THILSIAM THU 12
12
Abram Kodaw Ah A Umna
1 #
Nas 7.2,3; Heb 11.8 Zia lai ah chun, Lalpa’n Abram kiang in, “La khua leh la gam ua kipat leh la chanaute lak ah kipat leh la pa In ah kipat hin pawtdok inla, gam ka hun etsakna ding lam ah chun chia in.
2Nam lopi tak in hun siam ing ka tin, hun maljawl ing ka tin, la min hi’lian ing ka; tichun, nangma chu maljawlna hi’n la;
3 #
Gal 3.8
kuale nang hun maljawl tapo chu maljawl ing ka tin; hânsia hun law tapo chu hânsia law ing ka: nangma ah namtin maljawl in hung um in au,” a tia.
4Chutichun, Abram chu Lalpa’n a hil gual ah chun a chia ta’n, Lot inle a zui ah. Abram chu Haran khua kipat a pawt daw lai ah chun kum sawmsagi leh nga mi ahi tai.
5Abram ji Sarai leh a naupa chapa Lot tawh a sum lamsa zosiau tawh Haran khua a neisa zosia leh a mite chu a pui ah, Kanaan gam zuan in a pawtdok tau a. Kanaan gam a tun phat un,
6Shekhem ah Moreh mun gangpi thing umna tiang in Abram in a gam chu a paltheng pek ah. Zia hun lai ah chun Kanaan mite a gam ah chun a la chêng nalai ui.
7 #
Nas 7.5; Gal 3.16 Chun, Abram kiang in Lalpa a hung kilâk ah, a kiang in, “Zia gam hi la suante kiang in pia ding ka hi,” a tia. Tichun, zia mun ah chun, a kiang ah kilâk Lalpa â dingin mâichâm a siam tai.
8Zia kipat chun Bethel sak lam tâng tiang in a kichawn ah, zia tak ah chun a puanbûk a jak ah, tumlam ah chun Bethel a um ah, sualam pang ah chun Âi khua a um hi; zia tak ah chun Lalpa â dingin mâichâm a siam kit ah, Lalpa min chu a ko tai.
9Ahi’n, Abram chu awl awl in Negeb lam tiang in a kichawn pek a.
Abram Tawh Sarai Aigupta Ah Zinna
10Tichun, zia gam ah chun kial a hung tung in; kial a huaisiat ma ma ziakin, Abram le Aigupta gam ah vaum tadi dingin a kipêm suk tai.
11Aigupta gam a lut ding kuan un a ji Sarai kiang ah chun, “Ngaitia, numei mêlhoi tak la hi ti ka hia’i;
12Aiguptate’n a hun mu phât ua leh, ‘Zia hi a ji ahi,’ ti’n kei ei that mai ding a hiu, nang chu bangma hun law pua’n au.
13 #
Thl 20.2; 26.7 Nangma ziak ah bit tak ah ka umtheina ding leh ka hinna hawi ah a umtheina dingin, ‘A suapinu ka hi,’ ti mai in,” a ti’n.
14Aigupta gam ah Abram a lût suk phat ah chun, Aigupta mite’n numei chu mêlpha a la sa ma mau a.
15Pharaoh miliante chunle a mu phât un, Pharaoh kiang in a mêlphat dan chu a vagen tau a. Chuleh, numei chu Pharaoh kiang in a hun pui tau a.
16Ama ziak ah chun Abram chu a bawlpha ma ma’n; belamte, bawngchalte, sabiltungchalte, suak pawsalte, suak numeite, sabiltungpi leh sangawngsaute natiang in a nei khawlaw tai.
17Himaleh, Lalpa chun Abram ji Sarai ziakin Pharaoh leh a Insung mite chu hîpi’n a gawt ta’n.
18Tichun, Pharaoh in Abram a ko ah, “Ka chung ah la thilbawl hi bangtidan a hem? Bang ding ah la ji ahi lam ei hil lo la hem?
19Bang ding ah, ‘Ka suapinu ahi,’ la ti a hem? Ziaziakchun ei vei ka ji ding ah ka la kipui hial ziang na chu: tu’hin zia tak ah hin la ji chu a um hi, kipui kit inla, chia mang ta’n,” a tia.
20Pharaoh in a chungchâng thu ah chun a mite thu a pia’n; a ji tawh a nei zosia tawh ama chu a hang thakdok tau a.
Currently Selected:
THILSIAM THU 12: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
