thilbawl hi a dik puai,” a tiu a.
17Ama chun, “La thabei ui! La thâtbei ziak un, ‘Ei pawtsak unla, Lalpa kiang ah ei vakithoisak un,’ ti la hiu.
18Tu’hin chiau inla, na sêm un; bupawl le piak hita pua’n la tiu in, la chêktang siam jat ma mau la siam zaw ding uh ahi,” a tia.
19Ama’n, “La ni khat chêktang siam ding jat uh kha suktawm thei hipua’n a,” a tipiak phat ah chun, Israelte lak ah hotute chun a dinmun uh a siat dan tak chu a hechian tau a.
20Pharaoh kiang ah kipat a hung pawt daw phat un, amau a la ngâk Mosi tawh Aron chu a kituakpi tau hi.
21A kiang un, “Lalpa’n hun en hen la, la chung un vaihawm ta hen; Pharaoh leh a suakte mit mu ah huat um tak in lei siam tâk ziak un: a khut ua kei uh thâna ding chemjam la choisak ta’ngal un,” a tiu a.
22Tichun, Mosi chun Lalpa lam a nga kit a, “Aw Lalpa, bangatia zia mipite hi bawlsia la hem? Bang ding ah lei la sawl him him a hem?
23La min ah Pharaoh kiang ah thugen ding ah ka hang chia masak pen ah kipat khan ama’n zia mipite hi a bawlsia; ahi’n, la mipite hukdawna dingin nang in bangma la bawl nai paw’ngal in,” a tia.
Currently Selected:
PAWTDAWNA THU 5: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
